Poezi nga Osman Gashi

Thirra: Kosovë!
Fluturuan duke prerë ajrin e mëngjesit
Trumba dallëndyshesh

Thirra: Kosovë!
Njëmijë ofshama
Njëmijë buzëqeshje
Më ngritën në ajër posi një letër të bardhë

Thirra: Kosovë!
Tërë një det lotësh
Fytyra të ngazëllyera fëmijësh
Duke rrahur tokën
Në mes të valles

Thirra: Kosovë!
Një lumë fjalësh
Që gurgullojnë
Erëra që s’prajnë
Lisa rrënjëthellë
Që s’tunden

Thirra: Kosovë!
Thirra: Kosovë!
Thirra: Kosovë!