Jeta e rraskapitur e Greta Garbo, është shtrirë në një koleksion letrash të shkruar nga aktorja suedeze, e që janë përkthyer para se të dalin për shitje javën e ardhshme në Sotheby, shkruan The Telegraph, përcjellë KultPlus.

Garbo ishte një nga yjet më të suksesshëm të viteve 1930, ndërsa të ardhurat e saj tejkalonin bashkëkohësit e saj. Ajo fitonte rreth 3 milionë dollarë, që i bie 42 milionë dollarë në paratë e sotme.

Koleksioni i letrave të publikuara tregojnë se ajo ndihej tepër e vetmuar. Garbo e urrente motin e pandryshueshëm të Beverly Hills, dhe shfaqej e shqetësuar për suksesin e filmave të saj ndërsa ndihej e dëshpëruar për ngjarjet që po ndodhnin gjatë Luftës së Dytë Botërore. Dukej se ajo po jetonte një jetë gjithnjë e më të izoluar në Hollivud.

“Unë jam pothuajse gjithmonë e vetmuar dhe flas shumë shpesh me veten time, ndonjëherë vozis dhe shëtis në plazh dhe kjo është gjithmonë e mrekullueshme, por kjo është e gjitha…”, kishte shkruar ajo më 14 nëntor të vitit 1939, tek fliste për jetën e saj në Beverly Hills.

Revistat dhe gazetat e bënë edhe më të vështirë jetën e Garbo-s, siç kishte shkruar edhe ajo në njërën nga letrat: “Në krye të të gjitha absurditeteve të tjera, ata po më martojnë mua për të 759-ën herë”.

Aktorja Garbo, nuk u martua kurrë dhe nuk kishte fëmijë, ndërsa vdiq në vitin 1990 në Manhatan, duke ndërtuar një perandori të vogël të pronës përmes fitimeve të saj MGM.
Letrat e saj do të dalin në shitje në Sotheby, në Londër më 12 dhjetor dhe kapin një vlerë prej 15 mijë deri në 20 mijë funta./ KultPlus.com