Albumi i shumëpritur, “United State of Albania” tashmë është në shitje.
Ndryshe nga shtetet perëndimore ku albumi do të jetë në shitje në platformat si iTunes dhe Spotify, në vendin tonë albumi mund të blihet në web faqe zyrtare, PINT.al Me t’u qasur në ueb faqen PINT.al, do të gjeni listën e këngëve dhe kopertinën e albumit.
Albumi ka një kosto prej 5 eurosh, i cili vjen si CD në kualitet shumë të lartë. Kjo është po ashtu një simbolikë e traditës dhe kultit të hip hopit, një retrospektivë e kohës së vjetër kur albumet kishin kuptim tjetër si CD./ KultPlus.com
Më 17 shkurt, të gjithë qytetarët e
Kosovës do të kremtojnë 11-vjetorin e Pavarësisë së Kosovës. Për të shënuar këtë
ditë tashmë janë organizuar aktivitete të shumta.
Në kryeqytet në koncertin e mbrëmjes i
cili mbahet çdo vit do të performojnë emra të njohur të estradës kosovare. Dafina Zeqiri, Gjiko, Mc Kresha, Lumi
B, Lluni, Dj Dagz, Fuego dhe Rina janë emrat që do të ngjiten në skenën e
koncertit, më 17 shkurt.
Ky koncert do të fillojë nga ora 20:00./ KultPlus.com
Në një postim në Facebook-un zyrtar të Qendrës Kinematografike të Kosovës, thuhet se filmi me regji nga Samir Karahoda që e solli Kosovë në Berlinale u prit jashtëzakonisht mirë nga publiku i Berlinales, ku para të pranishmëve u paraqit e gjithë ekipa e filmit.
“Është një arritje e madhe për kinematografinë e Kosovës” u shpreh Ministri i Kulturës Kujtim Gashi i cili ishte i pranishëm në premierë bashkë me ambasadorin Beqë Cufaj dhe sekretarin e MKRS-së Veton Firzi.
Filmi trajton dy tema paralelisht: fenomenin e ndërtimit të shtëpive të njejta dhe migrimin e cila veçmas theksohet nëpër këto familje. Nëpërmjet personazheve, portretizon marrëdhënien dhe solidaritetin në mes vëllezërve; sakrificën dhe vendosmërinë e prindërve për të mbajtur harmoninë brenda familjes; kuptimin dhe rëndësinë e shtëpisë dhe shpresës në mes kthimit apo jo në vendlindje.
“NË MES” është filmi i parë në Kosovë që u bë pjesë e garës ndërkombëtare të filmave të shkurtër “Berlinale Shorts”. Mbrëmë u dha premiera e këtij filmi./21Media/ KultPlus.com
Erza Muqolli po vazhdon ta dëshmoj veten në çdo interpretim dhe paraqitje në skenë. Ajo në dhjetor të vitit të kaluar solli një interpretim të mahnitshme të një prej këngëve më të njohura të Beyonce, shkruan KultPlus.
Erza Muqolli vjen nga Kosova dhe është vetëm 13 vjeçare por sukseset e saj në interpretim dhe skenë e tejkalojnë moshën e saj. Para një numri të madh të publikut, ajo është ngjitur në skenën AccorHotels Arena, ku ka sjellë këngën “Listen” të Beyonce. E veçanta e këtij interpretimi është se pasi që zëri i saj i fuqishëm arrin të prek çdo pjesë të sallës, ajo ngrit dy duart lart për të krijuar simbolin kombëtar, shqiponjën. KultPlus ju sjellë videon e këtij interpretimi nga AccorHotels Arena, në Paris.
Po ashtu kujtojmë se në këtë skenë, ajo në fund të vitit të kaluar kishte performuar më këngëtaren e njohur franceze Zaz./KultPlus.com
7 franga e 30 centë. Kaq më paskan mbetur deri në fund të javës. I numërova edhe një herë. As edhe një cent më shumë. Hapa një kanaçe dhe fillova ta pi ngadalë. Një copë sallam bajat e ha ngadalë, duke kruajtur dhëmbët. Dua të jem mi. Ose mizë, që të ngopem me një copë të vogël sallami. Më mirë të mos kesh të dashur sesa të jesh i varfër. Më mirë të jesh i varfër, se të kesh një grua në shtëpi. Pse dreqin ka keq e më keq? “Ka keq e më keq” është shpikje e fukarenjve. Të pasurit e thonë për të tallur bythën me ata që s’mund ta ngijnë kurrë barkun si duhet. E piva edhe pikën e fundit që kishte ngelur dhe shkova në nevojtore. Sa herë shkoj në nevojtore e shikoj mikun tim kokulur. Më duket sikur nuk më flet. Sikur më ka marrë inat prej kohësh. E shikoj, e mundohem t’ia qëlloj bash në vrimë. Ndoshta krejt njerëzit mundohen t’ia qëllojnë bash në vrimë. Presidenti i Amerikës, mbasi ka futur një botë të tërë në luftë dhe ka dhënë një grusht medaljesh nderi, mundohet t’ia qëllojë në vrimë. Diktatorët ndoshta mundoheshin t’ia qëllonin edhe ata. Kushedi sa njerëz janë vrarë me urdhër të një diktatori të dëshpëruar që nuk ia ka qëlluar bash në vrimë. Tërë jetën time jam munduar dhe gjithmonë kam dalë huq. Më së shumti kam dalë huq me femrat. Sa herë kam qenë me një femër për herë të parë, kam ndezur një cigare dhe kam filluar të mendoj se si mund të iki prej saj. Duhej të kishte gjithmonë një mënyrë. Një derë për të dalë. Edhe shtëpia më e bukur në botë e ka një derë për t’ia mbathur që andej. Madje edhe parajsa. Kur shihja derën, vija kokën në prehrin e saj dhe më zinte gjumi. E prapë se prapë nuk i kam kuptuar kurrë femrat. E jeta do të ishte shumë më e thjeshtë po të hiqja dorë nga dëshira për t’i kuptuar. Henri e ka në terezi. “Gjërat janë të ndara në jetë, djalosh: birra e ftohtë, femra e nxehtë. Fundi i muhabetit!” – thoshte ai plak grindavec. Në frigorifer kishte mbetur edhe një kanaçe e shtrembër. E piva me një frymë dhe shkova ta pshurrja. Kësaj here, bash në vrimë…
“Unë e shkriva pasurinë për arsim, ju po e shkrini arsimin për pasuri”, është pankarta që rri në duart e Hasan Prishtinës, emrin e të cilit e mban Universiteti i Prishtinës, që sot shënoi 49 vjetorin e themelimit. Kjo dhe shumëçka tjetër sot erdhën në një ekspozitë, si reflektim i asaj se çfarë e ka karakterizuar UP-në për gati gjysmë shekulli.
Më 13 shkurt, para 49 vitesh u mbajt kuvendi themelues i UP-s, ndërsa dy ditë pas më 15 shkurt të vitit 1970 u mbajt mbledhja solemne. Kjo datë u shpall Dita e Universitetit të Prishtinës. Si reflektim i gjithë historikut të UP-së, Koalicioni për Integritet dhe Transparencë në Universitet (KITU) sot organizoi ngjarjen gjithë-ditore “Odisejë: Universiteti i Prishtinës ndër vite”. Në muret e Modelariumit të Fakultetit të Ndërtimtarisë dhe Arkitekturës të Universitetit të Prishtinës, në mënyrë kronologjike ishte shtrirë gjithë rrugëtimi i Universitetit të Prishtinës. Etapat e rëndësishme në të cilat ka kaluar ky universitet, në këtë ekspozitë vinin si përballje me njëra-tjetrën, ndërsa plotësoheshin edhe me shumë hulumtime që tregonin për gjendjen e tanishme në UP, shkruan KultPlus.
Autori i kësaj ekspozite dhe themelues i organizatës ‘Admovere’, Shkëlzen Gashi tregoi kronologjiket shtrirjen e ekspozitës përgjatë viteve, ndërsa theksoi se vitet e 70-a mbeten vitet më interesante të Universitetit të Prishtinës, e që janë përjcellur me një entuziazëm të jashtëzakonshëm të themelimit të universitetit dhe kohën kur nënshkruhen marrëveshje bashkëpunimi me universitetet rajonale dhe universitetet ish-jugosllave. Historia e rektorëve të UP-së fillon me rektorin Dervish Rozhaja, për të cilin Gashi tregoi se ka qenë doktori më i ri në Jugosllavi pasi që kishte doktoruar në moshën 23 vjeçare.
“Kemi menduar që këtë ekspozitë ta fillojmë me vitet e 60-a kur janë themeluar katër fakultetet e para në Prishtinë e që i fundit është Fakulteti i Mjekësisë, me të cilin edhe janë pjekur kushtet për ta themeluar universitet. Kemi vazhduar me vitet e 70-a që janë vitet më interesante të UP-së, për faktin se ka pasur një entuziazëm të jashtëzakonshëm kur është themeluar ky universitet. Ndoshta paraprakisht është mirë me e thanë që ka pasur disa demonstrata në vitin 1968, që përveçse kanë kërkuar kushtetutë, republikë, vetëvendosje, një nga kërkesat e tyre ka qenë edhe “Duam universitet””, tha ndër të tjera Gashi.
Ekspozita tregon se gjatë këtyre viteve, në të gjitha fakultetet e UP-së, u themeluan salla leximi, u sigurua literaturë, u ndërtua menza e studentëve, shërbimi shëndetësor dhe filloi mbështetja e studentëve me kredi e bursa. Të gjeturat e vendosura mes ndanin vitet e 60-a, 70-a e 80-a me ato të viteve të 90-a e tutje, mirëpo ato rrinin si pasqyrë e gjendjes së tanishme. Ato dëshmojnë për një terren jo të mirë infrastrukturor dhe jo vetëm, gati pesë dekada pas përplasja student-infrastrukturë është 1.77 m2 për student, që nuk i përmbush kushtet as për arsim fillor, ndërsa disa fakultete bashkëndajnë të njëjtin objekt, e disa të tjera zhvillojnë mësime në tri ndërtesa të ndryshme.
Nga koha e themelimit të UP-së, ekspozita nxjerrë në pah edhe fjalimin e Rexhai Surroit i cili kishte theksuar se nga ai moment, gjuha shqipe kalon në një dimension tjetër. Surroi, asokohe nënkryetari i Republikës së Kosovës kishte theksuar se gjuha shqipe nuk është më vetëm gjuhë e sharrëxhinjve, e pastruesve të rrugëve, e hajnave por edhe e intelektualëve dhe akademikëve.
“Gjuha shqipe nuk asht ma vetëm gjuhë e sharrëxhinjve, e pastruesve të rrugëve, e hajnave dhe bujqve por gjuhë edhe e qindra mija nxënësve të shkollave fillore e të mesme, të mija e mija studentëve me dheta profesorëve të fakulteteve dhe gjuhë edhe e doktorëve të shkencave, inxhinierëve, mjekëve dhe qytetarëve tjerë akademikë”, kishte thënë ndër të tjera në fjalimin e tij Surroi.
Në ecje përmes pamjeve e të dhënave të ekspozitës, vitet e 80’ të dërgojnë tek fryma e protestave, por para së gjithash tregojnë për një rritje shumëfish më të madhe të studentëve. 7 mijë e 712 studentë, sa ishin nga koha e themelimit, për vetëm një dekadë numri i tyre shkoi në 43 mijë e 321 studentë, prej tyre 31 mijë shqiptarë, rreth 12 mijë serbë dhe 223 shtetas të huaj. Numri i i mësimdhënësve kishte shkuar në 600 mësimdhënës dhe 400 bashkëpunëtorë.
Protestave të vitit 81, u kishte paraprirë një përplasje tabaku në menzë, që pasoi me mjaft shumë kërkesa për kushte më të mira. Në fillim të prillit, së bashku me studentët edhe mijëra punëtorë dhe qytetarë arritën numrin e 40,000 protestuesve. Nga numri i këtyre protestuesve, 9 prej tyre u vranë, u plagosën 55, u lënduan 75 kurse arrestuan rreth 2 mijë prej tyre, e burgun e rëndë e pësuan 1 mijë e 200 demonstrues. Nga viti 1961 e deri në vitin 1989 jashtë UP-së mbetën 18 mësimdhënës. Në mësin e shumë gjërave të tjera, ekspozita dokumenton që kritikat për “plagjiaturë”, fillojnë pikërisht në periudhën e viteve të 80-a. “A i shkruan prof.dr … librat me laps apo me gërshërë”, kishte qenë një nga pyetjet për njërin nga profesorët e filozofisë, i cili përkundër dëshmive se dy librat e tij janë hartuar duke përshkruar librat e autorëve të tjerë, ai shërbeu si profesor në UP deri sa u pensionua.
Të dhënat në mes të ekspozitës, tregojnë se deri tani janë
publikuar rreth 16 raste të plagjiaturës dhe vetëm tre prej tyre janë
suspenduar nga procesi mësimor, të cilët më pas janë kthyer, e për më tepër
shumë prej plagjiatorëve edhe janë avancuar.
Vitet e 90-a, vitet e
mbijetesës dhe rezistencës
Në anën tjetër ekspozita vizualizon vitet e 90-a, të cilat autori i ekspozitës Shkëlzen Gashi, i konsideron si vite të mbijetesës dhe të dëbimit prej objekteve universitare nga regjimi serb. Në fillim të vitit akademik 1991-1992, studentët dhe mësimdhënësit shqiptarë u barrikaduan nga shfrytëzimi i objekteve universitare nga policia serbe. Afro 1 mijë mësimdhënës mbeten pa punë. Dyert e objekteve të Universitetit të Prishtinës mbetën të mbyllura për studentët shqiptarët, por ata hapën dyert e 250 shtëpive private, ku zhvillohej mësimi shqip deri më 21 mars 1999.
Një nga grafikat e ekspozitës tregon se kjo periudhë shënoi edhe zvogëlimin e numrit të studentëve shqiptarë pasi që nga 18 mijë studentë në vitin 1991-1992, mbetën vetëm 12 mijë në vitet pasuese pasi që pjesa më e madhe e tyre u larguan për të fituar para për familjet e tyre dhe për të shmangur rekrutimin ushtarak. Ekspozita e sotme solli në fokus edhe protestat e 1 tetorit nga viti 1997, pasi që marrëveshja Rugova- Millosheviq nuk po gjente dritë zbatimi.
Me miratimin e Rezolutës 1244 e Këshillit të Sigurimit (KS)
të OKB-së, profesorët u kthehen godinave dhe fakulteteve të institucioneve të
tjera të Universitetit të Prishtinës.
“Partitë e lidhura me “njerëzit e luftës” e fusin nën kontroll Universitetin e Prishtinës”, kështu përshkruhet gjendja e UP-së në vitet pasuese, dhe nga protestat për lirim të objekteve, studentët në këtë dekadë kalojnë në kërkesa për të ndryshuar gjendjen e rëndë në UP. Kjo pjesë e ekspozitës karakterizohej me punën e rektorëve të këtij universitet dhe mënyrën emërimit të tyre./ KultPlus.com
Presidenti i Republikës së Kosovës, Hashim Thaçi ka dekoruar këngëtarin Sabri Fejzullahu me Medaljen Presidenciale të Meritave.
Përmes llogarisë së tij në Facebook, presidenti Thaçi ka dhënë lajmin për dekorimin e këngëtarit Fejzullahu dhe motivacionin që e kanë shtyrë në nderimin e një prej yjeve më të njohura të estradës kosovare për dekada me radhë.
“Me Medaljen Presidenciale të Meritave, sot e dekorova një prej këngëtarëve më të pëlqyer të publikun tonë për më shumë se gjysmëshekulli. Gati tërë jetën e tij Sabriu na ka argëtuar me këngën dhe humorin e tij. Na ka treguar bukuritë e jetës, por edhe na ka bërë të mendojmë për detyrat dhe obligimet për shoqërinë tonë”, ka shkruar në llogarinë e tij në Facebook presidenti Thaçi.
Këngëtari Sabri Fejzullahu është një prej këngëtarëve më të vlerësuar të estradës kosovare dhe mjaft i kërkuar edhe në diasporë. Ai ka bërë karrierë të suksesshme edhe si aktor.
Sabri Fejzullahu, për një mandat ishte edhe deputet nga radhët e PDK-së në Kuvendin e Kosovës. / KultPlus.com
Deri sot, tetë këngë janë përzgjedhur nga shtetet përkatëse për përfaqësim në Eurovizion.
Faqja zyrtare e Festivalit Evropian të Këngës – EUROVIZION, ka lansuar një video ku janë publikuar të gjitha këngët, të cilat deri sot janë të vetmet që e kanë të garantuar Eurovizionin.
Deri në muajin maj kur edhe mbahet Eurovizioni në Izrael, edhe rreth 35 shtete në Evropë do të zgjedhin këngët e tyre përfaqësuese.0
Shtetet që tanimë kanë përfaqësuesit e tyre janë Shqipëria, Franca, Italia, Australia, Republika Çeke, Mali i Zi, Spanja dhe Britania. / KultPlus.com
Ka ndërruar jetë në moshën 102 vjeçare, akademiku Idriz Ajeti.
Sot, lajmin e kobshëm e kanë pritur me dhimbje qytetarët e Kosovës, të cilët e humbën një mendje të ndritur.
Ne po e sjellim sot këtë copëz të Ajetit sa ishte gjallë.
****
Shqipëri quhet toka deri në Nish.
Kështu shprehet veprimtari i shquar dhe ambasador i gjuhës shqipe, akademiku shqiptar nga Medvegja prof.dr.Idriz Ajeti në një intervistë për agjencinë e lajmeve « Presheva jonë ». Në një intervistë, Ajeti thotë se «Pas prishjes së Jugosllavisë së atëhershme në vitin 1941 Kosova, bashkë me Luginën e Preshevës i takoi Shqipërisë, gjë krejt normale sepse zonat i lidhte jo vetëm, historia, gjuha dhe flamuri por edhe doket, traditat, kultura…”
“Mesazhi im do të ishte që mundësisht popullsia, sidomos rinia jonë të mos lëvizin nga trojet e tyre etnike. Në këtë drejtim mund të kontribuojnë me shumë edhe partitë politike dhe intelektualët në Medvegjë dhe në mbarë Luginën e Preshevës. Për të penguar ketë eksod edhe komunat mund të bëjnë më shumë për t’ju siguruar punë, perspektivë. Ndryshe Lugina e Preshevës nuk mund të quhet Kosovë Lindore pa shqiptarë. Rinia mund të lëvizë për të kërkuar punë apo studiuar, por kurrsesi t’i kthjenë shpinën përgjithmonë vendlidjes dhe të mos e harrojë atë, të kthehen aty ku kanë lindur ata dhe të parët e tyre. Ne dhe askund nuk ka të drejtë apo mund ta detyrojë dikë të mos lëvizin nga vendi kur ai është i kërcënuar apo ushtrohet dhunë seri mbi ta, sepse ne bile sot që jemi në Kosovë e dimë mire se Serbia të vetmen armë, për spastrimin etnike e përdor mjetet e dhunës, provokimet dhe diskriminimin të cilat do të nxisnin shpërnguljet e imponuara sepse askush sot nuk ka dëshirë ta lëshojë vendlidjen pa pasur ndonjë hall të madh.
Shqipëria jonë, toka jonë është deri në Nish….
Akademiku Ajeti fillimisht ka pohuar se «Lugina e Preshevës pa shqiptarë nuk mund të quhet Kosovë Lindore. Ju, a nuk po e shihni se Serbia për 2 dhe 3 kisha në Kosovë, madje edhe pas kapitullimit ende vazhdon ta quajë Kosovën, Serbi?! Qëllimet e Serbisë në Luginën e Preshevës po i realizon me sukses. Për Medvegjën do të thoja se situata atje është e mjerueshme. Sa i përket perspektivës së shqiptarëve në atë komunë, ku dikur ishte e populluar me shumicë shqiptare, ndërsa sot aty dominojnë serbët dhe janë bërë artificialisht shumicë. Në Medvegjë sot mjerisht mbi 80 për qind shqiptarëve e kanë lëshuar vendlindjen për shkaqe tashmë të njohura, por pjesa dërrmuese nga dhuna, represioni e kush tjetër nga mos perspektiva, ku Serbia po ju përgatit terrenin duke ju imponuar largimin nga trevat e tyre. Këtu kisha pasur dëshirë të përkujtoj se, qysh nga koha e luftës 1941-‘45, ashtu edhe në kohën e sundimit të Miloshevicit, shqiptarët e komunës së Medvegjës, nga më pak se dhjetë katunde, zunë, herë më pak e herë më shumë, të lëvizin, të luajnë nga vendi stërgjyshor pos në Kosovë sot edhe në drejtime të ndryshme. Fundja edhe shqiptarët, sikur të mos jenë të diskriminuar apo sikur t’i kishin kushtet sikur serbët në Medvegjë apo Nish sigurisht nuk do ta braktisnin vendin e tyre… Shqipëria jonë, toka jonë është deri në Nish. Këtë e kanë thënë dhe vet intelektualët, historianët serb se ne jemi autokton, kurse serbët ardhacakë..»
Akademiku Idriz Ajeti është lindur në Topalë të Medvegjës së Kosovës Lindore. Shkollën fillore e ka mbaruar në Banjën e Sijarinës më 1930, ndërsa atë mesme në Shkup më 1938, kur në atë kohë Serbia dëbonte shqiptarët nga trojet e tyre etnike në drejtim të Kosovës apo Shqipërisë, por një pjesës e madhe nga ky presion detyrohej të shpëngulen në Turqi. Akademiku Idriz Ajeti është dhe mbetet ndër emrat më të njohur në fushën e linguistikës dhe ambasador i kulturës shqiptare. Ai ka marrë disa cmime mirënjohje. Në vitin 1958 ka mbrojtur disertacionin e doktoratës me temën: “Zhvillimi historik i formës gege të shqiptarëve të Zarës së Dalmacisë” Gjatë vitit 1969-1971 ishte drejtor i Institutit Albanologjik, më 1971-73 ishte dekan i Fakultetit Filozofik, në vitet 1973-75 rektor i Universitetit të Prishtinës. Në vitet 1979-1981 dhe 1996-1999 ishte kryetar i Akademisë së Shkencave dhe të Arteve të Kosovës.
17 vjeçarja Rina Lipa, motra e vogël e këngëtares nga Prishtina – Dua Lipa, ka dhënë edhe një intervistë për Red Milk Magazine.
Ajo është në ballinën e revistës për edicionin e muajit
shkurt, derisa përgjigjet në disa pyetje të kësaj magazine.
Rina dëshiron të bëhet aktore, ndërsa ka rreth 600 mijë ndjekës në Instagram, me të cilët e ndanë përditshmërinë e saj.
“Po punoj në filmin tim të parë të metrazhit të shkurtër. Jam shumë e lumtur. Vetëm ta dëgjosh regjisorin që thotë “Action” është fantastike” tregon mes tjerash Rina.
“Provoj të jem autentike në rrjetet sociale, prandaj postoj gjëra që edhe inspirojnë të tjerët. Më pëlqen të dal me shoqet e mia. Tri fjalët që më përshkruajnë më së miri në stilin tim janë ekstra, ngjyra-ngjyra dhe stil që kënaq të tjerët” tregon Rina.
Në fotosesionin për Red Milk Magazine ajo vjen e fotografuar nga Johanna Nyholm. / KultPlus.com
Të kam dashtë… Dashunia nuk ka të tashme. Dashunia nuk ka të ardhshme. Ajo ka vetëm të kaluemen. Të kam dashtë…
Dashunia asht e lirë si dorë mbi ranë. Dashunia asht e verbët si dorë e zhvoshkun nga lkura. Dashunia asht e çmendun si dorë mbi mish. Dashunia vdes kur i mbarohen fjalët. Dashunia vdes kur i shërohen plagët. Dashunia fillon prap prej fillimit…
Dashunia i beson të gjitha. Dashunia i shpreson të gjitha. Dashunia i “ha” të gjitha. Dashunia i fal të gjitha. Dashunia banon te duert…
Të kam dashtë… Dashunia nuk ka të tashme. Dashunia nuk ka të ardhshme. Ajo ka vetëm të kaluemen. Të paskam dashtë, pra…
Rina Lipa, motra e këngëtares Dua Lipa, nuk dëshiron të mbetet vetëm një emër tjetër i thjeshtë.
Rina së fundmi ka dalë në ballinën e Red Milk Magazine, në edicionin e muajit shkurt.
Rina gjithmonë ka qenë përkrahëse e Dua Lipës ndërsa duket se tash synon edhe vetë të krijojë imazhin e saj. Ajo duket e mahnitshme në këtë fotosesion në Los Angeles.
Red Milk Magazine kësisoj i ka dhënë hapësirë Rinës, 17 vjeçare, e cila thotë në këtë numër se aspiron të bëhet një aktore në të ardhmen. / KultPlus.com
Doruntina Ukimeri megjithatë, nuk e la pa e shpalosur çejzin
e saj. Në një formë, mbrëmë ajo e pati natën e saj të çejzit, kur e ekspozoi atë
në teknikën e filigranit me letër, në hapësirën ekspozuese ‘Motrat’ në
kryeqytet.
E çejzi ndër shqiptarë është traditë, dëshirë, investim në martesë. Doruntina vendosi që këtë traditë dhe pjesë të artizanatit ta sjellë në ekspozitën e saj. Me këtë teknikë, ajo thotë se nxjerrë vetëm gjëra të bukura.
“Filigrani me letër është një mënyrë e punës të cilën e praktikoj viteve të fundit, dhe mbetet si teknikë e cila të lejon të punosh gjëra të bukura, lule, elemente me shumë ngjyra. Çejzi gjithmonë më ka pëlqy, dhe ka shumë pak informata për të edhe në internet, edhe pse të gjithë kanë dëgju për të dhe dijnë për të” tregon Doruntina.
Mbrëmë, ajo në Prishtinë e hapi ekspozitën e saj të radhës, e cila do të qëndrojë e hapur deri në 22 shkurt. Tentene, goblena, jelek, çorape e mindila janë pjesë e ekspozitës, të punuara dalëngadalë nga dora e Doruntinës, për tu puthur me murin e bardhë të hapësirës “Motrat”.
Doruntina aplikoi në programin HERITAGE SPACE nga Culture
Heritage Without Borders – Trashëgimia Kulturore pa Kufinj, dhe kësisoj e nisi
punën në këtë teknikë. Pasuan dy punëtori ku Doruntina ndihmoi edhe gjashtë
pjesëmarrës të tjerë të punojnë në këtë teknikë.
Dhe rezultati janë 20 punime, prej të cilave gjashtë janë pjesë e ekspozitës, ndërsa vjen edhe një video e realizuar nga Dardan Zhegrova – ku tregohet procesi i punës nga Ukimeri. Ukimeri thotë se kësisoj po e promovon këtë teknikë dhe do të donte që ajo të merrte vëmendjen e duhur, e të mos humbej.
“Përmes këtyre punëve, kam dasht me bo një analizë të kësaj
tradite, qysh ka qenë dhe qysh është sot ajo në kulturën tonë, dhe në kulturat
tjera. Çejzi ka ekzistuar në Babiloni, në Greqinë Antike, në Romë…. Te shqiptarët,
çejzi është përcaktu edhe me Kanunin e Skënderbeut, atë të Lekë Dukagjinit, pra
e ke pasë të caktume çka mundesh me qu në çejz. Më parë, është dashtë me pasë
shumëçka në çejz, ndërsa sot kohërat kanë ndryshu sepse mundesh me ble çkado që
ke nevojë pas martesës, e nuk ke nevojë me e pasë në arkën e çejzit” tregon
Ukimeri.
Të rralla janë gratë që sot janë në moshë dhe nuk kanë kaluar nëpër procedurën e çejzit. Dikush e sheh si traditë më primitive e dikush si mundësi të bukur kreativiteti, por çejzi ndër shqiptarë është dukuri që mbrohet me fanatizëm.
“Sot shumë gra e bojnë figurativisht çejzin, pra nëse nuk e
bojnë vet e porosisin. Për mua është një formë e ekspozitës, pasi gratë që e
punojnë vet, e kanë në fund mundësinë ta ekspozojnë atë para të tjerëve. Mendoj
se është mirë me vazhdu me bo tentene, me bo çejz, me qëndisë, këto janë
artizanate dhe duhet me u promovu e mbështetë” tregon tutje Ukimeri për
KultPlus.
Ekspozita e mbrëmshme është e dyta në këtë teknikë nga Ukimeri. Ajo thotë se së shpejti do të dalë me një vazhdimësi të projektit, ku do të parashihet edhe shitja e këtyre copëzve të bukura të punuara prej inspirimit të saj artistik. / KultPlus.com
Artpolis – Qendra për Art dhe Komunitet në kuadër të fushatës globale “Një miliard në këmbë” organizon vallëzimin tradicional në sheshin “Zahir Pajaziti” në orën 12:00, të përcjellur me muzikë nga DJ Lilac, shkruan KultPlus.
Artpolis
po ashtu në mbrojtje të të drejtave të grave dhe në mbështetje të fushatës bamirëse “Një Ditë e Valentinit për të gjithë” organizon
shfaqjen teatrale “Copë Copë”.
“Copë
Copë” do të prezantohet me datë 14
shkurt, 2019 në ora 19:00 në teatrin Oda në Prishtinë.
“Një
Ditë e Valentinit për të gjithë” e inicuar nga Blerta Avdili dhe Jeta Xhara
synon të mledh fonde në përkrahje të Qendrës për Mbrojtje të Grave dhe Fëmijëve
në Prishtinë. Në këtë rrjedhë, Artpolis prezanton shfaqjen “Copë Copë” bazuar
në ngjarje të vërteta të grave në Kosovë kur përfshihet tregimi i një gruaje,
mbijetuese e dhunës në familje, e cila është edhe performuese në skenë së
bashku me aktoret profesionale. Kjo grua e fortë, Bashkime Sulejmani, qysh në
2015 është kontaktuar nga Artpolis nga po e njejta Qendër për Mbrojtje të Grave
dhe Fëmijëve në Prishtinë për të treguar historinë e saj, për të ngritë zërin
për mirëqenien e saj e të djalit, e poashtu në përkrahje të të gjitha grave që
kanë përjetuar ngjarje të kësaj natyre.
Duke qenë se fondet e mledhura do të shkojnë për
Qendrën për Mbrojtje të Grave dhe Fëmijëve në Prishtinë, në kuadër të kampanjës bamirëse “Një Ditë e Valentinit
për të gjithë”, lëtë radhë Artpolis ka vendosur që shfaqja të prezantohet me pagesë (1 ose 3 €),
Shfaqja
“Copë copë” është punuar me regji të Zana Hoxha Krasniqit dhe me tekst të Blerta
Zeqiraj.
Performuese
të shfaqjes janë: Melihate Qena, Anisa Ismajli, Donikë Ahmeti, Qendresa
Kajtazi, Daniela Markaj, Qendresa Jashari dhe Bashkime Sulejmani.
Prezantimi i shfaqjes mbështetet nga UNFPA –Kosovë dhe organizata feministe në CFD – Zvicër./ KultPlus.com
Ka pak njerëz që arrijnë të rrëmbejnë zemrat dhe emocionet gjatë një shfaqjeje muzikore. Një nga këto është padyshim Solomia Lukyanets, e cila vetëm 13 vjeçe tregoi të gjithë talentin e saj dhe shkriu në një det lotësh si publikun ashtu edhe anëtarët e jurisë kur ajo filloi të këndojë.
Gjatë programit televiziv “The Voice Kids”, vajza nga
Ukraina, Solomia Lukyanets, doli në skenë dhe të gjithë mbetën të heshtur, të
etur për të gjetur këngën që do të luante, shkruan ShkodraNeës.
Pas një kohe, kur filloi muzika, të gjithë mbetën pa fjalë
sepse ishte një nga hitet më të mëdha të Andrea Bocelit, “Con te partirò”.
Është e mahnitshme se si një vajzë në këtë moshë mund të mbajë një zë kaq të madh. Interpretimi i saj ishte aq mbresëlënës sa edhe publiku dhe juria u mahnitën./ KultPlus.com
Do të jetë piktorja Zake Prelvukaj e ftuara e radhës e KultPlusit në ngjarjen ‘KultWoman me…’
Në ciklin e ngjarjeve, e katërta mbrëmje do të mbahet me Zake Prelvukajn.
Me datë 15 shkurt, e premte, në ora 17:00 në Qendrën Informative dhe Kulturore të Bashkimit Evropian në Prishtinë, Zakja vjen me tregimin e saj mbi jetën dhe artin e saj.
Zake Prelvukaj diplomoi për pikturë në vitin 1991 në Fakultetin e Arteve në Universitetin e Prishtinës në klasën e prof. Nysret Salihamixhiqit. Në vitin 1993 filloi punën si docente në lëndën pikturë monumentale. Në vitin 1997 magjistroi në lëndën e pikturës, në klasën e prof. Muslim Mulliqit. Në vitin 2000 mori klasën e pikturës, si profesor i asociuar.
Në vitin 2005 ajo morri Çmimin e Nëntorit në Maqedoni dhe më pas morri çmim edhe në Ekspozitën ‘Lule për Aleksandër Moisiun’.
Gjatë karrierës së saj të deritanishme ka ekspozita të
shumta personale dhe grupore. Ekspozitat personale në Kosovë i hapi kryesisht
në Prishtinë: Future X (2010), Mbroje natyrën në Parkun Gërmia (2004),
Sexhibition në Muzeun e Kosovës (2005), 12 hours-shoping centre-performative
(2004), Ghetto in Balkan në Hani i Dy Robertëve (2003), X-sat flasin – Arti i
rezistencës, Galeria Dodona (1998). Në Pejë ekspozoi në Kafe-Galerinë Evergrin
(1994) dhe Galeri Evropa (1996), ndërsa në Gjakovë në Neë Vision Gallery (2001)
Ejani me 15 shkurt ta dëgjoni tregimin e Zakes dhe ta takoni nga afër artisten.
‘KultWoman me…’ është ideuar nga KultPlus ndërsa është projekt në kuadër të ‘Kultura për Ndryshim’ nga Bashkimi Evropian.
Një tjetër shqiptare po lakohet nga kritika si një ndër zërat operistikë më të mirë në Evropë.
Sopranoja shqiptare Blerta Zhegu ka tërhequr vëmendjen e kritikës italiane. Ajo ka performuar këtë fundjavë, në skenën e Teatrit Goldoni në Itali ku interpretoi në rolin e Musettës, nga vepra operistike “La Boheme”.
Publiku italian e ka duartrokitur sopranon shqiptare, ndërsa teatrot italiane e kanë kërkuar menjëherë për bashkëpunime të tjera gjatë këtij kalendari artistik. “Duke qenë se kisha të bëja me një personazh shumë të njohur për publikun italian si ai i Musettës në “La Boheme” mu desh të evidentoja cilësi të tilla si eleganca, kokëfortësia apo sensualiteti që përbëjnë pikërisht sharmin e saj”, tregon sopranoja për një nga mediat italiane.
Zhegu është njohur fillimisht në Itali, ku jetoi dhe hodhi hapat e parë pas përfundimit të shkollës shqiptare, por prej tre vitesh ajo është bërë pjesë e skenave operistike në Francë, ku konsiderohet si një yll në ngjitje/a2news. /KultPlus.com
Sot u nda nga jeta intelektuali, gjuhëtari, albanologu, profesori dhe përfaqësuesi i shquar i brezit të intelektualëve të Kosovës, Idriz Ajeti, shkruan KultPlus.
Akademiku Idriz Ajeti i dha shumë Kosovës dhe vendit të tij,
me veprën shkencore, me veprimtarin e tij, me përfaqësimin e studimeve
shqiptare në hapësira kombëtare dhe ndërkombëtare dhe me angazhimet e tij të
shumta duke përfshirë këtu edhe ato në institucionet e pavarësimit të vendit,
si kryetari i Kuvendit të Kosovës në vitet e vështira, pas zgjedhjeve paralele
të vitit 1998.
Për të nderuar punën e tij të akumuluar ndër vite, dhjetëra
qytetarë ishin të pranishëm për të bërë homazhe, në mesin e tyre edhe figura të
shquara në Kosovë. Ajeti u konsiderua një mik dhe bashkëpunëtor i dashur nga
kryetari i Akademisë së Shkencave, Nexhat Daci, i cili edhe hapi mbledhjen
komemorative.
“Jemi krenar që aq gjatë e kemi pasur udhëheqës, kolegë dhe mik. Asnjëherë në asnjë periudhë, akademik Ajeti nuk e ka lëshuar rrugën e drejtësisë, rrugën kombëtare dhe intelektuale dhe e kemi pasur gjithmonë në përkrahje”, theksoi ai.
Idriz Ajeti themeloi katedrën e albanologjisë në Prishtinë, ku ligjëroi dhe u bë kreu i saj. Ishte dekan i Fakultetit të Filozofisë në Prishtinë, rektor i Universitetit të Prishtinës dhe themelues e drejtor i Seminarit për Gjuhë, Letërsi e Kulturë Shqiptare. Anëtar i Akademisë së Shkencave dhe të Arteve të Kosovës dhe kryetar i kësaj Akademie. Ai po ashtu drejtoi Konsultën Gjuhësore në Prishtinë dhe ishte njëri nga protagonistët e Kongresit të Drejtshkrimit në Tiranë.
Rëndësinë që pati Idriz Ajeti në studimet e gjuhës shqipe e theksoi edhe akademik Rexhep Ismajli i cili e konsideroi atë një nga studiuesit më të mëdhenj të historisë së gjuhës shqipe. Ismajli tutje tha se veprimtaria e akademikut Idriz Ajetit shtrihet në dy vija.
“Dy janë vijat themelore për portretit e madh të Idriz Ajetit.
Vija e veprimtarit të shquar për emancipimin e përgjithshëm të popullit të tij
dhe vija e dijetarit të shquar të botës shqiptare, studiuesit të njërës nga
shtyllat themeltare. Këto vija vijnë e pleksen në figurën madhore të dijës, kulturës
dhe emancipimit të përgjithshëm shqiptar të shekullit XX dhe të fillimit të
shekullit XXI. Shuarja e akademikut Idriz Ajeti është humbje e madhe për
familjen, miqtë, kolegët, komunitetin e albanologëve dhe për gjithë botën
shqiptare. Jemi krenarë që patëm fatin të jetonim dhe të bashkëpunonim me të për
një kohë kaq të gjatë”, tha ai duke theksuar se brezat e ri do kenë shumë për
të mësuar nga veprimtaria e akademikut Ajeti.
Të pranishmit në këtë mbledhje komemorative mbajtën një minutë heshtje për të nderuar akademikun Idriz Ajetin si dhe bënë homazhe para arkivolit të të ndjerit. Varrimi do të bëhet në varrezat e Prishtinës, në orën 15:30./ KultPlus.com
Koha, kjo monedhë e çmuar e jetës suaj, është e vetja që ju e keni në dorë dhe jeni ju ata të cilët mund të vendosni se si do ta shpenzoni. Pikërisht, kjo çështje e kohës që sot është problemi kryesor i secilit prej nesh, do të vijë e shtrirë në një dimension tjetër, shkruan KultPlus.
Është shfaqja “Andërr” që përmes Trupës së Baletit, do të shpalosë në mënyrë artistike rëndësinë e kohës duke dashur kështu të përcjellë një mesazh të fuqishëm, që koha e kaluar me njerëzit e dashur është më e çmuar se koha e humbur pas punës dhe materialit.
“Andërr” njëkohësisht është shfaqja e parë për këtë vit që
do të ngjisë në skenë Trupën e Baletit Kombëtar të Kosovës, ndërsa do të sjellë
balerinin Kreshnik Musolli në rolin e koreografit, rol ky me të cilin Kreshniku
po e sfidon vetën për herë të parë.
Në një konferencë për media të mbajtur sot në Teatrin Kombëtar
të Kosovës, balerini Sinan Kajtazi i cili tashmë është edhe në rolin e
ushtruesit të detyrës së drejtorit, bëri hapjen e konferencës ku u shpreh i
lumtur për punën që është bërë për këtë shfaqje duke uruar koreografin për
angazhimin e tij dhe gjithë trupën e baletit.
Por për të folur për këtë shfaqje e cila pritet të vijë
premierë nesër, fjalën e mori koreografi Kreshnik Musolli, i cili tregoi se kjo
shfaqje vjen me risi sa i përket muzikës dhe lojës sepse në këtë shfaqje përfshihet
muzika hip hop që për këtë institucion është diçka e re.
“Kjo shfaqje si temë kryesore ka kohën, në kuptimin që asnjë njëri nuk mund ta ndal, ta kontrollojë ose ta kthejë, e më së shumti që sot nuk po vlerësohet sa duhet koha. Ky është një realitet i hidhur, ku njeriu po duhet t’i mbajë dy apo tri puna për me arrit mi realizu kërkesat elementare jetësore dhe kjo është arsyeja që ja merr e gjithë kohën dhe nuk arrin të shpenzojë kohë me familje dhe njerëz të tjerë përreth”, është shprehur koreografi.
Në shfaqje prezantohet një komunitet që jetojnë në një lagje
më të varfër dhe pjesë e asaj lagje janë Seadi dhe Aulona një çift të cilët i
simbolizon dashuria magjike për njëri tjetrin, e të cilën dashuri mund ta quajmë
edhe Andërr, prandaj edhe shfaqja mban këtë titull dhe në të njëjtën kohë kjo
lidhet edhe me anën tjetër të shfaqjes, me lakminë që Seadi ka ndaj Sinanit, një
djalë i cili ka një bandë dhe jetojnë në një botë të kundërt me këtë që e përshkruam
më herët, ata kanë pasuri, autoritet, pushtet e gjithçka tjetër dhe kjo e shtynë
Seadin të lakmojë që të jetë si ta. Por pikërisht kjo lakmi bënë që të rrënohet
dashuria e Seadit dhe Aulonës.
Kjo shfaqje shpalosë më shumë aspektin psikologjik që ndodhë
në trurin e njërit prej protagonistëve të shfaqjes, Seadit, por krejt kjo është
e shprehur në mënyrë figurative dhe mbetet prej publikut që ta kuptojë.
“Një prej skenave që do ta veçojë është skena e quajtur “Karatina”
që është bazuar në sallën tonë të Baletit Kombëtar të Kosovës që veç sallë nuk
mund t’i themi, është një bodrum që nuk i ka as kushtet elementare për me qëndru
as 5 minuta në të e le më të ushtrohet aktivitet fizik. Përmes kësaj pjesë të
shfaqje, njëkohësisht paraqitet edhe gjendja e mjerueshme e këtij shteti, si ndotja
e ajrit, izolimi e shumë probleme të tjera.”, është shprehut tutje koreografi Musolli.
Kjo shfaqje që zgjatë 55 minuta, në mesin e balerinëve ka
edhe Aulonë Nuhiun e cila sot ishte e pranishme në konferencë. Balerina u
shpreh që ishte një kënaqësi e madhe të punojë me koreografin Kreshnik Musolli.
“Gjatë këtij një muaji prova, gjithçka ka shkuar shumë mirë
dhe koreografi është munduar që secilin rol ta përshtatë me balerinin. Ky rol është
shumë i rëndësishëm për mua dhe kjo shfaqje ka një mesazh shumë të mirë për
publikun, që secili të shfrytëzojë kohën me njerëzit që i ka afër dhe i do e jo
të vrapojë pas gjërave të tjera dhe besoj që gjithë publiku në fund të shfaqjes
do të kuptojë këtë mesazh”, u shpreh Nuhiu.
Ndërsa Sead Vuniqi pohoi që ngjarja e kësaj shfaqje i ka bërë
të gjithë të reflektojnë.
“Kjo shfaqje po ta kujton që familjen dhe njerëzit e dashur
shpesh i lëmë anash prej punëve e obligimeve të përditshme dhe shpresoj që kjo
shfaqje të ndikojë te publiku që të kuptojë që nuk është gjithçka vetëm puna”,
tha Vuniqi.
Gjithashtu edhe balerinët Muhamet Bikliqi dhe Jeta Musolli u
shprehën të kënaqur me gjithë procesin e punës dhe të bindur që kjo shfaqje do
të përcjellë tek publiku një mesazh shumë të rëndësishëm.
Premiera e shfaqjes “Andërr” vjen nesër, më 14 shkurt në ora 20:00. / KultPlus.com
U nda sot nga jeta Idriz Ajeti, babai i albanologjisë në Kosovë. Nderimi dhe kujtimi për të do të jenë të përhershëm sa të jetë shqipja.
Atta (rrënjë e moçme indoeuropiane) bashkon kuptimisht të dy gjinitë për të treguar amësinë dhe atësinë. Idriz Ajeti e kishte amë shqipen e atë atdheun. Vetë u bë babai i albanologjisë në Kosovë. Shembëlltyrë e studiuesit të historisë së shqipes dhe protagonist i shkëlqyeshëm i botës kombëtare në Kosovën moderne.
Një nga studiuesit më të mëdhenj të historisë së gjuhës shqipe, që studimet e veta i botoi në një seri monografish shkencore, të paraqitura edhe në nivel të librave universitarë e shkollorë, për t’i përhapur si ide e si rezultate për brezat e rinj.
Me statusin e fituar të Kreut të studimeve shqiptare te ne, ai doli përherë në krye. Ligjëroi në katedrën e albanologjisë në Beograd, themeloi katedrën e albanologjisë në Prishtinë, ku ligjëroi dhe u bë kreu i saj. U bë dekan i Fakultetit të Filozofisë në Prishtinë, rektor i Universitetit të Prishtinës, punonjës shkencor dhe drejtor i Institutit Albanologjik, themelues dhe drejtor i Seminarit për Gjuhë, Letërsi e Kulturë Shqiptare. Anëtar i Akademisë së Shkencave dhe të Arteve të Kosovës dhe kryetar i kësaj Akademie.
Punonjës i palodhur për standardizimin e shqipes. Drejtoi Konsultën Gjuhësore në Prishtinë dhe ishte njëri nga protagonistët e Kongresit të Drejtshkrimit në Tiranë.
Mentoroi studentë e studiues të shqipes, shqiptarë dhe të huaj. Të gjithë brezat e studentëve dhe të studiuesve të shqipes në Prishtinë janë nxënës të drejtpërdrejtë apo të ndërmjemë të tij. Idriz Ajeti ishte në ballë të veprimtarëve për të drejtat kombëtare të shqiptarëve në Kosovë. Si bashkëpunëtor i afërm i Ibrahim Rugovës, ai u bë një protagonist i lëvizjes pavarësiste të Kosovës. Ishte një nga autoritetet e mëdha të kësaj lëvizjeje dhe u zgjodh kryetar i Kuvendit të Republikës së Kosovës (1998).
Idriz Ajeti ka njohur thellë ligjërimin letrar dhe ligjërimin shkencor shqip. Ka pasur stil në ligjërimin e vet shkencor si dhe në reagimet e tij publike. Këtë e dëshmon gjuha e tij karakteristike, me fjalor dhe me sintaksë. Ka qenë e admirueshme sjellja e tij me moshatarët e vet dhe me brezat më të rinjë, me finesë e fisnikëri, por edhe me dashuri për të vërtetën. Idriz Ajeti e ka adhuruar Eqrem Çabejn si personalitet dhe si studiues të albanologjisë. Ai vetë ka qenë i çmuar dhe i nderuar lart nga Çabej për veprimtarinë e tij shkencore e kombëtare.
Ka qenë i admiruar nga studentët e tij, të cilëve u ka mësuar shkrimin e bukur të shqipes. E kanë lexuar ata, por i ka lexuar edhe ai me vëmendje të jashtëzakonshme.
Ka qenë një reagues i rreptë, konciz dhe i pakompromis kundër lajthitjeve dhe diletantizmit në fushën e studimeve shqiptare. Ka mbrojtur me përkushtim origjinën antike të shqipes në konferenca shkencore dhe në ballafaqime politike e nacionale. Është emblematike kjo mbrojtje e shqiptuar fuqishëm edhe në Beograd, në qerthullin e nacionalizmit agresiv serb kundër shqiptarëve. Reagim i bërë ky madje në tribunën e tyre politike. Idriz Ajeti do të vlerësohet dhe kujtohet sa herë të përmenden shqipja dhe shqiptarët.
Ministrja e Kulturës, Elva Margariti së bashku me kryetarin e bashkisë së Mirditēs, Ndrec Dedaj zhvilloi një dëgjesë publike me banorët e fshatit Katund i Vjetër duke folur për programin “100 Fshatrat” dhe mundësitë e zhvillimit përmes programit.
Ky program theksoi ministrja synon rilindjen rurale dhe kthimin tek njerëzit. Rezultatet e para kanë filluar me programet e mbështetjes nga AZHBR. Zona e Mirditës ka pritur 65 mijë vizitorë në sezonin turistik 2018, ndërsa kanë filluar të zhvillohen bujtinat e para.
Margariti theksoi rëndësinë e ideve dhe sugjerimeve nga banorët e Katundit të Vjetër, ku një nga itineraret e prekshme mbetet hapja e shtigjeve që lidhin fshatin me Velën, ndërsa theksoi se përmes programit IPARD II dhe Skemës së Mbështetjes Kombëtare, synojmë mbështetjen e fermerëve dhe sipërmarrësve, që duan të investojnë në sektorin rural.
Në zonën e Mirditës janë shenjuar rreth 400 shtigje turistike si rrallëkund në Shqipëri. /A.T.SH./ KultPlus.com
