‘Ju s’keni fe, e keni bastarduar atë e ndaj feja ju ka flakur’

22 Gusht, 2018 - 6:53 pm

Nga Fatjon Gjinaj

Bashkëjetesa si fjalë në kontekste të ndryshme ka domethënie të ndryshme. Duke mos qenë qëllimi im zbërthimi i këtij termi në variante të përgjithshme por vetëm për rastin konkret kur artikulohet në kontekstin e përshkrimit si “aset” fetar, dua dhe mendoj të them (e pëderisa dua dhe mendoj edhe po e them), se ky term në rastin konkret është absurd. Është absurd për aq koha sa jo të gjithë bien dakort me diçka e cila është kthyer vendim i formës së prerë për të gjithë pa e ditur të gjithë (më saktë, shumica), se ku fillon dhe ku mbaron bashkëjetesa(?) Kush e shpiku atë(?) Për çfarë(?) A është e ligjshme(?) A është e lumtur ajo e mbi të gjitha a funksionon(?)

Po futem në temë, dhe me që tema duket krejt ndryshe nga ajo sa thashë deri tani po shpjegoj edhe se përse doja ta shmangja temën në hyrje të shkrimit.

E pranoj se nuk është shumë e zakonshme si temë dhe arsyeja është se ne shpesh si njerëz e sidomos si shoqëri (po flas për ne shqiptarët), duke dashur të dukemi gjithmonë si të jashtëzakonshëm harrojmë të zbresim me këmbë në tokë, t’i themi gjërat siç janë, dhe…. t’a marrë e mira të mos i paragjykojmë së paku ata që guxojnë të thonë një të vërtetë të zakonshme.

Çfarë ishe ti mysliman i nderuar përpara se të bëheshe mysliman? Po ti katolik përpara se të bëheshe kristjan? Po ti pagan përpara se të ishe pagan?

Epo, nëse nuk të bën përshtypje se ti je dikush që i ke ndryshuar fetë sa herë kanë ndryshuar stinët e motit; e nëse nuk të bën përshtypje që pardje i luteshe Gjarprit, dje Krishtit e sot Muhamedit, mos të të bëjë përshtypje as ajo që them unë për besimin tënd; për besimin tim dhe për besimin e të gjithëve ne. Thjeshtë ule kokën dhe më dëgjo e kur të pyes përgjigju.

Çfarë më thua për këtë palo femrën me vetëm dy dritat e syve të zbuluara e një copëz gojë që frekuenton lokalet e shtrenjta ku pihet alkool dhe drogë, pale cigare, i zgjat dorën e s’ta jep se ia ndalon feja e kur pa këmbyer dy fjalë vendos njërën këmbë mbi tjetrën, nxjerr paketën e cigareve “Winston”, nxjerr edhe çakmakun për t’i vënë flakën cigarës së varur në buzët e lyera all të kuqe?

Po për atë tjetrën me kryqin sa gjysma e vehdit në qafë gjysma e të cilit i futet midis gjinjve të zbuluar që duket sikur janë gati për të shpërthyer e bërë namin? Madje edhe në rrathët e vathëve i ka të varura dy kryqe që i prekin shpatullat e zhveshura(?)

Për cilën fé më flet ti kur burri i botës (që ma quan veten njeri të perëndisë, me mjekrrën deri tek rripi i pantallonave e brekët deri në gjú), thotë se Gjergji i Kastriotëve na qenka tradhëtar, se Nëna Terëzë një e përdalë, se mëmëdheu ynë na qenkërka arabia? Ai tjetri thotë – vrite vajzën e mos e jep në derë të besimit tjetër?

Për cilën fé më flet ti o i verbër kur ai palo prifti yt rreh foshnjën në pagzimore, ai tjetri abuzon seksualisht me të miturën e të miturin, ai tjetri abuzon me thesarin e kishës?

I cilës fé qenke ti o qyp i nëpërkëmbur, o dele e rruajtur e prerë lëkurësh kur ai Kryegjyshi yt i përbotshëm shkëlqesia e tij është lord e kaluar lordit nga pasuria e vënë?

Për cilën fé po më flet o qyrylyk kur ti beson atë që predikon kryekreu i besimit tënd që shtrohet në dreka e darka me politikanët e korruptuar, me të shkuar e të tashme kriminale, hajdutë të pasurisë kombëtare? Cila fé të frymëzoka ty o botë e mjerë njerëzore që rren gjithë ditën të tjerët, pendohesh, shkon për t’u rr’fy e t’rrejnë…?

Si mund t’a rregullosh ti botën kur ende nuk ke rregulluar veten? Si mund të më flasësh me adhurim për Jezu Krishtin kur unë e di fort mirë se ti je një Judë?

Ose të më flasësh me adhurim për Muhametin kur unë e di fort mirë se ti je një mujshisë?Cilit Zot ke b**** ti që t’i bësh avokatin kur unë mbase jam një i mjerë që e marr nëpër gojë kot? Cili Zot a profet të thotë ty t’a bësh këtë gjë o mjeran?

Po për ç’bashkëjetesë po flet kur ti sapo ke lexuar titullin e këtij shkrimi ke nisur të mendosh se si të më gjuash? Si do bashkëjetokemi ne të dy kur unë mendoj se Muhameti është i dërguari i Allahut dhe më perfekti nga të gjithë e se Jezu Krishti është një kokë-palarë; ose e kundërta, Jezusi është Mesia dhe Muhameti një tregtar hajdut?

Po ju nuk keni fé përderisa mohoni veten, familjen e mbi të gjitha kombin për shkak të mendjes suaj të errët. Ju nuk bashkëjetoni, sepse ju nuk jeni të lirë t’a bëni këtë gjë. Ju jeni të dënuar për të bërë dhe menduar ç’ju thonę të tjerët. Ju nuk bashkëjetoni, ju bashkëvuani dënimin që i keni dhënë vetës në vorbullën e mashtrimit të madh.

Ju s’keni fé, e keni bastarduar atë e ndaj feja ju ka flakur. Ju jeni barbar të besimit tuaj të marrë që mendoni se feja është një mjet. Si mund të doni ju Zotin kur nuk ju plas fare për Shqipërinë! Pse nuk ia kushtoni atdheut sakrificën që ia kushtoni fésë!? Se jeni dështakë ja përse! Nuk doni as njërën as tjetrën më shumë se vetën!

Të fundit

Të ngjajshme