Java Kulturore e Spanjës po sjell në Tiranë dhe në qytete të tjera të vendit aktivitete kulturore që përcjellin trashëgimi dhe autenticitetin e këtij vendi.

“Shqipëria mikpret Spanjën”, ka nisur aktivitetet që në 18 qershor ku gjatë këtyre ditëve qytetarët e Tiranës do të kenë mundësi të njihen më nga afër me artin, sportin e arkitekturën spanjolle.

Kryeministri Edi Rama publikoi sot në rrjetet sociale foto të aktiviteteve të zhvilluara në sheshin “Skënderbej”.

“Një shfaqje e veçantë, me energji e sekuenca gazmore ishte koreografia e grupit “Consequencies” në kryeqytet, pjesë e javëve kulturore ndërkombëtare”, u shpreh Rama.

Nën magjinë e hapave të flamengos, Java e Kulturës Spanjolle zbriti gjatë kësaj jave edhe në Kalanë e Gjirokastrës. ku artistët spanjollë sollën një spektakël të vërtetë ndërsa performuan vallëzimin tradicional spanjoll

Të parët që hapën këtë udhëtim më 25 prill ishin francezët, për të vijuar me Bashkimin Europian; më pas Shtetet e Bashkuara të Amerikës, Greqia, Italia, Izraeli, Spanja, Britania e Madhe, Suedia, Egjipti, Kina, Gjermania, Japonia, Austria, Turqia, Hungaria, Emiratet e Bashkuara Arabe, ndërsa do të përmbyllet me një festë, me rastin e Festave të Nëntorit me Kosovën.

Për 17 javë, Javët Kulturore Ndërkombëtare do të sjellin në vendin tonë një larmishmëri kulturash./ KultPlus.com