Nga data 4 deri më 6 gusht, në Platonë e Teatrit të Gjilanit do të mbahet festivali ‘Angros’, i cili këtë vit shënon edicionin e tij të gjashtë.

Përgjatë këtij festivali do të mbahet edhe ‘Nata e Plisit’ ku do të performojnë një grup i njohur kosovar dhe artistë lokalë të cilët do të dhurojnë performanca mbresëlënëse, përcjell KultPlus.

Për të gjithë dashamirësit e muzikës elektronike, është përgatoti një natë e paharrueshme me ritme dhe tinguj në ngjarjen ‘Nata Elektronike’. DJ të zgjedhur me kujdes do të ngjiten në skenë, duke krijuar një atmosferë të mrekullueshme plot me muzikë elektrizuese.

Po ashtu festivali këtë vit ka menduar edhe për fëmijët në programin ‘Angros Kids’, ku arti takon imagjinatën. Fëmijët do të kenë mundësinë të zbulojnë krijimtarinë e tyre nëpërmjet aktiviteteve të ndryshme artistike, e për të cilët ëstë përgatitur po ashtu një dhuratë,  shfaqja e një filmi për fëmijë me projektor, pikërisht në zemrën e qytetit.

Ndërkaq, përgjatë këtyre netëve, publiku do të ketë mundësi të argëtohet nga artistë të njohur vendorë e të huaj./KultPlus.com