Galeria Kombëtare e Kosovës ka njoftuar se më datë 9 nëntor do të bëhet promovimi i librave “Belbëzimet e Universalitetit” dhe “Limitet e Reprezentimit”, me autorë Sezgin Boynik dhe Tevfik Rada, përcjell KultPlus.

Paneli i diskutimit në mes të autorëve dhe filozofit e teoricientit Shkëlzen Maliqi do të nisë në orën 18.00 – 19.00.

Ngjarja do të jetë e hapur për të gjithë pas diskutimit, në orën 19.00, ku në katin e dytë të galerisë do të mund të shihni të prezantuara një seri posterash silkscreen së bashku me shkëputje nga filmat që kryejnë funksionin e fotografive të çastit të historisë.

Palimpsestet e Historisë trajton reprezentimet filmike të Kosovës gjatë rënies së Jugosllavisë — të nacionalizmit, aparteidit, kryengritjeve, luftërave klasore dhe dhunës shtetërore. Projekti distilon rrëfimin e tij nga imazhet e viteve 1980-a, një kohë kur po lindnin kriza të shumta politike të ndërthurura me trazira sociale dhe po ndodhte komodifikimi i gjerë i formave kulturore. Qëllimi i projektit është ta përfytyrojë këtë histori përmes boshllëqeve të saj dhe t’i vë ato në lëvizje.

Ekspozita e trajton filmin si një mjet kërkimor me kapacitet për t’i zbuluar palimpsestet vizuale të kësaj periudhe historike. / KultPlus.com