Sot më 14 prill në Ditën Memoriale e të Mbijetuarve të Dhunës Seksuale gjatë Luftës së Fundit në Kosovë, QKRMT organizoi konferencë për shtyp.

Drejtorja ekzekutive e QKRMT-së, Feride Rushiti foli për rëndësinë e kësaj dite në krijimin e një klime më të përshtatshme ku të mbijetuarit e dhunës seksuale gjatë luftës të kenë qasje në drejtësi, shërim dhe rehabilitim.

Ajo, po ashtu, foli për kampanjën e 14 prillit të cilës po i bashkohen figura me rëndësi botërore si Dr. Denis Mukwege – fitues i Çmimit Nobel për Paqe, aktivistë botërore të të drejtave të njeriut, Presidentja Osmani, kryekuvendari Konjufca, kryeministri Kurti , ministra, deputet, aktivistë të shoqërisë civile, njerëz të kulturës dhe artit.

“Historia e re e Kosovës të shkruhet me këtë plagë të luftës. Fushata për shënimin e 14 prillit po mbështetet nga figura merenome botërore”, është shprehur Rushiti.

Të mbijetuarat Vasfije Krasniqi Goodman dhe Shyrete Tahiri Sulimani, gjatë prononcimit u shprehën se përkundër që kjo ditë është e mërzitshme dhe e rëndë, kjo ditë është edhe ditë guximit dhe mbështetja duhet të jetë e vazhdueshme ngaqë lufta nuk mund të harrohet./KultPlus.com