Haruki Murakami dhe pylli i tij norvegjez

Janar 12, 2018 - 6:42 pm

Sot është datëlindja e një prej shkrimtarëve më të mirë të kohës sonë, Haruki Murakami.

Japonezi është një narrator i mrekullueshëm i cili ka shkruar “Pylli Norvegjez”, “After the Quake”, “E dashuria ime Sputnik”, dhe libra të tjerë që kanë shëtitur botën dhe janë përkthyer në gjuhë të ndryshme.

Haruki është shkrimtari i dashurisë, i rinisë, i adoleshentëve, i tërmeteve, i tregimeve, i metrove, i muzikës jazz, i historive që nuk plaken kurrë, shkruan KultPlus.

Ja shembull disa prej frazave më të mira nga libri “Pylli Norvegjez”, apo në anglisht “Norwegian Wood”.

“Asnjë e vërtetë nuk mund ta shërojë dhimbjen të cilën e ndjejmë kur e humbasim dikë që e kemi dashur. S’ka të vërtetë, s’ka sinqeritet, s’ka forcë, s’ka mirësi që mund ta shërojë atë dhimbje. E gjitha që mund të bëjmë është të shohim përmes saj deri në fund dhe të mësojmë diçka prej saj, por ajo që do ta mësojmë nuk do të na ndihmojë në përballjen me dhimbjen tjetër, e cila vjen tek ne pa paralajmërim.”

“Nuk më intereson se çfarë do të bësh me mua, por vetëm nuk dua të më lëndosh. Tashmë kam pasur mjaftueshëm lëndime në jetën time. Më shumë se mjaftueshëm. Tani dua të jem e lumtur.”

“Nuk është se ne nuk përshtateshim. Ne thjeshtë skishim asgjë për të thënë.”
– Haruki Murakami, “Norwegian Wood”

( Toru, një student i urtë dhe serioz para kohe, jeton në Tokio dhe i është kushtuar Naokos, një vajze të bukur por tepër melankolike, por ndjenja e tyre e përbashkët ndikohet nga vdekja tragjike e shokut të tyre më të ngushtë para disa vjetësh. Toru fillon të mësohet me jetën e universitetit, me izolimin dhe vetminë që gjen atje, por për Naokon presionet dhe përgjegjësitë e jetës janë të padurueshme. Teksa ajo tërhiqet gjithnjë e më thellë në botën e saj të brendshme, Toru e gjen veten duke i kërkuar ndihmë njerëzve përreth dhe tërhiqet nga një vajzë e re me një pavarësi të paepur dhe pa paragjykime seksuale. Ky libër është një përzierje madhore e muzikës, emocioneve dhe erosit. )

Të ngjajshme