Gjatë tërë ditës sot nëpër internet ka qarkulluar panoja “Bac, çikat na e zbardhën ftyrën!”.

Nisur nga Bac, U kry!, dikush vendosi të përhapte fotografinë me Rita Orën, Dua Lipën dhe Majlinda Kelmendin, si tri vajza nga Kosova të cilat po na bëjnë krenar dhe po arrijnë suksese në fushat e tyre artistike, nëpër botë.

E në këtë pano do të mund të ishte edhe Era Istrefi. Ajo, më shumë se Dua dhe Rita, ka jetuar në Prishtinë gjatë jetës së saj dhe me vetëm një hit arriti një famë të madhe në Evropë.

Ka pasur komentues të ndryshëm të cilët kanë shprehur një interesim të thjeshtë, dhe një kuriozitet nëse në këtë fotografi do të duhej të ishte edhe këngëtarja e hitit “BonBon”.

Rita Ora, megjithatë, do të jetë nesër në Prishtinë. Dua Lipa po vazhdon me sukseset e saj nëpër koncertet e saj, ndërsa Majlinda Kelmendi mbetet sportistja më e mirë nga Kosova e cila madje arriti suksese edhe në Lojërat Olimpike, prej nga solli edhe medalje.

Pa ndonjë qëllim të keq, a do ta meritonte edhe Era Istrefi të ishte pjesë e kësaj fotografie që sot pushtoi rrjetet sociale dhe u kthye në një mesazh për forcën e gruas, në këtë përvjetor pavarësie? / KultPlus.com