Flonja Haxhaj

Esenca e kryeveprave klasike franceze jehoi mbrëmjen e së premtës në Prishtinë teksa u sollën veprat e Saint-Saëns, Debussy, Stravinsky e Poulenc në një repertor për klarinetë dhe piano, të interpretuara mjeshtërisht nga Florent Charpentier dhe Pranvera Hoxha, shkruan KultPlus.

Koncerti ‘Clarinet Podium’ i cili shënoi edhe mbrëmjen e katërt të festivalit ‘Dam Festival’, përcolli emocione të jashtëzakonshme tek adhuruesit e muzikës klasike që kishin mbushur plot Amfiteatrin e ri të Bibliotekës Universitare.

‘Clarinet Podium’ nisi me sonatat për klarinet dhe piano të Saint Saëns duke  e zhytur publikun në atmosferën melankolike e klasike të shekullit XX duke e paralajmëruar me këtë edhe fillimin e një koncerti të paharrueshëm.

E për më shumë se një orë, dyshja Charpentier e Hoxha morën audiencën në një udhëtim të mahnitshëm të tingujsh, duke lënë të ndihet emocioni dhe pasionet e kompozitorëve francezë të shekullit të 20-të.

Pas koncertit, Florent Charpentier u shpreh për KultPlus se ndjehet shumë i lumtur që luajti para një publiku që e vlerëson një muzikë të tillë.

“Ishte kënaqësi të luaja në këtë sallë dhe me këtë publik, gjithashtu ishte shumë e veçantë për mua si muzikant francez të luaja disa pjesë të kompozitorëve francezë.Bashkëpunimi me Pranverën ishte i  mrekullueshëm, ne kishim vetëm dy ditë kohë për të bërë prova, por ishte shume e lehtë për ne sepse i njohim shumë mirë këto vepra. Për mua si klarenitist këto janë shumica e kryeveprave të repertorit tonë, pra ishte ishte e lehtë t’i interpretojmë”, u shpreh Charpentier i cili më tutje tha se është shumë mirë kur një muzikë klasike ngjall në publik një atmosferë të tillë.

Sigurisht, kjo mbrëmje nuk do të ishte e kompletuar pa piantisten Pranvera Hoxha. Ajo për KultPlus tha se ky koncert  ishte shumë i bukur pasi i gjithë repertori ishte francez.

“Është shumë bukur kur bashkëpunon me artistë nga jashtë sepse marrim eksperienca si nga ana e shkollës, ashtu edhe kulturore e aq më tepër kur vetë klarinetisti është francez dhe i njeh nga afër të gjitha veprat”, u shpreh Hoxha.

Hoxha më tutje shtoi se pavarësisht kohës së shkurtër të provave, gjithçka erdhi natyrshëm në këtë koncert.

“Natyrisht, sfida ka qenë tek aspekti teknik sa i përket provave pasi kemi pasur vetëm dy ditë rast të takohemi, mirëpo fatmirësisht e kemi pasur një energji sa që të gjitha gjërat erdhën natyrshëm”, përfundoi Hoxha për KultPlus.

Ndërkaq, ‘Dam Festival’ u mbajt nga 4 deri më 9 shtator ku për pesë net të gjithë dashamirët e muzikës klasike patën mundësi të shijojnë tingujt e mrekullueshëm të kryeveprave botërore të kësaj muzike./KultPlus.com