Këngëtari Isaac Gracie ka zgjedhur Prishtinën për projektin e tij të radhës.

21 vjeçar, Gracie vjen nga Londra ndërsa ka nisur të këndojë qysh në moshën 14 vjeçare. Projekti i tij i radhës, videoklipi ‘Terrified’ është xhiruar në Prishtinë.

Kësaj radhe, Horizon-T është kompania e cila ka realizuar videoklipin e artistit. E themeluar nga Besnik Krapi dhe Harvey Ascott, kompania ka për synim të promovojë Kosovën e Shqipërinë si vende me kapacitete të mëdha për xhirim nëpërmjet prurjes së artistëve të njohur ndërkombëtarë për të realizuar projektet e tyre këtu.

https://www.youtube.com/watch?v=ztm54WupdPU

Bendi Royal Blood jo shumë kohë më parë e solli këngën e tyre me anë të një bashkëpunimi të tillë, njëjtë sikur Jonas Blue me këngën Mama, i cili është xhiruar si videoklip në Shqipëri dhe ka rreth 500 milion shikime.

“Pak ditë më parë janë realizuar xhirimet për një reklamë për një ndër kompanitë më të mëdha teknologjike, por kjo do të bëhet publike brenda disa ditësh” tregon Besnik Krapi për KultPlus.

Videoklipi i këngëtarit nga Londra është vetëm projekti i radhës që ndikon në promovimin e artistëve dhe shkëmbimin e përvojave të artistëve ndërkombëtarë dhe atyre vendorë. Madje, në këtë videoklip shihen një numër artistësh nga Kosova dhe një ekip i angazhuar që produkti final të dalë sa më i arrirë.
Xhirimet janë realizuar në Grand Hotel dhe në Teatrin Oda në Prishtinë. / KultPlus.com