Shkrimtari, gazetari dhe redaktori i gazetës KultPlus, Arbër Selmani, me datë 26 shkurt do të lexojë poezitë e tij në një mbrëmje poetike.

Tetë: Poetry Night me Arbër Selmanin do të mbahet në hapësirën Shtatëmbëdhjetë, shumë afër gjimnazit Sami Frashëri në Prishtinë.

Selmani do t’i lexojë disa prej poezive të tij ndërsa edhe të tjerë njerëz në audiencë do të mund të lexojnë krijimet e tyre. Ngjarja mbahet me 26 shkurt në ora 19:00, në Prishtinë.

Ky është përshkrimi i ngjarjes në fjalë:

Prej dashnisë, te vuajtja, prej andrrave tek copëtimi i tyre, prej përlamjeve tek përqafimet, prej fantazmave te realiteti, prej babait tek nëna, prej detit te rëra, janë temat që Arbër Selmani i trajton në poezitë e tij. Numri tetë (8) ka një domethënie për Arbërin. Ai thotë se është numër i dashurive të humbura dhe të poezive të gjetura. Ka kohë që Arbëri nuk i ka lexuar copëzat e tij para publikut. Për herë të parë atij poezive të tij i kushtohet një natë e vetme. Ai do të vjen në Project Space të martën me datën 26 i përthekum me ndjenjat e tij të cilat janë të shpërndame, bipolare, herë në letër e herë as aty jo.

Shtatëmbëdhjetë ju sjell edhe këtë muaj Natën e Poezisë. Sikur herën e kaluar ju ftojmë që t’i merrni poezitë me vete dhe pas Arbërit të ngjiteni në skenë dhe t’i ndani ato me të gjithë neve.