Uta Ibrahimi vizitoi fëmijët rom, ashkali e egjiptian në Gjakovë, të entuziazmuar me sukseset e alpinistes

15 Shtator, 2020 - 7:02 pm

Vizita e sotme e mbajtur në Qendrën për Zhvillimin e Fëmijërisë së Hershme në Gjakovë nisi dhe mbaroi me brohoritjet Urra.

Në vazhdën e aktiviteteve të projektit URRA që është  partneritet i UNICEF me Fondacionin Utalaya, sot me 15 shtator, 472 fëmijë të komuniteteve Rom, Ashkali dhe Egjiptian përfituan nga pakot me materialit didaktike të Edukimit të Hershëm.  

Ata takuan për herë të parë Uta Ibrahimin, prej së cilës dëgjuan rrëfimet frymëzuese mbi ngjitjet e saj në malet më të larta në botë me ç ‘rast ajo mbajti edhe fjalim inspirues për fëmijët duke i nxitur ata që të ëndërrojnë sa më shumë dhe të punojnë drejt realizimit të ambicieve të tyre duke qenë të rregullt në mësime dhe shkollë.

Përveç pakove dhe mundësisë së bashkëbisedimit me Utën, fëmijëve dhe prindërve të këtyre komuniteteve iu shpërndanë edhe maska të ripërdorshme për mbrojtje ndaj COVID-19, si dhe u fol për rëndësinë e bartjes së maskës në kohë pandemie.

Pjesëmarrës në këtë aktivitet ishin edhe: Larisaa- Brunn, Zëvendës Shefe e UNICEF-it në Kosovë, Berat Thaqi, Drejtor i Qendrs Bethany për Shërbime Krishtere,  Edukatoret e Qendrës në Gjakovë si dhe kryetari i komunës së Gjakovës Ardian Gjini.

Edukatoret që janë pjesë e programit për zhvillimin e fëmijërisë së hershme u shprehën se kjo iniciativë mund të duket si gjest i vogël nga jashtë mirëpo ndikon shumë në zhvillimin dhe disponimin e fëmijëve me status të paqëndrueshëm ekonomik si dhe u shprehën të gatshme për bashkëpunime tjera me shpresën se në të ardhmen do të ketë angazhim më të madh të të gjitha instancave përgjegjëse me komunitetet jo-shqiptare dhe grupet e margjinalizuara. 

Poashtu edhe njëherë u promovua platforma e edukimit të  hershëm(https://edukimihershem.rks-gov.net/), e cila është krijuar enkas për prindër, edukatorë dhe fëmijë, ashtu që fëmijët të jenë të angazhuar me detyra e aktivitete që mund të mbahen në kushte shtëpie e që ndihmojnë zhvillimin dhe mirëqenien e tyre./ KultPlus.com

Të fundit

Të ngjajshme