Nesër fillon “Eurovision Young Musicians”, Shqipëria përfaqësohet nga Klaudio Zoto

17 Gusht, 2018 - 10:20 pm

Nesër fillon edicioni i 19-të i garës “Eurovision Young Musicians”, nikoqir i të cilit këtë vit është Mbretëria e Bashkuar, shkruan KultPlus.

Ky edicion është i veçantë edhe për muzikantët e ri shqiptar e sidomos për violonçelistin Klaudi Zoto, i cili do të përfaqësoj Shqipërinë në këtë garë. Kjo është edhe hera e parë që Shqipëria është pjesëmarrëse. Klaudio bëhet në këtë mënyrë edhe pari instrumentist shqiptar që merr pjesë në këtë garë evropiane në të cilën këtë vit do të marrin pjesë 18 shtete.

“Eurovision Young Musicians” ka nisur prej vitit 1982. Edicioni i 19-të i konkursit “Eurovision Young Musicians” do të zhvillohet në Edinburg nga data 18 deri më 23 gusht 2018. Ky Aktivitet bëhet 1 herë në dy vjet.

Konkursi për vitin 2018 fillon me një raund eliminimi gjysmëfinale, i cili do të marrë formën e recitaleve të dhomës të cilat do të mbahen me 17 dhe 18 gusht. Klaudio Zoto do të paraqitet natën e dytë të gjysmëfinales, më 18 gusht. Ai do të interpretoj sonatën për çelo nga Grieg dhe rapsodi hungareze nga Popper.

Koncerti final do të zhvillohet në vendin më të njohur të qytetit, Hall Usher, më 23 gusht 2018, me muzikantët e shoqëruar nga Orkestra Simfonike Skoceze e BBC, nën drejtimin kryesor te dirigjentit Thomas Dausgaard. Në Shqipëri të drejtën e organizimit të kësaj gare e ka Radio Televizioni Shqiptar i cili para se të organizonte finalen, organizoi edhe fazat përzgjedhëse./ KultPlus.com

Të ngjajshme