E ndajmë sonte me lexuesin tonë një fotografi të përbashkët të Ismail Kadaresë e Bekim Fehmiut. Fotografia nuk është e rezolucionit të mirë, por në ndërkohë do ta tregojmë edhe historinë e kësaj fotografie dhe shpresojmë ta marrim edhe fotografinë ku dyshja e njohur shqiptare, njëri shkrimtar e tjetri aktor, shihen së bashku në një prej takimeve të tyre.
Fotografia është marrë nga libri i Fahri Musliut mbi Bekim Fehmiun.
Shekspiri po del që ka qenë i inspiruar diku për të shkruar punët e tij më gjeniale.
Një softuer për plagjiaturë ka gjetur se Shekspiri është inspiruar nga një dorëshkrim me titullin “A Brief Discourse Of Rebellion And Rebels” shkruar në vitin 1500 nga George North.
Zbulimi në fjalë është i mahnitshëm. Dennis McCarthy dhe June Schlueter, me softuerin e tyre, mendojnë se “Mbreti Lir”, “Makbethi” dhe “Rikardi III” janë bazuar në këtë dorëshkrim, shkruan KultPlus.
“Është një dorëshkrim të cilit Shekspiri i është kthyer nga koha në kohë, dhe i cili më pas ka ndikuar deri në një pikë tek skenat e Shekspirit, tek filozofia e dramave të tij” thotë McCarthy nga New Hampshire.
Martin Meisel, profesor i letërsisë dramatike në Columbia University,, thotë se është definitive se libri në fjalë ka qenë i pranishëm tek mendja e Shekspirit kur ky i fundit ka shkruar letërsinë e tij.
North, shembull, në librin e tij thotë se ata që e mendojnë veten si ‘të shëmtuar’ duhet të përpiqen të jenë të bukur përbrenda, për ta sfiduar natyrën. Ai përdorë fjalët “Bota”, “natyra”, “e drejtë”, “deformim” dhe “hije” në këtë pjesë, për të argumentuar.
Në fillimin e Rikardit III, tirani i zënë përdorë të njëjtat fjalë, por për të kundërtin veprim: pasi është i shëmtuar nga jashtë, të vazhdojë të jetë një shejtan.
Derisa studimi pritet të jepet më i detajuar për publikun, McCarthy, 53 vjeçar, punon në shtëpinë e tij dhe qëndron në këtë softuer për plagjiaturë deri në 12 orë në ditë. / KultPlus.com
“Njeriu që nuk lexon nuk e ka asnjë përparësi ndaj atij që s’mund të lexojë.”
“Unë kurrë nuk do të lejoj që shkollimi im të ndërhyjë ne edukimin tim.”
“Kurrë mos u’a trego të vërtetën atyre që s’janë të denjë për të.”
“Zoti e krijo luftën në mënyrë që amerikanët ta mësojnë gjeografinë.”
“Besnikëri ndaj atdheut gjithmonë. Besnikëri ndaj qeverisë vetëm atëherë kur e meriton.”
“Problemi nuk është të vdesësh për një mik, por te gjetja e një miku për të cilin do i’a vlente të vdisje.”
“Për ta marrë vlerën e plotë të kënaqësisë, juve ju duhet dikush me të cilin mund ta ndani atë.”
“Ekziston njëfarë sharmi tek e ndaluara që e bënë atë tejet të dëshirueshme.”
“Nëse votimi do të përbënte ndonjë dallim, ata nuk do na lejonin të votojm.”
“Fjala e duhur mund të jetë efektive, por kurrë asnjëherë asnjë fjalë s’ka qenë po aq efektive sa heshtja në kohën e duhur.”
“Është shumë më e lehtë ti mashtrosh njerëzit se sa ti bindësh që ata kanë qenë të mashtruar.”
“Njeriu që është pesimist para moshës 48 vjeçare, di tepër shumë; nëse pas kësaj moshe është optimist, ai di tepër pak.”
“Gjykimi i mirë është rezultat i përvojës dhe përvoja është rezultat i gjykimit të keq.”
“Burimi sekret i humorit nuk është kënaqësia por dhimbja; në parajsë humori nuk ekziston.”
– Mark Twain
Vdekja e bardhë / Sibel Halimi
Kur të vdes miku im
Mos shkruani epitaf
Asnjë fjalë mos ma thoni
Zbrazeni nga një
Për frymën time
Kohën e acartë
Kur të vdes miku im
Lotët rrëke mos i derdhni
Kujtoni kur ma rrihnit shpinën
Thuajse më mbani gjallë
Mos u vishni në zi me syze gri
Në të gjallë i doja ngjyrat e natyrën me krejt madhështinë
Miku im kur t`i ofroheni varrit
Kujtojeni kur cakërronim gotat për provimin e dhënë
Të keqen e shkelmuar…
Kur miku im ta hidhni një grusht dhé mbi mua
Copëza balte si rruaza
Qafore gushës sime do t`i bëhen
Miku im, kur secili në homazh para meje të jetë
Gajasuni
Të tillë ju kam dashtë prore
Im mik, mos u rreshtoni për të ardhë tek unë
Rreshtimet përherë luftuar i kam
Ofrohuni tok
Ngrini dolli për mua që ju dhashë një dromcë jete
Do të ngjallem në vitin e brishtë
I fundit që më largohet
lutem
Ma lërë një gotë verë dhe një fletë të bardhë
Kushedi, mund ta marrë ta shkruaj ndonjë fjalë
Edhe në amshim
Faleminderit, miku im!
Alberina Haxhijaj
Regjisori Erion Kame është në fazën finale për të sjellë filmin e tij të metrazhit të gjatë – “Një jetë me ty”. Për KultPlus regjisori ka treguar se në fillim të marsit stafi i ekipit filmik do të hyjë në xhirime dhe sipas tij në tetor do të jetë edhe premiera.
Regjisori Kame për KultPlus tregon se dëshiron që filmi me historinë e tij të jetë një atraksion për këtë vend. Dëshiron të tregojë vendet e bukura që i kemi e të cilat sipas tij janë mjaftë shumë, duke treguar edhe histori për njerëz “të bukur” me problematika si të gjithë qytetarët e botës. Sipas tij dëshira për të folur me gjuhën e filmit është një dëshirë që të gjithë e kemi thellë-thellë brenda vetes.
Filmi “Një jetë me ty” ngre një pyetje shumë të thjeshtë: Çfarë është martesa?
“Është odiseja 10 vjeçare e një çifti të martuar. Pra, që nga njohja e deri pas dhjetë vitesh më vonë. E veçanta është se e njëjta histori rrëfehet nga të dy bashkëshortët. Këndvështrimet e tyre janë krejtësisht të ndryshme. Po ashtu edhe qëndrimet. Në një moment të caktuar të filmit, marrëdhënia tyre rrezikohet seriozisht nga hyrja në jetën e tyre e një vajze e cila punon me burrin. Nëse ka një histori mes tyre, apo kjo është pjellë e fantazisë së gruas, por edhe e të shoqit, kjo është për t’u parë”, tregon regjisori, duke shtuar se të dy personazhet e duan shumë njëri-tjetrin dhe kjo ka shumë rëndësi në një marrëdhënie bashkëshortore. Por a është e mjaftueshme? A i përgjigjemi dot pyetjes: Çfarë është martesa?
Në rolin e bashkëshortit në film do të jetë aktori Dritan Arbana, i cili ka mbaruar studimet për aktor në Australi ku ka pasur shumë eksperienca dhe punë. Për publikun shqiptar ai njihet me projektin shqiptaro-australian “Bloodlands”, si producent dhe aktor. Në rolin e gruas do të jetë aktorja e teatrit dhe ekranit, Olta Gixhari.
“Ne kemi filluar provat me Tanin dhe Oltën dhe mendoj se çdo gjë ka shkuar shumë mirë. Presim në fundjavë edhe vajzën që do ti bashkëngjitet projektit tonë. Pjesa tjetër e aktorëve do të jenë emra shumë të njohur për publikun, por do të preferoja që ky i fundit të vinte vetë në kinema për t’i parë”, u shpreh ai duke vlerësuar lartë aktorët të cilët janë pjesë e ekipit të filmit.
Edhe pse buxheti i këtij filmi është shumë i kufizuar, ekipi i filmit po bën të gjitha përpjekjet që lokacionet të gjenden mes miqsh dhe dashamirësish. Deri në këtë moment atyre u janë gjendur shumë të tillë.
“Sigurisht që vendi kryesor i xhirimeve është një shtëpi. Kjo shtëpi është vënë në dispozicion nga Dritan Arbana që ka lënë banesën e tij për të zhvilluar xhirimet. Kjo është një sakrificë e jashtëzakonshme nga ana e tij, pasi vendet e xhirimit mund të krahasohen me një fushëbetejë. Por sakrifica të tilla bëjnë njerëz të cilët ia dinë vlerën artit dhe konkretisht filmit. Shtëpia e Tanit nuk është zgjedhur vetëm se s’kishim alternativë tjetër, por në radhë të parë është një shtëpi e ngrohtë, dinjitoze dhe përfaqësuese për çiftin e filmit”, u shpreh regjisori Kame, i cili kohë më parë pati dhënë komedinë më të njëjtin titull në Teatrin Kombëtar.
Komedia “Një Jetë Me Ty” ka qenë një projekt i Teatrit “A. Moisiu” të Durrësit me Ministrinë e Kulturës. Premiera është dhënë në 9 maj 2016 në Teatrin Kombëtar, kurse ka vazhduar deri në dhjetor 2017 në Korçë. Komedia ka pasur rreth 30 repriza.
“Çifti i aktorëve në skenë, por edhe në jetë, Romir Zalla dhe Suela Bako, janë ata që i dhanë jetë kësaj vepre për herë të parë. Po ashtu edhe aktorja Vilma Hodo e më pas Ina Gjonci. Ka qenë një eksperiencë e paharruar dhe kemi kaluar shumë mirë së bashku, dhe teatri ta jep këtë mundësi. Unë kujtoj çdo moment me ta”, u shpreh regjisori mbi komedinë duke shtuar se filmi ka shumë të përbashkëta me komedinë, por kësaj radhe gjuha e shprehjes dhe konceptimi është tjetër, pasi ai ka dëshirë që në film të flasë me nota më romantike dhe pak më “seriozisht”.
“Qëkur kam shkruar komedinë kam përdorur një gjuhë filmike. Megjithatë, tashmë mund të them që shumë prej dialogëve janë redaktuar, pasi filmi ta jep këtë mundësi. Diçka që mund të thuhet, shihet. Po ashtu janë shtuar karaktere dhe personazhe të tjerë të cilët do ta shtyjnë më përpara historinë në mënyrë më organike. Ajo që i bashkon do të jetë qëndrimi. Ky mbetet i pandryshuar. Pra, ideja për të mos dhënë mesazhe të drejtpërdrejta, por t’ia lëmë në dorë shikuesit, nëpërmjet qëndrimit tonë”, është shprehur regjisori Erion Kame.
Ai tregon se ka shumë arsye të cilat e kanë shtyrë të shndërrojë komedinë në një skenar për film të gjatë. Në radhë të parë për të ka qenë dëshira për të fiksuar në ekran një histori e cila nuk i përket vetëm regjisorit. E as shqiptarëve. Është një histori e cila i flet të gjithë shoqërisë botërore. Dhe jo vetëm sot.
“Një Jetë Me Ty” është projekt filmik i financuar nga Qendra Kombëtare e Kinematografisë, në kuadrin e filmave të pavarur – indipendentë, me shtëpi filmike “Black Box” e përfaqësuar nga Tan Kazazi dhe së fundmi filmit i është bashkëngjitur edhe shtëpia e mirënjohur filmike “Kinostudio Dardan” me përfaqësues Gent Prizreni. Skenari ka fituar në bordin e QKK-së që në fund të qershorit të vitit të kaluar. / KultPlus.com
“Është folur që do të bëhet një teatër dhe prapë nuk ka patur pikë transparence. Teatri bëhet një herë në 500 vjet. I takon shtetit shqiptar të ndërtojë një teatër, një teatër 500-600 vjeçar. “Turbina” ishte qesharake. Për teatër ajo nuk bën. Ajo është për ndonjë fushatë elektorale. Ne nuk duhet të lejojmë të prishet ai teatër pa marrë vesh se çdo bëhet në të”.
“Artisti i Popullit”, Robert Ndrenika ka kundërshtuar fortë amendimet e bëra në ligjin “Për artin dhe kulturën”.
Të organizuar në Sindikatën e Artistëve të Skenës dhe Ekranit, në një mbledhje të hapur për mediat, artistët diskutuan mbi zhvendosjen sipas tyre tërësisht jotransparente të trupës së Teatrit Kombëtar tek Teatri “Turbina” dhe njëkohësisht amendimet në ligj që ata mendojnë se “cënojnë rëndë” statusin e artistit.
Arben Derhemi: Teatri Kombëtar pas pesë vjetësh që ka ikur këtej të vijë për godinën e re e cila do të jetë një godinë e re, marramendëse, fantastike, por nuk dihet se si është pasi nuk ka projekt
Neritan Licaj: Personalisht mendoj se duhet ta ngremë presionin shumë lart nëpërmjet protestave, nëpërmjet shumë institucioneve, parlament, kryeministri, presidencë, të ftojmë shoqërinë cvile, pra të ngremë një valë të madhe kundër kësaj arrogance.
Genc Fuga: Këtu po demitizohet dëshira e lidërve të komunitetit tonë për tu shtrirë në rast se prishet teatri
Altin Basha: U sulmuan fillimisht institucionet që kishin ndërtuar artistët, me pak presion, me pak lobim, me pak mundësi, për të ardhur tek pika e fundit që është ligji. Me pak fjalë unë e kuptoj këtë si vrasje të pluralizmit kulturor.
Mehdi Malkaj : Ne nuk jemi skllevër, ne jemi vlerë kombëtare! Ata na marrin na nxjerrin përjashta. Pse na nxjerrin përjashta?
Dy këngëtarët kosovarë Besart Halimi dhe Aida Doci kanë rikthyer në skenë hitin “Kur u ndamë”.
Kjo këngë në versionin origjinal ishte lansuar në vitin 2009 nga Gili dhe Enis Potoku.
Tani kënga është risjellë nga dy yjet e reja dhe duket se është pritur mirë nga shikuesit. Kënga për pak orë në YouTube ka grumbulluar më shumë se 70 mijë klikime.
GUIDO CATALANO / Përktheu Beti Njuma
Kësisoj u gjendëm
në vendin e gabuar
në çastin e gabuar
ose ndoshta
ishte vendi i duhur
në çastin e gabuar,
me gjasë
ishte gjithçka e gabuar
vendi
dhe çasti.
Ishin të gabuara pemët dhe rrugët
ishte i gabuar qielli
dhe dyshemeja
ti ishte e gabuar
unë isha i gabuar.
Gabuam puthjen e parë
dhe të fundit
takimin e parë.
Orgazma e parë qe e gabuar
E gabuar qe e para herë që të çova në djall
Gabova që të thashë të dua
gabova që të thashë të urrej.
Në të vërtetë kurrë s’të thashë të urrej
E mendova
duke gabuar.
Por hëna atë natë gaboi që e plotë ish
dhe fytyrën ta ndriçoi
sytë e tu gabuan që ishin të bukur në përlotje
gabuan përqafimet
ato që s’u dhanë
ato që u dhanë
përqafimet e pakërkuara
përqafimet e shpresuara.
Kësisoj e humbëm njëri-tjetrin
dielli lindi në perëndim
kuajt hingëllinë
taksistët romanë u ofruan një xhiro falas
të gjithëve.
RAI e ka marrë vendimin: Ermal Meta do të vazhdojë garën në Sanremo.
Shqiptari, që garon në duet me Fabrizio Moro, ishte pezulluar pasi dyshohej për plagjiaturë.
Dueti këndon hitin: “Non mi avete fatto niente”.
Mediet italiane aluduan fillimisht për plagjiaturë, por kjo u hodh poshtë shumë shpejt falë reagimit të zv.drejtorit të Rai Uno, Claudio Fasulo.
“Nuk bëhet fjalë për plagjiaturë. Kjo sepse autori është i njëjti dhe rregullorja parashikon mundësinë e përdorimit të teksteve të autorëve të tjerë në një masë jo më të madhe sesa 30%. Në këtë mënyrë, kjo këngë ka parametrat e mjaftueshme për të qenë një këngë e re me të gjitha efektet”, do të shprehej fillimisht zëvendësdrejtori i Rai Uno, Claudio Fasulo.
Në lupën e “hetimit” ishte vënë pikërisht ngjashmëria në një pjesë të tekstit, me këngën “Silenzio” të Ambra Calvanit dhe Gabriele De Pascalit, që u prezantua në edicionin e “Sanremo”-s për të rinjtë, në vitin 2016.
Edhe kjo këngë kishte për autor Andrea Febo, i njëjti që ka shkruar edhe tekstin e asaj të Metës dhe Moros. / KultPlus.com
Po e sjellim sonte poezinë ‘U dogj filmi’ shkruar nga Adem Gashi, e cila mbrëmë u shpërblye me vendin e dytë në konkursin e poezisë ‘KultStrofa’ në Prishtinë, organizuar nga KultPlus.
u dogj filmi
athua është gjallë Habibi
ai asdjalasburri me mustaqe, brus
që ma pat huazuar aparatin e fotografimit
aparatin “Smena 8” të prodhimit rus
me kursimet e muajit bleva lentën
të mbyllur në kutizë si në shtëpi kërmilli
tridhjetegjashtë kuadrate, po kaq poza
tridhjetegjashtë
ç’më kujton kjo
ah po, tridhjetegjashtë shkronja
e vura në krah rripin e hollë
si një botë
sa e lehtë më vinte bota
në mbrëmje nëna ofshani si t’i kisha rënë mëkatit
ç’na bëre more bir, na i dalldise gratë e fshatit
njërës i shpërthente virgjëria në faqe e buzë
një vajze
ma bëj fshehtas, mos më shoh njeri
po si ta bëj kur kjo vrima këtu do diell
diellin do përballë pamjes
e vinin e vinin më radhë
dikur edhe pleqtë e rënduar të lagjes
duke shkelur mbi lodhjen e sedrën
m’u bënë përpara statuja e monumente
a diçka prej guri e dheu
a veç skelete
heu, po Habibi thua të jetë gjallë
kështu qe si sot, Habibi
“me të hyrë maji me të ikur prilli”
kur imazhet po hynin në kutizë
s’është se bota qe pa ngjyra
qe bardh e zi
sipas metodës së soc-realizmit
me ankth e prita dhe padurimin s’e fsheha
për terminin e foto-negativit
ku të bardhat do të nxinin, do të zbardhte e zeza
në studion “Foto – Zharku”
i pangjyrë dhe indiferent m’u shfaq dhe Zhivku:
është djegur filmi
lëre filmin që iku e më la
po kush më beson tani nga grari e lagjes –
ja edhe një maskara
një e di, mbase ajo që ma kërkonte fshehur
më beson vetëm ajo
që dielli i dashurisë e kishte dehur
thua të jetë gjallë tani Habibi
apo u dogj edhe ai si filmi
në krematorin e mistershëm të Zhivkos.
Shtetet e Bashkuara të Amerikës dhe Gjermania nuk po e përkrahin iniciativën e Austrisë që të kujtohet në përvjetorin e vdekjes, piktori Egon Schiele.
Austria, në 100 vjetorin e vdekjes së një prej piktorëve më të mirë të këtij vendi, po organizon jo vetëm në Austri por në mbarë botën ekspozita për të festuar punën e piktorit. Schiele, bashkë me Klimtin dhe Kokoschka, janë tre prej piktorëve më të njohur nga Austria.
Muzeu Leopold me datë 23 shkurt hapë ekspozitën ku vijnë punët dhe jeta e piktorit që vdiq në vitin 1918 nga një epidemi.
Megjithatë, disa galeri dhe muze nëpër Evropë po e refuzojnë këtë iniciativë. Egon për vite me radhë në Evropë është konsideruar si një piktor shumë erotik, shpesh edhe pornografik.
Punët e Schiele mund të shihen në Londër dhe në Berlin. Një pjesë e tyre janë të mbuluara, të censuruara. Punët artistike ‘nudo’ të Schiele, duket se po refuzohen pas 100 vitesh kur janë krijuar, shkruan KultPlus.
Schiele madje edhe ishte i burgosur dikur për shkak se punët e tij artistike u cilësuan nga regjimi si pornografike.
Zyra e Turizmit e Vjenës megjithatë do të vazhdojë që tërë vitin 2018-të të organizojë ekspozita të ndryshme në kujtim të piktorit të njohur. Parisi do të sjellë ekspozitë në fillim të tetorit të këtij viti, ndërsa më herët ekspozita do të vijnë në Boston dhe në Albertina Museum.
Disa prej punëve më të njohura të Schiele janë “Portret of Wally”, “Përqafimi”, “Death and the Maiden”, “Standing Girl”, “Harbor of Trieste” etj. / KultPlus.com
Filmi i parë i metrazhit të gjatë i Blerta Zeqirit ka filluar të shfaqet në kinematë kosovare më 1 shkurt dhe ka përmbyllur javën e parë të shfaqjeve me 1355 bileta të shitura nga vetëm 2 termine në ditë, duke ia kaluar kështu premierave botërore, si Den of Thieves dhe Maze Runner. Nga e premtja “Martesa” do të shfaqet në 3 termine ditore.
Mbrëmë Martesa ka përmbyllur javën e parë të shfaqjes në Kosovë, ku ka arritur të mbushë pothuajse plotësisht sallat e Cineplexx në të gjitha shfaqjet e saj, duke u bërë kështu filmi më i shikuar për javën e parë të shkurtit 2018.
“Edhe pse ishim të kënaqur me premierën botërore në Tallinn, me çmimet dhe me kritikat e jashtëzakonshme ndërkombëtare nga Variety.com dhe Cineuropa.org, nuk e kam pritur aspak këtë interesim nga publiku kosovar. Assesi nuk kam pritur që shikuesit të kenë nevojë të blejnë bileta shumë më herët për të gjetur vend, e gjithsesi jo të kthehen pa e parë filmin për shkak të shitjes së biletave”, tha Producenti i filmit Keka Kreshnik Berisha.
As regjisorja dhe skenaristja Blerta Zeqiri s’e ka pritur një jehonë të tillë: “Jam e kënaqur që një punë 5-vjeçare po arrihet të shikohet nga publiku kosovar, e i cili është edhe arsyeja pse bëjmë film e pse fondet e shtetit tonë shkojnë në kinematografi. Festivalet janë të rëndësishme, por as nuk i afrohen kënaqësisë dhe përmbushjes që e arrin një filmbërës kur publiku e pëlqen filmin. Shpresoj që produksionet e Kosovës gjithmonë të tejkalojnë pritjet me shitje dhe që në një të ardhme të afërt edhe filmi të mund të vetëfinancohet nga shitja e biletave.”
Filmi “Martesa” flet për një temë tabu në shoqërinë kosovare, për dashurinë e ndaluar në mes dy burrave. Megjithatë, “përkundër temës, që para disa vitesh mund të konsiderohej kontraverse, deri më tani reagimet në rrjetet sociale kanë qenë jashtzakonisht të mira, ku ka edhe të tillë që kanë treguar që e kanë parë filmin nga 2 herë. Për këtë arsye, nga dita e nesërme Martesa do të shfaqet në 3 termine në Cineplexx”, thotë producenti, bashkëskenaristi dhe montazheri i filmit, Keka.
Filmi që u përkrah financiarisht nga Qendra Kinematografike e Kosovës (QKK), flet për një trekëndësh dashurie pranë dhe gjatë një martese. Treshen e personazheve kryesore të filmit me skenar të Blerta Zeqirit dhe Keka Kreshnik Berishës e interpretojnë Alban Ukaj, Adriana Matoshi dhe Genc Salihu. Përveç QKK-së, “Martesa” u përkah edhe nga Qendra Kombëtare Kinematografike e Shqipërisë, si projekt me financim minoritar.
“Martesa” tashmë është në rrugëtim nëpër festivale të ndryshme botërore, me 6 festivale të konfirmuara vetëm në 2 muajt e ardhshëm, kurse nga marsi do të shfaqet edhe në kinematë e Tiranës.
Tallinn Black Nights Film Festival, ku më 28 nëntor bashkëprodhimi filmik Kosovë-Shqipëri e ka pasur edhe premierën botërore, bën pjesë në mesin e 15 festivaleve garues të kategorisë A, sipas Federatës Ndërkombëtare të Shoqatave të Producentëve të Filmit (FIAFP), ku filmi u shpërblye edhe me çmimin FIPRESCI – Çmimi i kritikës ndërkombëtare dhe Çmimin special të jurisë për ansamblin e aktorëve. / KultPlus.com
Alberina Haxhijaj, Gili Hoxhaj
Foto: Arben Llapashtica
Ekipi i Kultplusit është zhvendosur sonte në Hamam Bar për ti dhuruar Prishtinës një mbrëmje të poezisë, të rrethuar nga miq dhe nga shkrimtarë të cilët tash kanë një bagazh të madh letrar prapa vetes, duke mos harruar edhe shkrimtarët e rinj dhe duke ju dhuruar forcë dhe stimulim.
“Ne nuk e kemi pasur të përditshme postimin e poezisë dhe herën e parë kur kemi vendosur postimin e poezisë, ka qenë e rrezikshme, mirëpo ka dalë që poezia po pëlqehet dhe prej një poezie në ditë që e kemi pasur fillimisht, kemi vendosur që t’i postojmë dy deri në tri poezi gjatë ditës”, u shpreh Arbër Selmani, redaktor në KultPlus dhe moderator i natës letrare.
Kështu vargjet filluan të lundronin përreth të pranishmëve, në edicionin e dytë të konkursit të poezisë KULTSTROFA. Para shikuesve fillimisht jehuan vargjet e poezisë “Letër engjëllit tim mbrojtës” nga Ragip Syla duke dëshmuar forcën poetike të këtij konkursi. Sylaj ishte fitues i edicionit të parë të natës letrare të ‘Kultstrofës’.
Poezitë vazhduan njëra pas tjetrës duke bashkuar kështu poetët nga treva të ndryshme shqiptare dhe duke sjellë fjalë të shqiptuara në dialektin gegë por edhe toskë, madje edhe fjalë të vjetra të ruajtura nga shqiptarët të cilët jetojnë në mërgim, shkrimtarë të cilët përmes poezive rikthehen në vendlindjen e tyre.
Sibel Halimi u radhit në vendin e tretë në këtë edicion me “Vdekje e bardhë”, ndërsa Adem Gashi u radhit i dyti me poezinë “U dogj filmi”.
Emin Emini, Shkumbin Haxha, Sibel Halimi, Adem Gashi, Brikenë Ceraja Beka, Arlinda Guma, Manjola Brahaj, Liridon Mulaj, Erlind Sulko dhe Arjola Zadrima ishin dhjetëshja më e mirë e këtij edicioni.
Në mungesë të katër autorëve, aktorët Florist Bajgora dhe Ftesa Hazrolli lexuan poezitë e atyre që munguan fizikisht.
Erenestina Gjergji- Halili, kryetare e jurisë së edicionit të dytë të KultStrofës, tha se në këtë konkurs janë përpjekur të tregohen sa më objektiv duke mos i lexuar as emrat e konkurrentëve, gjatë vlerësimit.
“Nëse kishte ndonjë poezi për të cilën juria ishte 100 për qind dakord, pa asnjë debat, ishte poezia e Arjolës dhe për këtë meriton një duartrokitje”, u shpreh Erenestina, duke shtuar se ajo këto duartrokitje i meriton jo vetëm për sintezën poetike e atë gjuhësore por edhe për guximin për t’u shprehur në gegnisht.
E pra, ishte Arjola Zadrima autorja që fitoi vendin e parë këtë edicion të konkursit. Arjola e pati të pamundur të ishte e pranishme në natën letrare në Prishtinë, por çmimi do ti shkojë në shtëpinë ku ajo banon. Ajo morri lajmin me anë të rrjeteve sociale dhe nuk i mbajti lotët kur u lidh drejtpërdrejtë me momentin kur u shpall fituese.
Adil Olluri – anëtari tjetër i jurisë, çmoi lart faktin se aplikimet për këtë edicion erdhën nga treva të ndryshme, nga shqiptarë andej Drinit. Halil Matoshi – anëtar tjetër i jurisë, nuk ishte i pranishëm në natën e leximit shkaku i angazhimeve tjera personale.
Në fund të kësaj nate letrare për të cilën interesimi ishte i jashtëzakonshëm, Ardiana Pajaziti – kryeredaktore e KultPlus, falënderoi të gjithë lexuesit e KULTPLUS – gazetës së vetme shqiptare online për art dhe kulturë.
Sponsor gjeneral i këtij edicioni ka qenë ProCreditBank, ndërsa sponsorë të tjerë janë Hamam Jazz Bar, Rockuzinë dhe Hotel Nartel.
“Jam pajtuar” me vendimin e kryetarit të atëhershëm të LDK-së, Ibrahim Rugovës, për ndërtimin e Shtëpisë së Bardhë, që do të ishte e ngjashme me Shtëpinë e Bardhë të Josip Broz Titos në Dedinje të Beogradit, apo madje me Shtëpinë e Bardhë të SHBA-ve në Uashington!!!
Gjithashtu “jam pajtuar” me propozimin e kryetarit të dikurshëm të Kuvendit të Kosovës, Nexhat Dacit, për ndërtimin e Rezidencës madhështore në Gërmi për pritjen e delegacioneve të huaja dhe pushimet e zyrtarëve të lartë të Kosovës!!!
“Po pajtohem” tani me propozimet që u dhanë prej presidencës dhe prej qeverisë për ndërtimin e objekteve madhështore shtetërore: të Rezidencës presidenciale, të Rezidencës qeveritare, të Rezidencave ministrore, të Rezidencave të ndryshme Kuvendore e të disa rezidencave të tjera në 20 hektarë në Prishtinën e Re afër Hajvalisë!!!
Mbas të gjitha këtyre pajtimeve “u pajtova” që t’i çojmë në botën e jashtme të gjithë të rinjtë dhe të gjithë të pjekurit që s’kanë mbërrijtur vetë ende të shkojnë, domethënë u pajtova që t’i çojmë në botën e jashtme të gjithë ata që në Kosovë s’kanë me çka të jetojnë dhe të gjithë ata që jetojnë me 1.70 cent në ditë!
Më në fund “u pajtova” që politikën tonë shembullore për integrime euroatlantike ta dëshmojmë konkretisht jo duke sjellë Vlera evropiane në Kosovë, po duke çuar në Evropë pamjet e sulltanateve tona arkitekturore presidenciale, qeveritare e kuvendore!!!
Dhe kështu do dëshmojmë se jemi shteti më i zhvilluar, më i përparuar, më i pasur e më i kulturuar në kontinentin europian dhe në perëndim në përgjithësi.
Dhe kështu do të dëshmojmë se kemi kastën e politikanëve më të ditur, më qartpamës, me demokratë, më europianë, më amerikanë, më perëndimorë të merituar për saraje të tilla sulltanore!!!
Rexhep QOSJA
Sezoni i parë i The Voice of Albania, në vitin 2014-të, solli si anëtare të jurisë Alma Bektashin.
Këngëtarja e njohur shqiptare ishte anëtare jurie e këtij emisioni gjatë këtij sezoni, një emision ku zbuloheshin talente të reja.
Në një prej episodeve televizive, për të kujtuar Haki Misinin e grupit MAK, Alma Bektashi u ngjit në skenë për të kënduar “Moj e mira te pojata”, bashkë me Eugent Bushpepën.
Bushpepën po e sjellim në mendje edhe për përfaqësimin që do ti bëjë Shqipërinë në Eurovizion, në maj të këtij viti.
Ka katër vite qëkur në skenë dolën dyshja për të performuar këngën e njohur, ndërsa ne po e sjellim atë sot, sepse nuk bëhet asnjëherë monotone dhe e vjetër. / KultPlus.com
Mid’hat Frashëri i ka renditur disa konkluzione për shqiptarët, që edhe sot janë po aq aktuale sa dukur. Më poshtë mund t’i lexoni thëniet më të veçanta të tij… për shqiptarët!
Ja çfarë thotë Mit’hat Frashëri për shqiptarët:
1- Shqiptari prej natyre është kotësidashës, plot vanitet dhe egoizëm. Nuk i pëlqen kurrë të shohë dhe të njohë fajin dhe të metën e tij: i pëlqen kurdoherë të ngarkojë një tjetër.
2- Shqiptarët, megjithëse në pjesën më të madhe myslimanë, nuk e kanë konsideruar veten kurrë turq. Në të kundërtën, ata kishin një nocion të qartë për individualitetin e tyre dhe një hendek i thellë i pengonte ata të ngatërroheshin me racën e pushtuesve.
3- Kur merr një detyrë, ki disiplinë e durim. Shqiptarin e ka prishur mungesa e disiplinës dhe zjarri i padurimit
4- Shqiptarin e ka prishur mosbindja dhe jo bindja. Nis ti më parë të japësh shembullin e bindjes jo të verbër.
5- Hiqe veten si pak të mençur dhe pak të ditur. Mendjemadhësia na ka çmendur gjer më sot.
6- Duhet të kemi kurajo të themi të vërtetën, të bardhës t’i themi të bardhë dhe të zezës – të zezë.
7- Mos e qorto dhe mos e shaj shqiptarin për fajin që ka bërë, se ajo është mënyra më e fortë që ta bësh të këmbëngulë në atë faj. Merre me të mirë dhe shiko ta bindësh, pa pasur as pamjen e të dhënit këshillë.
8- Shqiptari, duke mos qenë i mësuar me jetë politike, dua të them, duke mos pasur gjer më sot shtet, qeveri dhe independencë, s’ka kuptuar dot akoma barrën, detyrat dhe përgjegjësitë që rrjedhin nga një jetë indipendente.
9- Patrikularizma, lokalizma dhe ekskluzivizma tek shqiptari rrëfehen me atë mani që ka secilido të marrë emrin e fshatit ose të qytetit si emër familjeje. Kur piqen dy shqiptarë, pas gëzimit të parë, pyetja esenciale është: nga të kemi zotëri?
10 – Shumë herë ideali për shqiptarin është të qenët i zoti, me çdo mënyrë që të jetë. Pa dyshim, duke pasur horizontin të ngushtë, nuk mund të kërkojë veç sukseset e lehta.
11- Vetëm një proverb të mirë di: ”Trimi i mirë me shokë shumë”. Por kur mendoj fjalën e Ali Pashës: dy shqiptarë janë shumë! Atëherë kam dëshirë ta kthej proverbin: ”Trimi i mirë me shokë…pak!”
12 – Shpëtimi i Shqipërisë do të vijë me anë të vetes tonë.
13 – Mos u hidhëro po të shkoj tjetri para, edhe pse nuk ndenje dot në krye. Zilia na ka lënë të panderuar.
14 – Shpesh herë zemërimi ynë vjen jo se kemi të drejtë, po se kemi faj dhe na vjen ligsht që na e shohin të tjerët.
15 – Dhembja më e madhe është pikëllimi i brendshëm, jo ai që rrëfehet.
Këngëtari shqiptar Ermal Meta e ka nisur me këmbë të mbarë pjesëmarrjen e tij në Sanremo 2018.
Ermal Meta mbrëmë, bashkë me Fabrizio Moro, në fund të natës së parë të Sanremo 2018 – festivalit më prestigjioz të muzikës në Itali, kanë përfunduar në mesin e shtatë këngëve më të votuara nga juria.
Ky megjithatë është votimi i vetëm një jurie profesionale.
Ermal Meta mbrëmë ka kënduar së bashku me Moro këngën “Non mi avete fatto niente”, ndërsa shikuesit e Sanremos, që janë miliona të tillë, e kanë kritikuar pozitivisht këngën në fjalë.
Në fund të natës, Meta dhe Moro janë radhitur në shtatëshen më të votuar, krahas emrave si Nina Zilli dhe Annalisa, këngëtare këto të njohura në Itali, shkruan KultPlus.
Mbetet të shihet në netët në vazhdim se si do të ecë ky konkurrim, por është e sigurt se Ermal Meta mund të jetë këtë vit një prej favoritëve kryesorë për të fituar Sanremon.
Sanremo vazhdon sonte natën e dytë, deri në natën e pestë kur mbahet edhe finalja e festivalit. / KultPlus.com
Poezi e shkruar nga Hajnrih Hajne
Më je betuar, deri në varr,
Me magjinë tënde më ke folur
Se do më duash tërë zjarr,
Po prapë mbetem i pangopur.
Gojën, te fytyra ime e ver,
Fryma jonë s’ka të sosur
Shpirtin tënd, do ta pi krejt
Të vdekshmit janë të pangopur.
“Vend i mjerë, trembet kur sheh veten/ E kishim nënë dhe na u bë varr!/Ku s’qesh veç buza e ndonjë të marri.” Këto rreshta të Makbethit shprehin forcën e kësaj tragjedie që vijon të vendoset në skenë prej kaq vitesh. Aktori Neritan Liçaj që ka rolin kryesor në veprën që do të ngjitet në skenën e Teatrit Kombëtar së shpejti, duket i gjithi i shnëdrruar në rol. Vepra do të vijë nën regjinë e, Kled Kapexhiu I cili pritet të sjell një tronditje shekspiriane në skenën shqiptare. Aktorët e përzgjedhur janë disa nga emrat më të njohur të botës së aktrimit, ndërsa mësohet se rolet kryesore i janë besuar Luli Bitrit, si Ledi Makbeth dhe Indrit Çobanit, në rolin e Makbethit.
Të tjerë artistë që do të ngjiten në skenë për të interpretuar janë edhe Arben Derhemi, Neritan Liçaj, Laert Vasili, Suela Bako, Egla Ceno, Klodiana Keco etj. Stafi realizues mbart në vetvete figura po aq të njohura të fushës së krijimtarisë në Shqipëri: skenografia do të realizohet nga Genc Shkodrani, kostumografia dhe maskat nga Gerta Oparaku, realizimi i kostumeve mban emrin e Enada At’Nikollës, dhe muzika do të realizohet nga Bled Boraku.
Vepra pritet ta ketë premierën më 24 shkurt. “Mua më ka pëlqyer përqendrimi që bën Shekspiri tek personazhi kryesor, tek tronditja e personazhit. Te stërmundimi, sfilitja, drama dhe tragjedia personale. Pastaj i kam dhënë dhe një drejtim se si zhvillohet, në çfarë rrethane ndodh kjo tragjedi, ku ky vërtetë është vrasës por dhe ata që vijnë më mbrapa janë po sërish vrasës”, është shprehur Kapexhiu.
Makbethi është një ndër tragjeditë e Shekpirit ku paraqitet lufta e përgjakshme për pushtet në Skoci gjatë shekullit XI. Makbethi është një gjeneral në ushtrinë e mbretit dhe një ditë krejt papritur ai ndeshet me një magjistare. Magjistarja parashikon fatin e tij dhe i tregon se një ditë ai do të bëhej mbret, por se nuk e dinte se ku. Pas këtij parashikimi ai nuk resht së menduari se një ditë do të bëhej mbret, këtë gjë ai ia tregon dhe të shoqes, e cila tepër ambicioze dhe gjakftohtë e bind Makbethin që të vrasë mbretin e Skocisë.
Në fillim të veprës kemi një gjakftohtësi nga të dyja palët, por Makbethi kishte vrarë disa në fushën e betejës, por ata kanë qenë armiq dhe ai nuk ka vrarë kurre në përfitim të tij, por vetëm në shërbim të mbretit.
Zonja Makbeth, pa u menduar e bind Makbethin se gjëja më e mirë për t’u bërë ishte vrasja e mbretit dhe më pas ai do të merrte fronin. Ajo shprehet në mënyrën më mizore, duke thënë se n.q.s mbreti nuk do t’i ngjante të atit, ajo do ta vriste vetë. Por gjatë skenës së krimit, autori ka dhënë një skenë rëqethëse dhe tregon dobësinë e Makbethit. Por edhe pas kryerjes së krimit, Makbethi nuk arrin të jetë i lumtur, sepse këtë gjë ia pengon ndërgjegjja e tij, e cila nuk e lë të qetë nga ndjenja e fajit. Gjatë veprës jepet edhe dobësimi i karakterit të zonjës Makbeth. Ajo gjithashtu torturohet nga vetë ndërgjegjja e saj për krimin që shtyu të shoqin të kryente, i cili në një çast dobësimi kish pranuar ta kyente. Dhe Makbethi vdes.
Aktori dhe producenti shqiptar, Agron Sokoli, është ftuar në jurinë e festivalit të filmit Global Impact (GIFFA).
Ai është ftuar në rolin e anëtarit të jurisë për t’i dhënë çmimet e këtij festivali.
Në konfirmimin e prezencës së tij ai cilësohet si legjendar nga ky festival botëror.
“Me gjithë zemër mirëpresim aktorin legjendar dhe producentin e njohur të filmit në industrinë evropiane, Agron Sokoli, në jurinë e GIFFA 2018”, shkruan në konfirmimin zyrtar të festivalit të madh botëror.
Agroni njihet dikur si një nga aktorët e komedisë “Stupcat” e më vonë edhe si producent.
Sokoli është edhe një nga themeluesit e një prej festivaleve më të mëdha në vend, HardhFest. / KultPlus.com
Ish presidentja e vendit, Atifete Jahjaga, sot i ka dhuruar 100 euro për shitjen e banerit me fotografinë e saj.
Jahjaga, me të kuptuar se baneri me figurën e saj në MIQT PUB në kryeqytet do të dalë në ankand dhe të hollat do të dërgohen për bamirësi, ka dhuruar këtë shumë të hollash.
Lajmin e ka konfirmuar për KultPlus Dardan Ibrahimi nga MIQT PUB.
“Kur të shitet baneri, i shtohen edhe 100 euro të donacionit simbolik në fjalë” tregon Dardan Ibrahimi.
Baneri e tregon Jahjagën me një armë në dorë, dhe ka qenë i famshëm në MIQT PUB.
Baneri është i vendosur kah toaleti, ndërsa në të shkruan “Laj duar, Zana!”. / KultPlus.com
Këngëtarja Rita Ora gjatë javës së fundit ka qenë e zënë duke promovuar këngën e re “For You” në bashkëpunim me Liam Payne.
As të reshurat e borës sot nuk e kanë ndalur këngëtaren me prejardhje nga Kosova që të shfaqë stilin e saj të veçantë të modës.
27-vjeçarja mori vëmendjen në Paris kur u shfaq me një fustan të kuq të valëzuar, të cilin e kombinoi me një palë take ngjyrë kafeje të çelët.
Vokalisti Ergin Oda, me rastin e dhjetëvjetorit të pavarësisë së Kosovës, do të realizojë një koncert me bendin që përbëhet nga instrumentistët më të dalluar shqiptarë në Amerikë, shkruan KultPlus.
Oda do të shoqërohet nga bendi i përbërë prej Lekë Salihut në piano, Taulant Mehmeti në bass, Jeta Hyseni në kitarë, Igli Tuga në klarinetë dhe Faton Kaja në timpane.
Koncerti titullohet “O vendi im”, ndërsa për publikun atje do të vijnë këngë arbëreshe, këngë të Shqipërisë së Jugut dhe këngë të dy këngëtarëve të mëdhenj, Muharrem Qenës e Nexhmije Pagarushës.
Vokalisti Ergin Oda, kohë më parë ka sjellë një interpretim të mahnitshëm të ‘Bring Him Home’ të Les Misérables, në Metropolitan Room në New York.
Kjo pjesë e kënduar nga vokalisti shqiptar, konsiderohet si një nga pjesët më të vështirat të arieve Broadway pasi që kërkon kontroll të fortë të tingullit. KultPlus ju sjellë një video nga koncerti i tij recital, “Ergin Oda Show”, që është mbajtur kohë më parë ndërsa kjo shfaqje u ka rezistuar shfaqjeve më të shitura dhe më të kërkuara Broadway të të gjitha kohërave.
Ky koncert do të mbahet më 17 shkurt ne Riverdale, në New York. Ky koncert i kushtohet Pavarësisë së Kosovës, dhe u dedikohet të gjithë banorëve shqiptarë të New Yorkut. / KultPlus.com
Aktorja e madhe Tinka Kurti është në zi, pasi ditën e djeshme u nda nga jeta djali i saj i vetëm, i cili jetonte me familjen në Kanada.
Kur e madhja Tinka Kurti festonte 85-vjetorin e lindjes, në një aktivitet të zhvilluar më datë 17 dhjetor në Shkodër në teatrin “Migjeni”, djali i saj Zef Kurti i dërgonte një video-mesazh surprizë të ëmës, ku i thoshte:
“Nana ime të dua shumë!” Me të dëgjuar këto fjalë, Tinka shpërtheu në lot. Gazeta Shqiptare po sjell më poshtë fotot e asaj dite…
