Arusha polare më e vjetër në Britaninë e Madhe i është nënshtruar eutanazisë – pas problemeve shëndetësore të lidhura me moshën, tha Shoqata Mbretërore Zoologjike e Skocisë (RZSS).

Victoria, 28 vjeç, kishte marrë trajtim mjekësor në “Parkun e Jetës së Egër RZSS Highland” pranë Kingussie.

Veterinerët e organizatës bamirëse për ruajtjen e jetës së egër këshilluan që ajo të eutanizohej – pasi morën parasysh cilësinë e jetës dhe mirëqenien e saj.

Victoria lindi në Kopshtin Zoologjik të Rostockut në Gjermani, në dhjetor 1996 – dhe lindi një këlysh femër – për herë të parë në vitin 2008 në Kopshtin Zoologjik të Aalborgut, në Danimarkë – e quajtur Malik.

Në vitin 2015, Victoria u zhvendos në Parkun e Jetës së Egër Highland dhe lindi dy arinj meshkuj: Hamish në vitin 2017 dhe Brodie në vitin 2021.

“Victoria ishte një nënë e shkëlqyer dhe ta shihje duke rritur dy djem të mëdhenj e të shëndetshëm ka qenë një gëzim për ekipet e përkushtuara të bamirësisë sonë. Qindra mijëra vizitorë kanë ardhur për të parë familjen e saj dhe për të mësuar më shumë rreth kërcënimeve me të cilat përballen këto kafshë të mrekullueshme në natyrë”, tha David Field, drejtori ekzekutiv i RZSS.

Victoria iu nënshtrua eutanazisë dje në mëngjes.

RZSS tha se në natyrë, vetëm një përqindje e vogël e arinjve polarë jetojnë mbi 18 vjeç – duke e përshkruar moshën e Victorias – si një dëshmi të kujdesit të klasit botëror – që ajo mori nga kujdestarët dhe ekipi i veterinerëve. /atsh/ KultPlus.com