Sonte në orën 19:00 në Baden të Austrisë do të hapet ekspozitë personale nga Mentor Berisha në adresën `Theater am Steg, Johannesgasse 14, 2500 Baden`. Ekspozita do të qëndrojë e hapur nga e mërkura e deri të dielën.

“Solidariteti si Rezistencë” është cikli i punimeve të realizuara gjatë viteve të fundit në pikturë, dhe ka për fokus temën e sensibilizimit të grupeve të ndryshme sociale-kulturore, përgjatë viteve 90-ta në Kosovë.

Ky cikël përmban motive nga “Falja e Gjaqeve”, të shumë familjeve tradicionale shqiptare, aksion i pajtimit gjithëpopullor si akt kundër së keqes (gjakmarrja) i nisur nga një grup intelektualësh të udhëhequr nga prof. Anton Çeta, si dhe “Greva e Minatorëve të Minierës së Trepçës”, si akt solidar i punëtorëve shqiptarë kundër regjimit të atëhershëm, që rezultoi më vonë me largimin e tyre nga puna, duke thyer çfarëdo konvente ndërkombëtare mbi organizimin sindikal.

Kjo ekspozitë është mbështetur nga Ministria e Kulturës, Rinisë dhe Sportit./rtk/KultPlus.com