Letër studentit të mjekësisë

25 Shtator, 2018 - 5:50 pm

Nga Jehona B. Krasniqi

(Me rastin e ndërrimit të jetës të mikut dhe kolegut tonë)

“Trimi, sikur sot t’kishe qenë gjallë, sikur t’ishim pa 5 minuta, t’i kisha dhanë 5 minutat e një jete tjetër përtej asaj që me dashje o pa dashje na e imponon mendësia e jonë e shoqnisë sonë e t’qenit student i mjekësisë.
Trimi, sikur sot t’kishe pas vendimin në dorën tande, a kishe vendos ndryshe me jetu e vepru për andrren tande?
Nuk e kemi pas fatin me u njoh se kemi qenë e jemi dy njerëz që kryqëzimi i vetëm mes udhëve të jetës për ne, asht Mjekësia.

Meqë sot kanë me të dhanë lamtumirën e fundit krejt ata që të njohën e nuk të njohën, unë kam vendos me ja u shkru do fjalë studentave të mjeksisë, ktyre që sot kanë nda mërzinë me familjen tande, shoqeve e shokëve tu që sot i kam taku teksa qanin për ty në korridoret e Klinikes së Gjinekologjisë.

Na kemi zgjedh njërin ndër profesionet ma delikate, ma të brishta, ma të bukura: Me shpëtu jetë njerëzish, me ndreq jetë njerëzish, me kthy shpresën, me kthy buzëqeshjen.

Derisa e kemi marrë këtë rrugëtim, kemi harru me u ba njerëz vet, me jetu si të tillë e me shiju jetën e me njoh.
Na studiojmë, jetojmë në një sistem që na vlerëson me numra: 9, 10 janë ata që shihen top në shoqninë tonë, ndaj është edhe stresi me qëndru në mesin e ktyne njerëzve.

Pikërisht, ky lloj respekti që na e imponon shoqnia jonë, sistemi i studimeve, besa edhe profesorat që nuk shohin përtej numrit, na ka pru në ni rreth vicioz që jemi mbyll vetëm mes librave edhe mjekësisë edhe po e humbim e shkëmbejmë njerëzimin me k’ta numra.

A e keni llogarit najherë, çka ka përtej qatyne mureve tjuja e termeve mjekësore?

M’ka rastis me nejt me top studenta (10shet e 9shet janë të tillë te na se na tjertë përfundi mirrem si të “lodhun”) edhe aq sa kam ndi simpati për ta, për dijenin e tyne, aq kam ndi edhe dhemshuni për perceptimin që e kanë për jetën edhe nuk shohin përtej hundëve të tyne.

Gara e inatet po na kthejnë në përbindësha e jo në shërues.
Edhe, çka kemi fitu deri tash me qet garën për me nejt në top?
Unë kurrgjo, përveç humbjes së njerëzve ma të dashun, tu mos qenë pranë atyne kur kanë pas nevojë për ne, e besa as ju.
Nuk e keni marrë vesh hala cka keni humb? Nashta ka ardh koha me u nal e mendu pak.
A keni fitu shok prej vërteti në k’to orvatjet e juja, apo veç maska sa me i “chekirat” përgjigjet mes vete e me të majt afër se je elita e 10sheve derisa je se kur bjen, ku mbetesh?

Çka po fitojmë me stresin që ja shkaktojmë vetes për me i mrri standardet banale që i kërkojnë prej neve shoqnia jonë hipokrite?
Veq shkatërrimit mental të vetes, humbjes së njerëzimit e besa edhe vdekjes.
E lehte asht’ me u shkatërru shëndeti e shumë e rand asht me u rujt.
Shokë e shoqe, provimet kryhen, nuk kanë qare. Dikush ma herët e dikush ma vonë, se kush ka me na pyt për to kur i kem kry.

Jeta qe e humbim nuk na jep shansa të dyta.
Rasti i Trimit le te na bahet shembull neve që të msohemi me qenë studenta me tana të mirat, por edhe të msohemi me jetu në standarde ma të uluna, të msohemi me e menaxhu stresin tonë, të msohemi me jetu me presionet e jetës, të msohemi me qesh edhe kur na vjen me qajt, të msohemi kur të dalim me pi kafe bashkë un’ e ti, me fol për art, film, jo për provime.
Du me ndëgju çfarë romani ki lexu, cka ke pa film, a dojmë me shku në teatër bashkë, në kinema, filharmoni ose vec me dal për kot së koti e me u marrë me fjalë të kota…

Të msohemi me dasht njani-tjetrin për qata çka jemi, pa i kqyr numrat e njani-tjetrit, të msohemi me ja dasht të miren njani- tjetrit, me e kshillu njani-tjetrin, me e ndihmu njani-tjetrin.
Duajeni shneten e juj, jetën e juj se vetëm atëherë keni me mujt me e shëru e shpëtu jetën e dikujt tjetër.
Msohuni me qenë të njerëzishëm e mandej mjekë.”

Studenti i mjekësisë, 23 vjeçari nga Suhareka, Leutrim Gjini ka ndërruar jetë pas një sulmi në zemër. Atij i ishte përkeqësuar gjendja duke pritur për provim. Drejtoresha e Gjinekologjisë, Myrvete Paqarada ka thënë se studenti kishte ardhur për të hyrë në provim në gjinekologji. Gjendja e tij është përkeqësuar në fakultet dhe pastaj e kanë dërguar në QKUK për trajtim ku edhe ka ndërruar jetë. Studenti ka ndërruar jetë në Klinikën e Kardiologjisë pas 10 orë trajtim nga mjekët. /KultPlus.com

Leutrim Gjini

Të ngjajshme