Në Qendrën kulturore “Katina Papa” të Livadhjasë në bashkinë Finiq, u promovuan dy vëllime poetike nga krijimtaria e poetit Panajot Boli.

Organizatorë të veprimtarisë komplekse ishin Klubin i Krijuesve dhe Artistëve “Jonianë” Sarandë, në bashkëpunim me shkolla e mesme të bashkuar “Lefter Talo” dhe Zyrën Arsimore Finiq-Dropull.

Të pranishëm në këtë aktivitet ishin drejtori i Kabinetit në Bashkinë e Finiqit, Vangjel Xhaferi, mësues dhe nxënës të shkollës Livadhja, krijues dhe personalitete të artit nga qyteti i Sarandës dhe Gjirokastrës, si dhe të ftuar të tjerë.

Mbi vlerat e librave “Kur pyeta Syrin e Kaltër” dhe “Pranverë e kaltër” të poetit dhe shkrimtarit Panajot Boli folën Hekuran Halili, kryetar i Klubit Jonian, gazetari dhe shkrimtari Thanas Dino, gazetari dhe shkrimtari Shkëlqim Hajno, studiuesi Behar Maze, Agron Mema, Dhimitër Qiqi, etj,.

Klubi i Krijuesve dhe Artistëve ‘Jonianë’, bëri të ditur se, nisma për promovimin e krijimtarisë së poetit Panajot Boli, do të vijojë edhe ne shkolla të tjera të pakicave etnike greke, duke u analizuar edhe me një botim nga krijimtaria letrare e nxënësve të këtyre shkollave.

Kjo ngjarje kulturore në Livadhja u bë edhe më tërheqëse për pjesëmarrësit me interpretimet artistike me recitime, këngë e valle nga grupi artistik i shkollës së Livadhjasë, institucion arsimor i mirënjohur prej vitesh në rang vendi si një vatër arsimi, kulture dhe olimpiadash shkollore rajonale./atsh/KultPlus.com