Kevin Spacey ka pasur paraqitjen e tij të parë në publik pas një pauze pothuajse dyvjeçare nga karriera për shkak të betejës gjyqësore lidhur me akuzat për sulme seksuale ndaj një 18-vjeçari.

Pasi që muajin e kaluar u lirua nga akuzat duke shmangur një dënim të mundshëm prej pesë vjet burg, fituesi i dyfishtë i Oscarit iu kthye humorit të tij origjinal.

Duke u shfaqur para muzeut arkeologjik Palazzo Massimo alle Terme në Romë, ai para gazetarëve dhe publikut e recitoi poemën “Boxer”, të Gabriele Tinti, e cila flet për një boksier i cili vuan për humbjen e karrierës së tij dikur të famshme.

Një varg në poemë thotë: “Sa më të prekshëm që jeni, aq më të mëdhenj jeni. Më shfrytëzuan për këtë argëtim, u ushqyen me gjëra të dyshimta. Jeta përfundoi në çast”.

Ndër të pranishmit ishte Tinti, i cili e falënderoi Spaceyn për leximin e poezisë së tij nëntë-minutëshe.

Është e qartë se aktori dëshironte t’ia jepte një mesazh të fortë kujtdo që nuk besonte në mohimet e tij për të gjitha akuzat e abuzimit seksual.

T’ju rikujtojmë, Spacey u lirua pasi që djaloshi për të cilin po pretendohej se e kishte dhunuar nuk pranoi të dëshmonte. Ai duhej të siguronte prova thelbësore në gjykatë, përkatësisht telefonin e tij mobil përmes të cilit i kishte dërguar mesazhe dhe klipe të shkurtra të dashurës së tij gjatë sulmit, por tha në gjykatë se nuk e dinte se ku ishte telefoni. Kështu situata u zhvillua në favor të aktorit. /KultPlus.com