Bunkerët shqiptarë në syrin e fotografit britanik

24 Korrik, 2019 - 2:00 pm

Deri në 750,000 bunkerë ushtarakë janë ndërtuar në Shqipëri gjatë periudhës së regjimin komunist. Ata u ngritën nga diktatori Enver Hoxha, i cili pas Luftës së Dytë Botërore besonte se armiqtë mund t’i shpallnin luftë, por që vendi nuk u sulmua kurrë.

Por çfarë po ndodh sot me “mburojat e luftës”?

Fotograf britanik Robert Hackman ka fotografuar plot 250 bunkerë gjatë udhëtimit të tij nëpër Shqipëri. Ai ka botuar një libër për bunkerët dhe e përshkruan si “dokumenti i triumfit të popullit mbi shtypjen”.

“Doja të bëja një shënim për këtë kapitull kalimtar të historisë shqiptare, për të bërë të njohur jo vetëm bunkerët, por edhe popullin shqiptar dhe vendin e tyre”, thotë ai.

Gjatë udhëtimit të tij në Shqipëri ai vuri re se disa bunkerë pas rënien së komunizmit janë shkatërruar, disa të tjerë janë zhvendosur nga pronarët e tokave, ndërsa disa shfrytëzohen për stalla e shumë pak për turizëm.

Por ndryshe nga shumica e shqiptarëve që nuk dua ta kujtojnë atë periudhë të vështirë, fotografi britanik ka një mendim tjetër. Ai në librin e tij shkruan se bunkerët duhej të ishin ruajtur pasi mund të ishin një potencial i madh për turizmin nëse shfrytëzoheshin në mënyrën e duhur. /KultPlus.com

Të ngjajshme