Dokumentari ‘Zoti i Shpisë’ që trajton traditat shqiptare, vjen në DokuFest (VIDEO)

27 Korrik, 2017 - 2:30 pm

Ishin librat e Edi Durhamit ato që shërbyen si pikënisje për krijimin e filmit dokumentar “Zoti i Shtëpisë”, i cili ngërthen në vete tradita që përshkojnë familjet shqiptare, tradita këto që ende mbesin si një enigmë e pazgjidhur në shoqëritë tona, shkruan KultPlus.

‘Zoti i Shpisë’, dokumentar në të cilin u arrit të gërshetohet tradita shekullore shqiptare, mori petkun e realizimit të tij nga regjisorja holandeze, Danielle Bremer. Në pamundësi që të flasim me vetë regjisoren, KultPlus, realizoi një intervistë të shkurtër me producentin e filmit Edon Rizvanolli.

Ai, tregoi për KultPlus, më konkretisht se çfarë trajton ky film dokumentar.

‘Filmi ka trajton vështirësitë e gruas në shoqërinë shqiptare, për shkak të traditave sipas të cilave meshkujt janë atë që dominojnë në shoqëri. Filmi sjellë historinë e një gruaje kosovare, e cila në moshë 13 vjeçe kishte ikur nga shtëpia e saj, pasi babai i saj tenton të ia ndërkrejë shkollimin. Synimi që të shkollohej e mbajti atë larg pragut të shtëpisë, ngase ekzistonte frika se po të kthehej do të mbytej nga babai i saj, i cili kundërshtonte shkollimin e saj’, pohoi Rizvanolli.

Është edicioni i 16-të i festivalit ndërkombëtar të Filmit Dokumentar dhe të Shkurtër, DokuFest , ai që do të shërbejë si pasqyrë për shfaqjen e këtij filmi.

Producenti i këtij filmi, Edon Rizvanolli tutje për KultPlus tregoi se filmi ‘Zoti i Shpisë’, do të shfaqet edhe në festivale tjera, ngase trajton një temë mjaft të rëndësishme.

Xhirimet për këtë film janë bërë në Bresana, Pobergj e Dragash/ KultPlus.com

Të fundit

Të ngjajshme