Blerta Basholli dhe aktorët Rozafa Çelaj, Ilire Vinca e Bislim Muçaj, pjesë e Festivalit të Filmit në Venecia

Këtë vit janë të shumtë artistë kosovarë që janë bërë pjesë e Festivalit të Filmit në Venecia. Pas Luana Bajramit e cila do të ketë një paraqitje të dyfishtë në këtë festival, si aktore dhe regjisore filmi.

Regjisorja e njohur Blerta Basholli gjithashtu nuk do të mungojë në këtë festival, kësaj here si producentë e filmit “Housekeeping for Beginners” (Mirëmbajtja e shtëpisë për fillestarë), filmi i fundit i Goran Stolevskit i cili është përzgjedhë në konkurrencë zyrtare në kategorinë Orizzonti në Festivalin e Filmit të Venecias.

Por, përveç Bashollit, pjesë e kastit të aktorëve janë edhe aktorët tanë të njohur si: Rozafa Çelaj, Ilire Vinca dhe Bislim Mmuçaj.

Në film luajnë edhe aktorja e njohur rumune Anamaria Marinca (4 months 3 weeks 2 days) dhe Alina Seban, aktori kroat Vladimir Tintor, së bashku me aktorët maqedonas Samson Selim, Mia Mustafa, Dzada Selim, Sara Klimoska dhe Ajshe Useini.

4220_D001_4654 _R Dzada Selim stars as Mia and Anamaria Marinca as Dita in director Goran Stolevski’s HOUSEKEEPING FOR BEGINNERS, a Focus Features release. Credit: Viktor Irvin Ivanov / © 2023 FOCUS FEATURES LLC

Housekeeping For Beginners është një histori që eksploron të vërtetat universale të familjes, si ato në të cilat kemi lindur, ashtu edhe ato që i gjejmë vetë. Dita nuk donte kurrë të bëhej nënë, por rrethanat e detyrojnë atë të rrisë dy vajzat e të dashurës së saj, ngatërrestaren e vogël Mia dhe adoleshenten rebele Vanesa. Pason një betejë vullnetesh ndërsa të trija bëhen një familje e pashpresë që duhet të luftojë për të qëndruar së bashku.

Filmografia e Stolevskit përfshin filma të mirënjohur – You Won’t Be Alone, i cili u shfaq premierë në konkurrencë zyrtare në Festivalin e Filmit Sundance 2022, dhe Of an Age, që hapi Festivalin Ndërkombëtar të Filmit në Melburn 2022. Të dy filmat u distribuan ndërkombëtarisht nga Focus Features dhe Universal.

Producentët e filmit përfshijnë Marija Dimitrova, Klaudia Śmieja-Rostworowska, Ankica Jurić Tilić, Beata Rzeźniczek, Milan Stojanovic, Blerta Basholli, bashkëproducentët janë Kristina Börjeson, Jonas Kellagher, Kristina Ceyton, Sam Jennings, Linnings, T. Jan Naszewski shërbyen si producentë ekzekutivë.

Filmi është prodhuar nga List Production, Madants, Kinorama, Sense Production, Industria Film, në bashkëprodhim me Film i Väst, Common Ground Pictures, Causeway Films dhe në bashkëpunim me Tango, New Europe Film Sales dhe Adelaide Film Festival.

Shitjet ndërkombëtare menaxhohen nga New Europe Film Sales.

Kurse pjesë e ekipit ishin edhe dy kosovarë tjerë, Leonora Mehmeti Hoxha- grimere dhe Berat Kryeziu VFX.

Filmi është subvencionuar nga Qendra Kinematografike e Kosovës si bashkëprodhim minor. / KultPlus.com

Filmi vendor “Bomba” me premierë në Prishtinë, Fetahu: Këtë film ia kemi borxh popullit tonë

Nën vazhdën e zhanrit aksion, triller dhe dramë, mbrëmë në hapësirat e ‘Cineplexx Kosova’, premiera e filmit vendor me metrazh të gjatë “Bomba” ka bërë bashkë figura të njohura të kinematografisë kosovare dhe asaj shqiptare, shkruan KultPlus.

“Bomba” vjen bazuar në ngjarje të vërteta të ndodhura në luftën e fundit në Kosovë. Nga situata dramatike, rrëqethëse, e herë edhe komike, filmi ka mbajtur vëmendjen e publikut qysh nga nisja e deri në përfundim.

Ndërkaq, kasta e mrekullueshme e përbërë nga Enver Petrovci, James Fetahu, Fatos Kryeziu, Bislim Muçaj, Rremë Thaqi, Dibran Tahiri, Avni Hoti, Selami Taraku, Kadrije Canolli dhe shumë të tjerë që i përkasin skenës tonë filmike, ka bërë që pritshmëritë për publikun vendas, të jenë të larta.

Artistë e artdashës kanë mbushur sallën plot për të parë nga afër premierën e filmit “Bomba”, film ky që ka rezultuar nga një punë tri vjeçare nëpër terrenet e Kosovës.

Skenat e ndryshme të vrasjes, përdhunimit, masakrimit veçse ishin të ndërlidhura me të vërtetën e popullit tonë. Ndërsa, do të jetë bomba që lëshohet nga NATO pikërisht në orën 17:00, ajo që do të shpëtojë personazhet kryesorë të këtij filmi.

Për të treguar më shumë rreth krijimit të këtij filmi dhe vështirësitë përgjatë procesit, për KultPlus ka folur regjisori James Fetahu.

“Skenarin e filmit e kam pasur qysh moti por kushtet nuk kanë qenë të pjekura dhe ne kemi pritur me vite të tëra për të ardhur një ditë e mirë kur më në fund ne kemi mundësi për të dal e për të xhiruar në set dhe njëkohësisht duke dhënë më të mirën sepse ia kemi borxh popullit tonë dhe në fund të fundit, filmi është kombëtar”, thotë ai.

Sipas tij, të qenurit regjisor dhe njëkohësisht edhe aktor në një film, ka qenë tejet sfiduese dhe e vështirë.

“Ka qenë shumë sfiduese se njëkohësisht kam pasur dy role, por njëlloj edhe e vështirë por unë po shpresoj që mundimet harrohen dhe mbetet vetëm një rezultat i mirë. Ky film na ka marrë tri vjet të mira xhirime nëpër Kosovë por vlen të theksohet që fundi ka dal shumë bukur dhe të shihni se e vërteta është pak më ndryshe. Unë po pres që filmi ka për t’u parë dhe do të pëlqehet dhe për këtë jam i sigurt”, shpalos Fetahu.

Në premierën e filmit ‘Bomba’ në Prishtinë ishin të pranishëm edhe Petrit Domi, Dardan Sadiku, Kadrije Canolli, Bislim Muçaj dhe Enver Petrovci, të cilët ende pa e parë filmin, kanë shpresuar se publikut do t’i pëlqej.

“Në emër të ekipit të filmit, sigurisht që ky film s’do të kishte kuptim pas njerëzit që kanë qenë mbrapa me ditë, me natë e me muaj pa asnjë cent, vetëm me dashuri të madhe, andaj i falënderoj shumë”, ka thënë regjisori Fetahu.

Ndërsa, aktori Enver Petrovci ka cilësuar lartë punën e regjisorit si dhe mundin e tij përgjatë tri viteve.

“Është vërtetë bukur që pas tri viteve kokëfortësie, besimi, punë, dashurie ndaj punës së vet, që po përfundon në këtë mënyrë dhe jo kudo por në Cineplexx. Në Cineplexx, sa unë kam informata, nuk mund të hyj çdo film dhe të prish nivelin e kësaj platforme”, thotë ai.

Sipas tij, kur ai ka dëgjuar se ky film do të shfaqet atje, atij i ka ardhur shumë mirë.

“Kur dëgjova se ky film do të shfaqet këtu, më erdhi shumë mirë dhe pikërisht nga ky fakt se ky film po luhet këtu tregon për nivelin e tij. Po flas pa e parë filmin dhe kur ta shoh, ndoshta meriton edhe shumë më tepër. Por sidoqoftë, sado që është krenari për neve, vetëm shpirti i tij e din se çka do të thotë të bësh film pa asnjë cent”, thotë Petrovci.

Përpos një kaste të aktorëve që tashmë kanë lënë gjurmët e tyre nëpër kujtesën e gjithsecilit, ky film ka paraqitur edhe fytyra të tjera të reja që në këtë film patën një paraqitje të mrekullueshme. Dëshmi për këtë ishin edhe duartrokitjet e shumta që pasuan në përfundim të filmit.

Ndërkaq, filmi ‘Bomba’ do të fillojë të shfaqet nga sonte në kinemanë Cineplexx në Prishtinë. / KultPlus.com

Filmi vendor “Bomba” së shpejti në Cineplexx, ky është traileri zyrtar (VIDEO)

Filmi vendor i metrazhit të gjatë ”BOMBA” vjen në kinematë e vendit, përcjell KultPlus.

”BOMBA” është filmi që shpalos dhe bazohet në ngjarje të vërteta të ndodhura në luftën e fundit në Kosovë.

Filmi konsiderohet të jetë i jashtëzakonshëm dhe krejt ndryshe. I përket zhanrit aksion/triller/dramë dhe ka zgjatur gjithsej tri vite deri në përfundimin e tij.

Në film luajnë aktorët: Enver Petrovci, James Fetahu, Fatos Kryeziu, Bislim Muçaj, Dibran Tahiri, Avni Hoti, Selami Taraku, Kadrije Canolli dhe shumë emra tjerë të skenës tonë filmike.

Ky film premierën do ta ketë me datë 28 korrik në Cineplexx, duke filluar nga ora 20:00.

Më poshtë gjeni trailerin zyrtar të filmit. / KultPlus.com