Një hetim i BBC-së mbi përhapjen e përmbajtjes së krijuar nga AI (“AI slop”) ka zbuluar se përdorues nga vende si Pakistani po postojnë imazhe të rreme që paraqiten si skena nga kampet e përqendrimit të Holokaustit, veçanërisht Auschwitz, për të gjeneruar klikime dhe fitime në Facebook.

Imazhe të rreme të viktimave të supozuara, si një fëmijë që fshihet nën dysheme apo një foshnjë e braktisur pranë shinave të trenit. Këto postime shpesh vijnë me histori të trilluara dhe janë pëlqyer dhe shpërndarë me dhjetëra mijëra herë.

Përfaqësues të memorialit të Auschwitz dhe të organizatave për kujtesën e Holokaustit e quajnë këtë praktikë “lojë emocionale” të rrezikshme, që përdhos kujtimin e viktimave dhe trondit të mbijetuarit dhe familjarët.

Këta krijues përmbajtjeje shpesh operojnë nga vende si Pakistani, India, Vietnami, Tajlanda dhe Nigeria. Ata shfrytëzojnë programin e monetizimit të Meta-s (CM), ku postimet me angazhim të lartë mund të gjenerojnë të ardhura. Një faqe me rreth 300,000 ndjekës mund të fitojë rreth 1,000 dollarë në muaj, sidomos nëse përmbajtja shënjestron audiencë nga vendet perëndimore.

Shumë nga këto faqe kanë ndryshuar emra dhe identitet për të fituar ndjekës, për shembull, janë paraqitur si faqe të zjarrfikësve amerikanë, biznese apo influencues të rremë.

Pas kontaktit nga BBC dhe institucione si Auschwitz Memorial, disa nga faqet dhe grupet u hoqën. Megjithatë, Meta tha se përmbajtja vetë nuk shkelte politikat e saj për përmbajtje, por faqet u hoqën për shkak të shkeljes së rregullave për sjellje të pasinqertë dhe mashtruese.

Ekspertët paralajmërojnë se përdorimi i AI për të krijuar histori të rreme mbi Holokaustin mund të dëmtojë kujtesën historike dhe të nxisë dyshime për ngjarje reale, një zhvillim veçanërisht shqetësues tani që të mbijetuarit e fundit po largohen nga jeta./BBC/KultPlus.com