Autor: KultPlus

Alberina Haxhijaj

Dita Ndërkombëtare e Muzeve e cila shënohet sot në gjithë botën, në më shumë se 35 mijë muze dhe në 157 vende të botës është shënuar edhe në Muzeun e Kosovës.

Për të shënuar këtë ditë të parët që vizituan muzeun ishin fëmijët të cilët mësuan më shumë për teknikat e kaligrafisë, ikonografisë dhe manuskripteve, diçka që është e veçantë për Kosovën pasi fëmijët jo çdo herë kanë mundësinë që të shohin sesi punohet me fleta të arit.

Alisa Gojani-Berisha nga Muzeu i Kosovës tha se ideja e promovimit të muzeve ka të bëjë me faktin që gjeneratat e reja të inspirohen me vlerat e trashëgimisë kulturore dhe ta përcjellin këtë edhe në gjeneratat tjera.

“Sivjet tema e festimit ka qenë “Muzetë e ndërlidhur, qasje të reja, publik i ri” dhe ne kemi shfrytëzuar rastin që pasi po dëshirojmë që të ndërrojmë konceptin e prezantimit në Muzeun e Kosovës, të sjellim aktivitete të ndryshme. Pra jo vetëm përmes ekspozitave por edhe përmes aktiviteteve në mënyrë që grupmoshat e ndryshme të mësojnë më shumë për trashëgiminë e Kosovës”, tha ajo për KultPlus.

Tutje Alisa tregon se aktivitetet të cilat po ndodhin sot janë të lidhura edhe me projektin “Qytetet e Paqes” e që udhëhiqet nga Elllen Frenk. Ajo është duke realizuar një pikturë e cila përmban hartën e Prishtinës mbi të cilën janë duke u bërë punime të cilat janë bazuar në punimet nga filigrani. Kështu sipas saj bazuar në faktin që projekti “Qytetet e Paqes” po zhvillohet në Muze, Muzeu ka vendosur që në këtë ditë të promovojë edukimin përmes paqes.

Ellen Frank tregoi për KultPlus se është shumë e lumtur që i është dhënë mundësia që të gjithë fëmijët dhe të rriturit që do të jenë sot pjesë e aktiviteteve të lënë gjurmët e tyre në punimin e saj.

“Sot jam shumë e lumtur pasintë gjithë që po marrin pjesë në aktivitetet e muzeut po ashtu po lënë gjurmët e tyre edhe në pikturën time. Ajo që më bëri sot më shumë të lumtur është fakti se pati shumë fëmijë dhe të gjithë ngjitën disa copëza ngjyrë argjendi e copëza ngjyrë ari në punimin tim”, u shpreh ajo për KultPlus.

Artistja Ellen Frank është duke bërë një punim të veçantë i cili shpalosë kulturën e Kosovës, punim i cili më pas do të prezantohet edhe në Amerikë në kuadër të projektit “Qytetet e Paqes”.

Sot gjatë gjithë ditës për të shënuar Ditën Ndërkombëtare të Muzeve në këtë muze në Prishtinë do të ketë aktivitete të ndryshme. / KultPlus.com

Bajram Mjeku / Facebook

Se ç’është toleranca fetare e dinjiteti njerëzor dhe si shkohet gjithë jeta në shërbim të atdheut, këtë e dëshmon më së miri ky burrë në foto, i cili si luftëtar i Rezistencës antikomuniste u largua nga Shqipëria në tetor të vitit 1948 dhe për të të gjallë, nuk e pa më asnjëherë Shqipërinë. Është Hamit Perolli, i cili u lind në Perollaj të Hasit të Shqipërisë në vitin 1913.
Hamit Perolli para se të largohej nga Shqipëria, ishte imam i xhamisë në vendlindjen e tij. Gjatë Luftës së Dytë Botërore, grupi i tij dhe ai i Mehmet Ali Bajraktarit nga Hasi luftuan kundër fashistëve italianë. Grupi ushtarak i Hamit Perollit më vonë iu bashkua Lëvizjes Fronti i Përbashkët, që udhëhiqej nga Gani Bej Kryeziu. Në këtë Front, Abaz Kupi përfaqësonte krahun e djathtë politik, Mustafa Gjinishi të majtin, ndërsa këshilltar politik ishte, Lazar Fundo.
Në vitin 1943, Gani Bej Kryeziu themeloi partinë Lidhja Katundare, e cila për mision kishte bashkimin e trojeve shqiptare. Në shtator të vitit 1944, komunistët rrethuan Grupin nacionalist dhe arrestuan Gani Kryeziun e Lazar Fundon. Duke dashur që t’i ikte luftës civile, Gani Kryeziu shpërndau grupin dhe u kthye në Gjakovë.
Nga fundi i Luftës së Dytë Botërore, jeta e familjes Perolli ishte e trishtë dhe dramatike. Kjo familje kaloi me vite të tëra në kampe përqëndrimi. Në fillim jetuan në Gjakovë, pastaj në Podujevë, Vushtrri, Kamenicë, më vonë në Vojvodinë dhe në Sisovec të Shumadisë. Në këtë të fundit, si pasojë e kushteve të rënda vdiq Skënderi, djali dy vjeç i Hamitit.

Familja e imam Hamit Perollit jetoi në ish-Jugosllavi deri në vitin 1954. Këtë vit migruan në Itali dhe qëndruan deri në vitin 1956. Më 6 nëntor të këtij viti, familja Perolli bashkë me atë të kryetarit të Lidhjes së Dytë të Prizrenit dhe ministrit të Punëve të Brendshme, Xhafer Deva nga Aeroporti i Romës fluturuan drejtë Shteteve të Bashkuara të Amerikës. Ateruan në Aeroportin John F. Kenedy, i cili atëbotë quhej Adlewild Airport. Bashkë me familjet Perolli e Deva udhëtonte edhe Said Kryeziu, vëllai i vogël i Gani Kryeziut më vonë sekretar i Komitetit Shqipnia e Lirë, pastaj Gaço Goga nga Korça, ndër më të shquarit e Lëvizjes së Legalitetit, si dhe familjet e Miftar Spahisë, Ramazan Qosjes, Mark Shalës nga Malësia e Shkodrës, i cili ipërkiste Bllokut Independent, si dhe disa familje tjera të shquara. Kishte edhe personalitete tjera të shquara, të cilët më vonë themeluan Komitetin Shqipnija e Lirë, si dhe funksionarë të katër partive kryesore politike si Balli Kombëtar, Legaliteti, Partia Katundare dhe Blloku. Tri partitë e para ishin anëtare të Komitetit Shqipnija e Lirë, ndërsa Blloku nuk bënte pjesë si parti. Udhëheqësit e Bllokut, Ismail Vërlaci e Ndue Gjomarkaj në Komitetin Kombëtar ishin pranuar si individ.
Familja e Hamit Perollit dhe ajo e ministrit Xhafer Deva në fillim u vendosën në Boston. Gani Perolli, djali i imam Hamit Perollit, i cili edhe sot jeton në moshë të shtyer në Nju Xhersi, kujton se baba i tij Hamit Perolli, të dielave vishej bukur dhe bashkë me të shkonin për t’i përcjellë meshat e ish-kryeministrit shqiptar dhe eruditit të shquar, peshkop Fan S. Noli. Ganiu kujton se kur e pyesja babën pse shkonim në meshë, pasi i takonin fesë muslimane, baba i tij Hamiti thoshte:
– E kishim gjashtë muaj Kryeministër të Shqipërisë dhe meriton respekt…
Gani Perolli kujton se gjatë një bisede me Fan Nolin në vitin 1956, kur ky i fundit e pyeti pse u larguan nga Shqipëria mbas çlirimit?, – baba u përgjigj:
– Unë Hirësi, si edhe ti jemi njerëz të fesë, por kur atdheu ynë u pushtua nga Italia fashiste, vura Kur’anin në raft dhe mora pushkën në dorë për të çliruar atdheun.
Hamit Perolli vazhdoi bisedën me Fan Nolin dhe i tha:
– Kur komunistët morën Qeverinë me forcë, nisën të na persekutojnë neve që luftuam kundër okupatorit nazifashist. Kur komunistët shqiptarë u lidhën me komunistët jugosllavë, ne kundërshtuam këtë bashkëpunim, pasi udhëheqja komuniste shqiptare braktisi Kosovën dhe e la nën mëshirën e komunistëve jugosllavë.
Ish-kryeministri shqiptar dhe kryepeshkopi i Kishës Autoqefale shqiptare, Fan Noli për disa qaste qëndroi mendueshëm e tha:
– Ne nuk i disponojmë këto informata!
Hamit Perolli ndërroi jetë në moshën 74 vjeçare nga një sulm në zemër më 3 janar të vitit 1987 në Shtetet e Bashkuara. Në komunitetin shqiptaro-amerikan, mbahet mend si burrë me dinjitet, i cili gëzonte respekt të madh dhe asnjëherë nuk pushoi së kërkuari të drejtat për Kosovën. Edhe sot mbahet mend si luftëtar i paepur e unikat. Përveç që ishte patriot dhe besimtar i devotshëm, ai e dinte përmendësh edhe Lahutën e Malcisë së Gjergj Fishtës.

Foto: Imam Hamit Perolli në Itali në vitin 1955

Është President i Serbisë, por do të donte ta njihte gjuhën shqipe.

Kështu të paktën thotë Aleksandër Vuçiq, në një intervistë për Klanin.

“Ndjehem fajtor që nuk di asnjë fjalë në gjuhën shqipe. Do të doja ta dija gjuhën tuaj dhe të jem më i edukuar, shpresoj se do të kem kohë të arrijë një gjë të tillë”, deklaron Vuçiq, njofton Klan Kosova.

Një intervistë ekskluzive ku po flitet për realitetin në raportet Serbi-Kosovë dhe mbi proceset tjera mes dy shteteve, Vuqiq ka thënë se do të donte të ishte më i edukuar në aspektin gjuhësor dhe se shpreson që do të ketë kohë t`ia arrijë synimit për të ditur më shumë për gjuhën shqipe.

Falë një marrëveshjeje të nënshkruar sot në Beograd nga ministri i Turizmit dhe Mjedisit, Blendi Klosi, do të mundësohet bashkëpunimi mes dy vendeve kryesisht në fushën e turizmit.

Promovimi i përbashkët mes Shqipërisë e Serbisë do të bëhet me anë të paketave të përbashkëta turistike, programeve arsimore, aftësimit profesional të personelit, si dhe studime dhe projekte kërkimore në fushën e turizmit.

Marrëveshja dypalëshe u nënshkrua nga ministri Klosi me homologun e tij serb të Tregtisë, Turizmit dhe Telekomunikacionit, Rasim Lajić.

“Së bashku me ministrin Lajic ne do të punojmë që ofertat të mos jenë vetëm shqiptare dhe serbe, por të jenë një bashkëpunim midis gjashtë institucioneve të turizmit të rajonit tonë, së bashku me Malin e Zi, Bosnje–Hercegovinën, Kosovën dhe Maqedoninë”, – tha ministri Klosi për median.

Nga ana e tij, ministri serb u shpreh se me produktin e përbashkët turistik shtohet mundësia që të tërheqin turistët, para se gjithash të tregjeve të treta. “Nuk ka rrugë më të mirë sesa turizmi dhe eksperiencat personale që mund të kenë njerëzit për të tejkaluar çdo pengesë”, – u shpreh Lajic. Pas takimit të dy ministrave u zhvillua edhe një takim midis tur operatorëve shqiptarë dhe serbë.

Gjatë qëndrimit në Beograd, ministri Klosi mori pjesë edhe në takimin e dytë të nivelit të lartë të samitit të pyjeve midis Kinës dhe vendeve të Europës Lindore. / KultPlus.com