Osmani i ridorëzon dekoratën “Urdhri Hero i Kosovës” familjes së heroit Agim Ramadani

16 Prill, 2021 - 1:53 pm

Familjes së heroit të kombit, Agim Ramadanit, veprimtarit e luftëtarit të paepur për lirinë dhe pavarësinë e Kosovës, sot i është dorëzuar kopja e dekoratës “Urdhri Hero i Kosovës”, të cilën presidenti historik i Kosovës, dr. Ibrahim Rugova, ia kishte ndarë më 19 prill 2009, ndërsa ia kishte dorëzuar presidenti Fatmir Sejdiu. Fatkeqësisht, medalja ishte humbur pa fajin e familjes dhe legjislacioni aktual ka lejuar që ajo të ridorëzohet në raste të tilla, shkruan KultPlus.

Presidentja e vendit, Vjosa Osmani, dekoratën “Urdhri Hero i Kosovës” ja ka dorëzuar sot bashkëshortes së Agim Ramadanit, duke vlerësuar lart figurën e heroit Ramadani.

Ky është postimi i plotë i Osmanit:

Familjes së heroit të kombit, Agim Ramadanit, veprimtarit e luftëtarit të paepur për lirinë dhe pavarësinë e Kosovës, ia dorëzuam kopjen e dekoratës “Urdhri Hero i Kosovës”, të cilën ia kishte ndarë presidenti historik i Kosovës, dr. Ibrahim Rugova, e të cilën më 19 prill 2009 ia kishte dorëzuar presidenti Fatmir Sejdiu. Fatkeqësisht, medalja ishte humbur pa fajin e familjes dhe legjislacioni aktual lejon që ajo të ridorëzohet në raste të tilla.

Agim Ramadani është njëri ndër komandantët më të shquar të Ushtrisë Çlirimtare të Kosovës, i cili në betejën e Koshares e theu kufirin i cili i ndante shqiptarët dhe e krijoi shpresën për çlirimin përfundimtar të Kosovës.

Duke ia dorëzuar këtë dekoratë familjes së heroit Ramadani ne e ritreguam kujdesin e institucioneve të vendit ndaj atyre që me heroizmin e tyre na mundësuan ta preknim lirinë, por edhe ndaj familjeve të tyre. Ky kujdes do të jetë i vazhdueshëm. / KultPlus.com

Të ngjajshme