займ на карту онлайн потребительский кредит

Poezia e shpërblyer me vendin e tretë në konkursin ‘KultStrofa’

8 Shkurt, 2018 - 8:42 pm

Vdekja e bardhë / Sibel Halimi

Kur të vdes miku im
Mos shkruani epitaf
Asnjë fjalë mos ma thoni
Zbrazeni nga një
Për frymën time
Kohën e acartë

Kur të vdes miku im
Lotët rrëke mos i derdhni
Kujtoni kur ma rrihnit shpinën
Thuajse më mbani gjallë

Mos u vishni në zi me syze gri
Në të gjallë i doja ngjyrat e natyrën me krejt madhështinë

Miku im kur t`i ofroheni varrit
Kujtojeni kur cakërronim gotat për provimin e dhënë
Të keqen e shkelmuar…

Kur miku im ta hidhni një grusht dhé mbi mua
Copëza balte si rruaza
Qafore gushës sime do t`i bëhen

Miku im, kur secili në homazh para meje të jetë
Gajasuni
Të tillë ju kam dashtë prore

Im mik, mos u rreshtoni për të ardhë tek unë
Rreshtimet përherë luftuar i kam
Ofrohuni tok
Ngrini dolli për mua që ju dhashë një dromcë jete
Do të ngjallem në vitin e brishtë

I fundit që më largohet
lutem
Ma lërë një gotë verë dhe një fletë të bardhë
Kushedi, mund ta marrë ta shkruaj ndonjë fjalë
Edhe në amshim

Faleminderit, miku im!

Të ngjajshme