Poezi e shkruar nga Flutur Mustafa.

T´du kur je ma i egër
Se amëlsina Jote ka mjaftu
Me ma marrë zemrën

Tash du ta shof f´tyrën tjetër Tanen
At´ f´tyrë që askush s´ta njef

E unë e di si Ti merr frymë…

Val´t e Tuja përplasi egërsisht n´mu
Dhe nxirre prej meje ankthin e pritjes
Të dashnisë t´vonume…

Bashk´puno me hanën
M´tradh´to qoft nevoja

Myti n´zemrën Tane t´zezë
Detar´t
Që n´thell´sinë Tane
Me qiri kërkojnë dashni
Mos lejo ta gjejnë
Det, myti!…

O, ma mirë mu t´m´kishe myt´
Mu, që dashni kërkova
N´errësinë e kobshme Tanen

Edhe e gjeta
Ma mirë ta kishe fundosë
Thithë n´thell´si
Sa zhyta vedin e s´kam si t´dal
e kurrë ma n´bregun Tan
t´ankorohem…

Unë Anijezeza
Që sa anej-kënej e bart
T´urrej
T´urrej
I urrumun je n´mes të dashunve!

Det, emnin mos ma thirr
Isha Sirena Jote
Vetëm ´ Jotja…

E Ti
Ç´bane?!…
U hodhe n´përqafim t´Laurës t´Bunës
E prej Bunës ma s´pakti tradh´ti kam pritë

I mallkumun (mos) qofsh Det…