Krasniqi: Ndikimi i televizionit i madh, por i sfiduar nga portalet

21 Nëntor, 2019 - 7:45 pm

Asambleja e Përgjithshme e OKB-së, shpalli Ditën e Televizionit me 21 nëntor 1996, e cila i ka bërë bashkë për herë të parë institucionet kryesore të industrisë mediale. Milazim Krasniqi, profesor i Gazetarisë në Universitetin e Prishtinës, tha se në Kosovë televizioni po përballet me vështirësi të digjitalizimit por prapë mbetet medium atraktiv për shkak të formatit të risive që i ofron.

Sot u shënua Dita Botërore e Televizionit, ditë kjo e cila simbolizon komunikimin dhe globalizimin në botën bashkëkohore, e shpallur nga Asambleja e Përgjithshme e OKB-së, në vitin 1996, duke i bërë bashkë për herë të parë institucionet kryesore të industrisë mediale. Profesori i Gazetarisë, Milazim Krasniqi, foli për Radio Kosovën lidhur me rëndësinë dhe ndikimin e televizionit në vendin tonë.

“Në Kosovë ndikimi i Televizionit është jashtëzakonisht i madh, edhe pse është i sfiduar nga portalet dhe rrjetet social. Televizioni mbetet shumë atraktiv qoftë për shkak të lajmeve formatit që ofron mundësi vizuale, pra, të shihen ngjarjet ashtu si ndodhin,  qoftë për shkak të emisioneve argëtuese sportive që normalisht portalet në rrjetet sociale i kanë të kufizuara mundësitë që t’i prezantojnë, tha ai.

Profesori Krasniqi tha se në Kosovë është Radio Televizioni i Kosovës, mediumi që mbulon audiencën dhe grupe të ndryshme sociale, si dhe një varg televizionesh të tjera komerciale të cilat aspirojnë mbulimin e  audiencës në bazë të interesave edhe komerciale. Ai foli edhe për vështirësitë që has ky medium në përditshmëri.

“Problem për televizionet në Kosovë është vonesa e digjitalizimit. Është një proces që duhet të kryhet por që ka vonesa shumë të mëdha dhe për këtë arsye fajin duhet kërkuar te institucionet shtetërore të cilat duhet ta bëjnë këtë gjë”, shtoi ai.

Dita Botërore e Televizionit është ditë që na kujton rrugën e zbulimit dhe rolin që ka ky medium në jetën e përditshme të njeriut. /Rtk /KultPlus.com

Të ngjajshme