Me ndarjen nga jeta të Tahir Baçovës, Shqipëria humbi një nga figurat më të dashura dhe më të respektuara të skenës artistike. Një emër që nuk lidhet vetëm me cirkun, por me një epokë të tërë të edukimit përmes artit, përkushtimit dhe dashurisë ndaj kafshëve dhe publikut. Tahir Baçova nuk ishte thjesht një zbutës kafshësh, ai ishte një artist i lindur, një novator që solli emocione të papërsëritshme në arenën shqiptare, një njeri që gjithë jetën ia kushtoi një misioni të rrallë: të sjellë magjinë përmes kafshëve.

I lindur në Tiranë në vitin 1936, Baçova u rrit mes dashurisë për natyrën dhe artin. Në moshë të re iu bashkua trupës së Cirkut Kombëtar, atëherë në hapat e parë të formimit të saj, duke kontribuar që prej fillimit në ngritjen dhe zhvillimin e këtij institucioni që do të bëhej vatër e shpirtit artistik për shumë breza. Në vitin 1960, ai solli për herë të parë në skenën shqiptare një risi të padëgjuar: numrat me kafshë të stërvitura. Njerëzit e panë me habi e admirim qenin që reagonte si aktor, ariun që luante me top, dhe biçikletat e vogla të hipura nga kafshët, gjithçka e ndërtuar me mjeshtëri, durim dhe dashuri, shkruan KultPlus.

E veçanta e Tahirit ishte lidhja e tij emocionale me kafshët. Ai nuk i shihte ato si mjete spektakli, por si partnerë të skenës, si qenie me të cilat kishte ndërtuar një marrëdhënie të thellë respekti. Për këtë, jo rrallë u konsiderua si një “magjistar” i arenës. Bashkë me bashkëshorten e tij, Sanie Baçova, gruaja e parë shqiptare që stërviti kafshë për cirk, krijuan një trashëgimi unike që frymëzoi shumë të rinj të ndjekin rrugën e tyre.

Për dekada të tëra, Tahir Baçova ishte zemra e Cirkut Kombëtar. Emri i tij lidhej me çdo shfaqje të madhe, me çdo buzëqeshje fëmije në publik, me çdo duartrokitje që ngrihej në arenë. Ai nuk mungoi kurrë, as atëherë kur u tërhoq nga skena si artist aktiv sepse cirku mbeti gjithmonë pjesë e jetës së tij. Dhe ai, gjithmonë pjesë e tij.

Për kontributin e tij të jashtëzakonshëm, u vlerësua me titullin “Artist i Merituar”, por për publikun ai do të mbetet përgjithmonë mjeshtri i cirkut, “njeriu që i dha shpirt arenës dhe i mësoi Shqipërisë se edhe kafshët mund të jenë artistë”.

Me ndarjen e tij nga jeta më 2 shtator 2024, në moshën 88-vjeçare, një epokë mbyllet. Por vepra e tij, dashuria që mbolli dhe emocionet që krijoi nuk do të harrohen. Tahir Baçova do të mbetet një simbol i përjetshëm i artit të gjallë, i një Shqipërie që besonte tek përkushtimi, pasioni dhe mjeshtëria.

U prehsh në paqe, Mjeshtër. Arena e cirkut do të ndjejë mungesën tënde, por kujtimi yt do të rrojë përherë në rrethin e dritave dhe buzëqeshjes së publikut./KultPlus.com