Etiketë: Dea Open Air

Festivali ndërkombëtar i filmit “Dea open air”, me 39 filma të huaj dhe shqiptarë, do të zhvillohet në datat 23-28 qershor në Tiranë në edicionin e nëntë të tij, me një program të ndarë në pesë seksione.

Në garë për çmimet “Dea” komisionet e përzgjedhjes paraprake kanë përfshirë në program 39 filma nga 25 vende të botës, të ofruar në katër konkurrime dhe një program special, të cilët ndiqen dhe vlerësohen nga pesë juri profesioniste.

Pas pesë vitesh të suksesshme në Sarandë, “Dea” vjen këtë vit për herë të katërt edhe në Tiranë, për ta ndarë ofertën filmike dhe ekspertizën profesioniste evropiane edhe me publikun, studentët dhe kineastët kryeqytetas.

Filmat e paraqitur dhe autorët që marrin pjesë në konkurrim i janë nënshtruar fillimisht seleksionimit paraprak të komisioneve ndërkombëtare, të mbyllur në fund të muajit mars 2022.

Numri i aplikantëve të “Dea open air” ka ardhur në rritje nga viti në vit. Aplikuesit vijnë jo vetëm nga vendet evropiane, por edhe më gjerë, duke i dhënë aplikimit, si në edicionet paraardhëse, gjeografi ndërkontinentale.

Edicioni i nëntë i “Dea open air international film festival” zhvillohet me mbështetjen e Bashkisë Tiranë, Universitetit të Arteve dhe Ministrisë së Kulturës së Republikës së Shqipërisë, Ministrisë së Kulturës së Republikës së Kosovës, të cilët krijojnë atmosferën e nevojshme mikpritëse për prurjet artistike dhe kontributet qytetare nga e gjithë bota./atsh/ KultPlus.com

Ndjeshmëri dhe humanizëm, ku historia bëhet rrëfyesja e duhur për kineastët. Qoftë kjo dhe për skena sureale e përrallore, siç na sugjeroi shfaqje filmit italian. Në këtë fundjavë, program i edicionit të tetë të Festivalit ndërkombëtar Dea Open Air, ka lëvizur nga Tiranë në Prishtinë, nga Italia në Gjermani, nga Irani drejt Amerikës e deri te një histori gjeorgjiane n emigracion…një gjeografi ku shihet qartë se si bota e regjisorëve priret të zbulojë se si kinemaja tingëllon në gjuhë e kultura t ndryshme. Ka tërhequr vëmendjen në këto ditë të festivalit pjesëmarrja e publikut, i cili po ndjek me interesim pothuaj të gjitha programet e Dea Open Air. Vëmendja vjen para së gjithash nga të rinjtë, studentë.

Programi i Filmit Dokumentar“Shkolla plastike”, në fakt, kështu quhej shkolla që u hap në kohën e luftës në Kosovë, së cilës regjisori Ilir Kabashi i referohet në dokumentarin e tij “Mbijetesa dhe shkolla”, të shfaqur të shtunën, në sallën Black Box, në Universitetin e Arteve. Stafi i këtij produksioni ishte i pranishëm në Tiranë, duke sjellë historinë e këtij dokumentari të prekshëm, duke rrëfyer po ashtunxitjen dhe reflektimin e ngjarjes në mediat botërore. “Mbijetesa dhe shkolla” është një histori e bukur për kohët e vështira dhe të liga: në malet e Berishës, në kohën e luftës, u ndërtua një shkollë plastmasi, e cila mblodhi rreth saj 200 nxënës, të fshatrave përreth. Regjisori kishte ndërthurur pamjet e xhiruara gjatë luftës, me kujtimet e nxënësve dhe mësuesve të saj sot, çfarë ka qenë kjo histori për jetët e tyre dhe mësuesve. Historia është prekëse dhe na meson se si dija i largoi ata fëmijë nga trauma e luftës, në disa orë të ditës. Nuhi Bytyçi skenaristi dhe producenti i dokumentarit, ka treguar se në shtator të ’98, gjatë luftës,kanë parë në malet e Berishës disa shtëpi, që bënin gati nxënësit për në shkollë. “Jemi befasuar, kur pamë këtë skenë. Fëmijët prisnin në lëndinë për të hyrë në shkollë. Krahas luftës për liri, po bëhej edhe lufta për civilizim, për dije”, është shprehur në Tiranë, Bytyçi. Ndër kujtimet e hidhura, veçohen rrëfimet interesante të atyre që e përjetuan atë kohë. Regjisori tha se, “ishte një tregim i bukur për një kohë të keqe. Një film bardhë e zi, ashtu siç ka qenë edhe koha”. Një mbresë e fuqishme ishte edhe për drejtorin e fotografisë Bekim Qyqalla, “më e vështira ishte gërshetimi i dy kohërave, sepse fëmijët e rritur, sot ishin të pranishëm me emocione dhe kujtime,që ishte më e veçanta. Ka pasur çaste që kishin fort zbrasje emocionesh për një kohë së cilës ata ikanë mbijetuar”. Për regjisorin Kabashi një moment mjaft emocionues ka qenë kur nxënësve u janë shpërndarë fletoret dhe lapsat, të vetmet mjete mësimi për kohën”Një tjetër dokumentar, është paraqitur në fundjavë në “Dea Open Air”: Sekular. Lindja e Mesme e padukshme, me regji të Hashim Almadani, produksion spanjoll. Në lindjen e Mesme, ekziston një pakicë, e cila nuk praktikon asnjë fe si dhe besimtarë, të cilët nuk i japin përparësi identitetit fetar. Ata jetojnë duke respektuar ligjet me një stil jetese të lirë, nga normat dhe standardet fetare, quhen Sekularë. Sekular, është dokumentari i një regjisori irakian, i cili përpiqet të çmitizojë imazhin që shumica ka për këtë areal. Ai udhëton nga Barcelona në Berlin dhe Stokohlm ku takon emigrantë laikë nga Lindja e Mesme, për të përçuar në Perëndim vizionin e tyre për emigracionin, integrimin dhe identitetin fetar.

Të dielën program i filmit dokumentar u hap me premierën e dokumentarit “Shtegtimi i dhenve”,me skenar dhe regji të Vasjan Lamit. Ky produksion i kushtohet një prej riteve më të veçantë dhemistikë të barinjve në mbarë botën, të cilët shtegtojnë për pesë muaj për të veruar ndër vise të tjera me tufën e tyre. Në qendër të këtij dokumentari, regjisori, ka vendosur Gazin, një bari 45 vjeçar, që e përjeton shtegtimin e bagëtisë së tij si shtegtëtimin e vet. Ai e udhëheq rrugëtimin disaditor dhe të vështirë të kopesë si një Noe modern, drejt “tokës së premtuar”.Lumi shqiptar, Vjosa ka tërhequr vëmendjen e dy regjisorëve gjermanë Mathias Leupold dhe Eric Berg, të cilët ia kanë dedikuar dokumentarin e tyre shqetësimit shoqëror për dëmet natyrore të një fenomeni ekonomik, siç janë projektet për hidrocentrale mbi bukuri natyrore, çka prek edhe Vjosën. Me këtë ndjeshmëri, dy gjermanët, kanë sjellë në “Dea Open Air”, dokumentarin “Në emër të Vjosës”. Vjosa është një nga lumenjtë më të vjetër në Evropë dhe ka ende një rrjedhë natyrore shumë të gjatë (270 km) Ajo gjarpëron përmes një luginë të gjerë që siguron terren për pjelljen e peshkut, si dhe habitate për zogjtë shtegtarë dhe shumë specie të tjera. Për njerëzit që jetojnë në brigjet e saj. Vjosa luan një rol qëndror në jetën e tyre të përditshme. Turizmi rekreativ në Vjosë dhe degët e tij po bëhet gjithnjë e më i rëndësishëm, veçanërisht vitet e fundit, kur sporte të tilla si rafting, vozitje dhe not janë bërë më të njohura. Për më tepër lumi i kristaltë ka një vlerë emocionale për shqiptarët. Vjosa perceptohet si një trashëgimi kulturore, por prodhimi i hidrocentraleve është aktualisht kërcënim më i madh për lumenjtë, vërejnë autorët, – pasi përgjatë seksionit shqiptar të Vjosës, Ministra e Energjitikës, dëshiron të ndërtojë tetë diga…Dokumentari tjetër, “Rojtarët e lumit”, të regjisores Zoritsa Marinkovich, nga Serbia, rrëfen një histori sukesi në të njëjtën temë. Në focus është një fshat i vogël malor në zonat rurale të Serbisë,ku njerëzit u ngritën kundër ndërtimit të një hidrocentrali, i cili kërcënonte të linte pa ujë një komunitet të tërë prej 25 të moshuarish dhe në fund, do të shuante, të gjitha format e jetës në një nga rajonet më të famshme në Serbi. Mbarështueit e bagëtive, fermëret etj,, jeta e të cilëve varet nga uji u ngritën për 120 ditë rresht në barrikada. Ditë e natë, ata me radhë e mbajtën zjarrin ndezur. Në ditën e mbërritjes së papritur të investitorit kur ra këmabana e kishës, ata qëndruan të vendosur për të parandaluar fillimin e projektit. Frika, të ftohtit, dhe mosha nuk e penguan unitetin e tyre dhe vendosmërinë për të ruajtur lumin e tyre të dashur. Aleksandra Gilbert sjell nga Mbretëria e Bashkuar dokumentarin “Mirësevini në Çernobil”: Një ndërhyrje e shkurtër në jetën dhe karrierën e Tanjës, një cicerone ukrainase e zonës famëkeqe të Çernobilit. Një tablo unike  asaj që do të thotë të punosh në rajonin famëkeq, pavarësisht nga rreziqet ekstreme të shëndetit. Heroina nuk trembet, po ngjarjet rreth saj flasin gjuhë tjetër… Gjithnjë kanë qenë të ndërlikuara lidhjet e njeriut me kafshët. Mbi këtë raport, Josefien van Kooten, nga Hollanda sjell në Tiranë dokumentarin “Qentë”: Dokumentar vëzhgues tragjikomik që tregon marrëdhënien komplekse midis njerëzve dhe qenve. Gjatë trajnimit, kufiri midis dashurisë, kontrollit dhe pafuqisë bëhet i dukshëm në marrëdhënien midis njeriut dhe qenit. Njerëzit që kanë problem me qenin e tyre vijnë tek pëshpëritësi i qenve, Ron, për ndihmë. Qentë e tyre shpesh kanë problem, ata refuzojnë të dëgjojnë, tregojnë sjellje shqetësuese, ose janë agresivë dhe kafshojnë. Po duket se jo qentë, por pronarët janë ata, që kanë nevojë për terapi është mesazhi, që jep autori.Programi i Filmit me Metrazh të Gjatë

Një tërmet i madh në Japoninë Lindore, ndodhur më 11 mars 2011 ka lënë pasoja të mëdha. Mbi këtë ngjarje është ndërtuar filmi i regjisorit japonez Yurugu Matsumoto, “Bisedë me qiellin yjor”. Në fokus është katastrofa, e cila bëri që më shumë se 18 mijë vetë, të shpalleshin të vdekurose të zhdukur, ndërsa ende nuk dihet që vdekshmëria e personave me aftësi të kufizuara ishte dyherë më e lartë se te pjesa tjetër e popullsisë. Filmi përshkruan këtë fakt pak të njohur përmes njërrëfimi imagjinar të bazuar në historitë e vërteta të dëshmitarëve, të mbledhura në zonat e goditura. Ky produksion me një narrativë dëshmuese, u shfaq të shtunën, në sallën Black Box. Ngjarjet e Filmit “Brighton Nr.4” me regji të Levan Kogouashvili, Gjeorgji zhvillohen në Amerikë, në një komunitet emigrantësh, për të rrëfyer se  si ata janë integruar në shoqërinë amerikane. Heroi, një ish-kampion i mundjes, Kakhi, i cili është shumë i përkushtuar n daj familjes, ndërmerr për këtë shkak një udhëtim ndërkontinental. Pasi merr masa për të shlyer borxhet e vëllait në lojërat e fatit, Kakhi lë shtëpinë e tij modeste në Gjeorgji, për t’i bërë një vizitë djalit të tij Soso, në pjesën e jashtme të Bruklinit. Sapo vendoset në Brighton ai mëson se i biri i ka një borxh prej 14 mijë dollarësh shefit të mafias lokale, çka bëhet pengesë për të ardhmen e tij në mjekësi. Ashpërsia e jetës sociale në një vend ku norma dhe tradita e izolojnë njeriun, por dhe paragjykimet e zhysin drejt errësirave psikologjike, jepen në një minutazh prej dy orësh në filmin“Metamorfozë thertore”, të regjisorit iranian Javad Daraei. Shadi është një vajzë e vogël, prindërit e së cilës janë akuzuar për vrasjen e një vajze në fshat. Pasi fshatarët i vrasin prindërit për hakmarrje dhe ajo birësohet nga xhaxhai, Shadit i duhet të përballet me problemet që iu shkaktuan bashkëfshatarve. Me jaft interes u prit nga shikuesit aventura filmike e regjisorit Italian Paolo Zucca, “Njeriu që bleu hënën”, një histori sureale, pothuaj një përrallë magjepsëse. Në fakt filmi është një komedi evendosur në Sardenjë bukolike me peizazhet e saj bukolike dhe traditat stërgjyshore. Aty dikush ia ka dalë të marrë lejen për të blerë Hënën, por askush nuk e di pse e bëri atë. Kur lajmi i blerjesshkon në të gjithë vendin, duke arritur në veshët e një agjencie të sigurisë Atlantike, agjenti sekret Kevin (Jacopo Cullin) kujdeset për rastin. Ajo që e pret, megjithatë, është një udhëtim në traditat sardeniane, të cilat janë injoruar gjithmonë nga ai, ndonëse është i asaj toke. Kevinit i duhet të zhytet plotësisht në atë kulturë të mohuar, të cilën, megjithatë, ai e mbart në mënyrë të pashmangshme brenda vetes. Për ta ndihmuar atë në këtë zhytje në “sarditude” do të jetë mizantropi Badore (Benito Urgu). Në këtë itinerar që lëviz midis groteskut, komikes dhe surrealizmit, Kevin rizbulon origjinën e tij dhe sardenjasit, si një popull që mban gjithmonë premtimet. Në Tiranë, për të prezantuar filmin, ka qenë i pranishëm regjisori Paolo Zucca, i cili ka treguar historinë e realizimit të filmit nga zanafilla. Ai tha se nisi të mendojë për këtë film pasi ka lexuar në një gazetë që fliste për një djalë i cili shkruante se ishte pronar i hënës, dhe kishte nxjerrë në shitje një pjesë të saj. “Unë jetoj afër vendit ku janë bërë xhirimet. Për mua ai vend është vetë hëna, ndaj po mendoja se ky djalë po shiste diçka që më përket mua. Ndaj mendova se kjo mund të ishte një metaforë e fuqishme, për forcën e kulturave lokale. Pse regjisori zgjodhi Sardenjën? Zucca përgjigjet se kishte llogaritur që njerëzit të reagonin edhe çuditshëm, por është befasuar pozitivisht, pasi njerëzit e kanë pare edhe disa here, çka thotë se “ e ka bërë të lumur”. “Kjo është komedia e parë në botë, me këtë qasje. Historia e Saradenjës shihet nga këndvështrimi i temave të rënda, si vrasjet, gjakmarrja…ndërsa kjo është një komedi ndriçuese, e lehtë dhe argëtuese për këtë ishull”, tha regjisori.

Programi i filmit te shkurter ne fundjave

Në programin e mbrëmjes, të ditës së hënë, të filmit me metrazh të gjatë do të shfaqen:

Inane – regjisor Besnik Bisha, Shqipëri 2021 – ora 17.00

Putra e lepurit – Nana Djordjadze, Federata Ruse, 20.20./ KultPlus.com

Festivali Ndërkombëtar i Filmit “Dea Open Air” startoi mbrëmjen e së premtes edicionin e tij të tetë me një ceremoni pritëse në Tiranë.

Drejtori i Festivalit, Edmond Topi, duke uruar mirëseardhjen në fjalën e tij tha se, “kinemaja po përpiqet të kapërcejë një krizë të rëndë, e cila ndryshe nga krizat paraardhëse, ende po kërcënon motivin e ekzistencës së kinemasë në kohët moderne…, dëshirën për të konsumuar filmin së bashku…”

Më tej ai vazhdoi se: “Në kushtet, kur festivalet e filmit vijojnë të mbeten alternativë e sigurtë e konsumit të organizuar të filmit pavarësisht pasigurisë së vazhdimësisë, që kinemaja përjeton prej pandemisë, edhe misioni ynë si festival nuk është thjesht dhe vetëm të ndërmjetësojë kulturë, por dhe të garantojë vazhdimësinë e mundësisë për ta bërë këtë.

Në këtë synim të përbashkët me festivalet e tjerë – jashtë dhe brenda kufijve –ne ndihemi krenarë, që për të tetën herë hapim sërish dyert; për produktet filmike prestigjoze nga vendi, rajoni, Europa dhe bota; për katër juri profesionistësh nga vendi dhe nga bota; për studentët, pedagogët dhe produktet e katër akademive të filmit; për kineastët, mediat dhe publikun filmdashës. Mundësia për ta bërë këtë na bën falënderues: – Ndaj institucioneve dhe mbështetësve tanë konsekuentë nga Kosova, mbështetja e pandryshuar e të cilëve na emocionon. Ndaj miqve dhe mbështetësve të festivalit, të cilët me ose pa promocion, e identifikojnë veten me kulturën dhe janë të gatshëm tëinkurajojnë hapat drejt saj. Ndaj bashkëpunëtorëve, që prej vitesh e ndjejnë këtë nismë si të tyren pavarësëisht interesit financiar. Ndaj pjesëmarrësve, që pavarësisht sfidës ekzistenciale, ku na vuri pandemia, s’u bënë as më të paktë dhe as më pak të interesuar…E gjithë kjo mbështetje është garanci suksesi për ne dhe garanci qëndrese dhe vazhdimësie për vetë kinemanë, në emër të së cilës jemi mbledhur sot dhe ditët në vijim…, me synimin dhe dëshirën për t’i dhënë asaj hapësirë maksimale në jetët e pjesëmarrësve dhe publikut të tyre këto ditë…”.

Nisjen e edicionit të tetë të Dea Open Air e ka përshëndetur edhe Bashkia Tiranë, e cila është një nga mbështetëset kryesore të këtij festivalit. “Ndihemi shumë krenarë që Bashkia e Tiranës e ka kthyer në një traditë të bukur bashkëpunimin me Festivalin Ndërkombëtar të Filmit DEA Open Air, duke lidhur kështu një aleancë të mirëfilltë për zhvillimin e qytetit përmes artit dhe kulturës.

Dy vitet që lamë pas ishin jo pak të vështira. Tërmeti dhe pandemia shënjuan çastet kur u rrëzuam, por edhe u ringritëm të gjithë së bashku. E megjithatë, kemi kuptuar  se kemi një forcë të madhe brenda vetes, dashurinë për njëri-tjetrin – kjo është edhe arsyeja pse Tirana është qyteti i zemrave të bashkuara. E teksa po bëhemi gati  të përqafojmë vitin 2022, mbushemi plot optimizëm sa herë kujtojmë se Tirana do të jetë Kryeqyteti Evropian i Rinisë 2022. Do të jetë një ngjarje e jashtëzakonshme për qytetin tonë, që do të zgjasë 365 ditët e vitit të ardhshëm, dhe do ta kthejë metropolin shqiptar në epiqendrën e të rinjve të Evropës”, ishin fjalët përshëndetëse të kryebashkiakut të Tiranës, Erion Veliaj.

”DEA na rimbledh sot sërish – miq besnikë dhe miq të rinj, artistë vendas dhe të ardhur nga jashtë, krijues dhe vlerësues, artbërës dhe artdashës, breza vetëranësh dhe debutantësh të ekranit – të gjithë me një pasion dhe përkushtim të përbashkët, që prej dy vjetësh e kapërcen synimin për kinemanë cilësore – sepse prej dy vjetësh ne mblidhemi për të dëshmuar rezistencë kulturore, për të kontribuar që kinemaja ta mbijetojë pandeminë duke mos e lejuuar pandeminë të sfidojë ekzistencialisht kinemanë… Pas kemi lënë shtashtë edicione të suksesshme me afro 60 filma evropianë me metrazh të gjatë dhe 250 filma me metrazh të shkurtër dhe dokumentarë, të ofruar në afro 50 mbrëmje interesante me art, mendim, biseda tërheqëse dhe personalitete mbresëlënëse si edhe rreth mbi 500 miq të festivalit, që në këto ditë ofruan dhe shijuan kulturë.

Takohemi për të tetën herë së bashku, po dhe për herë të tretë në Tiranë, ku përputhur me pritshmëritë, ia dolëm të startojmë, duke prodhuar mbresa dhe emocione, që shpresojmë se do të mbeten në kujtesë. Madje në kohë pandemie, ndonëse prania e saj u vuri kufi pritshmërive tona dhe i diktoi formën e vet komunikimit tonë me filmin dhe njëri-tjetrin”, tha në fjalën e saj përshëndetëse, Mirela Oktrova, drejtorja artistike e festivalit “Dea Open Air”.

Pritja e mirëseardhjes për miqtë e edicionit të tetë të Festivalit “Dea Open Air”, u bë simbolikisht nga të ftuar të posaçëm, disa autorë në ekspozitën fotografike Etno 2021, të kuruar nga fotografi Ardian Fezollari.

Organizatorët thanë për mediat se numri i aplikantëve të DEA OPEN AIR ka ardhur në rritje nga viti në vit. Edhe edicioni i sivjetëm konfirmon të njëjtën tendencë megjithë kushtet e pandemisë.  Të gjithë pjesëmarrësit kanë aplikuar në platformat  Film Freeëay dhe Festhome ose në rrugë të drejtpërdrejtë në adresën e Festivalit.

Pas seleksionimit paraprak, të mbyllur në fund të muajit Maj 2021, në garë për Çmimet DEA komisionet e përzgjedhjes paraprake përfshinë në programin e sivjetëm gjithsej 57 filma nga rreth 30 shtete, të cilët do të konkurojnë në 4 seksione. Aplikuesit vijnë jo vetëm nga vendet evropiane, por edhe më gjerë, duke i dhënë aplikimit – si në edicionet paraardhëse – gjeografi ndërkontinentale.

Në qendër të festivalit vijon të jetë Programi i Filmit me Metrazh të Gjatë, në të cilin sivjet marrin pjesë filma nga Kosova, Japonia, Rusia, Italia, Irani dhe Shqipëria. Ky program fillimisht i planifikuar të ofrohet në Kinema DEA 1, në Amfiteatrin e Universitetit të Arteve, në orën 19.00 dhe për shkak të motit dhe temperaturave të ftohta do të ofrohet në Kinema DEA 2, në sallën Black Box të Universitetit të Arteve në orën 17.00.

Si çdo vit pjesë e festivalit janë edhe: Seksioni i filmit të Shkurtër – me 16 filma nga 14 vende të botës, të cilët do të ofrohen çdo pasdite në Sallën Black Box, në orën 15.00, Seksioni i Filmit Dokumentar – me 16 filma nga 13 vende të botës, i cili do të ofrohet çdo paradite në orën 11.00 në Kinema DEA 3 ose Sallën Black Box 2 si edhe Seksioni i Filmit Studentor, i cili do të ofrohet në mjediset e Galerisë FAB, në orën 13.30.

Kontributet filmike në seksionet e përkatëse do të vlerësohen nga ana profesionale dhe artistike nga tri juri profesionale ndërkombëtare. Sipas traditës, për nga rëndësia shoqërore e mesazhit për komunitetin, filmat do të vlerësohen dhe nga Juria e Medias.

Pas ndërprerjes së vjetshme, të diktuar prej kushteve të pandemisë, në kuadrin e Edicionit VIII të DEA OPEN AIR International Film Festival rifillon aktivitetin e vet Akademia DEA, në kuadrin e së cilës në datat 16-19 Tetor 2021 organizohet Takimi Rajonal i Shkollave të Filmit.

Këtë vit pjesëmarrësit vijnë nga Prishtina (Departamenti i Regjisë së Fimit dhe Televizionit të Fakultetit të Arteve të Universitetit të Prishtinës), Shkupi (Akademia Europiane e Filmit në Shkup), Bratislava (Fakulteti i Filmit dhe Televizionit i Akademisë së Arteve Performuese në Bratislavë) dhe Tiranë (Departamenti i Filmit dhe Televizionit të Universitetit të Arteve në Tiranë). Rendi i ditës parashikon ofrimin e një programi të posaçëm të studentëve të shkollave pjesëmarrëse të filmit (3 orë program të përditshëm), shoqëruar me prezantimin e ofertës akademike e kulturore përkatëse si edhe tryeza të rrumbullakëta për problemet rajonale të kinemasë dhe formimit të kineastëve të rinj. Takimi do të zhvillohet në mjediset e Akademisë DEA – Galeria FAB e Universitetit të Arteve./KultPlus.com

Edicioni i pestë i festivalit do të fillojë nga 2 shtatori do të zgjatë deri më 8 shtator, edhe këtë vit “Dea Open Air” për publikun ka përgatitur një program me filma të ndryshëm të kinemasë shqiptare dhe të huaj.

Numri i aplikantëve të festivalit sipas organizatorëve ka ardhur në rritje nga viti në vit. Edhe edicioni i sivjetëm konfirmon të njëjtën tendencë rritëse. Ata vijnë jo vetëm nga vendet evropiane, por edhe më gjerë, çka i jep pjesëmarrjes një gjeografi ndërkontinentale. Filmat e paraqitur dhe autorët pjesëmarrës në konkurrim i janë nënshtruar fillimisht seleksionimit paraprak të komisioneve ndërkombëtare, të mbyllur në fund të muajit Mars.

Këtë fazë e kaluan 258 filma, 34 filma të metrazhit të gjatë dhe 224 të shkurtër.

Sipas traditës edhe në këtë edicion konkurimi do të ndiqet nga disa juri, të përbëra me personalitete të njohura të kulturës, kinemasë dhe medias në rajon dhe më gjerë. Juria e filmit me metrazh të gjatë, e përbërë nga Clemens Erbach regjisor nga Gjermania, Isabelle Welter producente nga Austria, Rusomir Bogdanovski skenarist dhe pedagog i skenarit nga Maqedonia, Genc Përmeti skenarist dhe producent nga Shqipëria, Luan Kryeziu regjisor dhe skenarist nga Kosova, shkruan rtv21.tv.

Juria e filmit të shkurtër, e përbërë nga: Dominik Streib pedagog nga Gjermania, Kimete Berisha zyrtare e larte e kinematografisë nga Kosova, dhe Eliodor Markja regjisor montazhi.

Juria e medias, e përbërë nga: Ylli Sula drejtor i Çelësi Media Grup nga Shqipëria, Kamuran Goranci drejtues i Divizionit të Arteve në MKRS nga Kosova dhe Eda Merepeza – gazetare dhe përkthyese.

Edicionin e pestë të “Dea International Film Festival” e mbështet Ministria e Kulturës dhe Qendra Kombëtare e Kinematografisë, si dhe Bashkia e Sarandës./ KultPlus.com

Prej datës 27 gusht deri në 2 shtator në Sarandë shtrohet tapeti i kuq i kinemasë; prej katër vitesh në qiell të hapur mbahen ditët e festivalit ndërkombëtar të Filmit “Dea Open Air”, një kalendar i pasur për nga tematika dhe vendet pjesëmarrëse që do të ballafaqojë kinemanë bashkëkohore dhe individualitetin në filma autor

Në datat 27 Gusht deri më 2 Shtator 2017, Festivali Ndërkombëtar i Filmit Dea Open Air do të zhvillojë edicionin e tij të katërt. Festivali vijon traditën e të qenit vizitor në stolinë e rivierës shqiptare, Sarandë. Shfaqjet Open Air do të organizohen në Kinema Limani dhe Kinema Bougainville. Në Kinema Limani është planifikuar të organizohet Ceremonia zyrtare e Hapjes së Edicionit IV të Festivalit Ndërkombëtar të Filmit Dea Open Air Sarandë – 2017, si edhe do të ofrohen dy programet kryesore të festivalit: programi i Filmit me Metrazh të Gjatë dhe programi i Filmit të Shkurtër. Në Kinema Bougainville është menduar të organizohet për herë të parë programi “Miqtë e Kinemasë”, me shfaqje speciale filmash jashtë konkurrimit si edhe Ceremonia e Ndarjes së Çmimeve të Edicionit IV të Dea Open Air Festival Sarandë – 2017.

Numri i aplikantëve të DEA OPEN AIR ka ardhur në rritje nga viti në vit. Edhe edicioni i sivjetmë konfirmon të njëjtën tendencë rritëse. Të gjithë aplikuesit dhe pjesëmarrësit e përzgjedhur kanë aplikuar në platformat Film Freeway dhe Festhome ose në rrugë të drejtpërdrejtë në adresën e Festivalit. Ata vijnë jo vetëm nga vendet europiane, por edhe më gjerë, çka i jep pjesëmarrjes një gjeografi ndërkontinentale. Filmat e paraqitur dhe autorët pjesëmarrës në konkurrim i janë nënshtruar fillimisht seleksionimit paraprak të komisioneve ndërkombëtare, të mbyllur në fund të muajit Mars.

Në garë për Çmimet DEA komisionet e përzgjedhjes paraprake kanë menduar të përfshijnë sivjet 6 filma të gjatë për Seksionin e filmit me metrazh të plotë ose konkurrimin kryesor, si dhe 35 filma në Seksionin e filmit të shkurtër. Vetë filmi i shkurtër ofrohet këtë vit në dy nënkategori: konkurrim ndërkombëtar dhe konkurrim studentor. Kategorizimi reflekton natyrën e krijimtarisë dhe profilin e autorëve të tyre. Programi special “Miqtë e Kinemasë” do të ofrojë edhe 6 filma të tjerë me metrazh të plotë, ku përfshihen tituj të përzgjedhur filmash, të prodhuar nga autorë të huaj dhe vendës. Për drejtorin e DEA OPEN AIR, Edmond Topi, “Kinemaja, që prezantohet këtë vit në programin kryesor të festivalit paraqet imazhin e Europës, ku dëshirojmë të shkojmë dhe të cilës duam t’i përkasim – një imazh, për këtë arsye tepër të vlefshëm për t’u njohur dhe promovuar. Kësaj prezence europiane i rri me dinjitet në krah edhe një buqetë e vërtetë gjetjesh, trajtimesh dhe individualitetesh nga e gjithë bota, që festivali planifikon t’u ofrojë të ftuarve të vet profesionistë dhe publikut të interesuar në programin e filmit të shkurtër”.

Sipas traditës edhe në këtë edicion konkurrimi do të ndiqet nga disa juri, të përbëra me personalitete të njohura të kulturës, kinemasë dhe medias në rajon dhe më gjerë.

Juria e filmit me metrazh të gjatë, e përbërë nga: Veton Surroi (shkrimtar dhe publicist – Kosovë), dr. Cathy de Haan ( studiuese e filmit dhe komunikimit – Gjermani), Mevlan Shanaj (regjisor – Shqipëri), Zhaklina Oshtir (aktore, Mal i Zi), Agron Vula (regjisor dhe producent – Kosovë) do të ndjekë programin e filmit me metrazh të gjatë, si edhe do të akordojë çmimet DEA për Aktorin/Aktoren më të mirë në rol kryesor; Fotografinë/Kameran më të mirë; Skenarin më të mirë, Regjinë më të mirë dhe Filmin më të mirë në konkurrimin e filmit të gjatë. Kjo juri ndan çdo vit edhe Çmimin Special të destinuar për kontribute të spikatura të artistësh të rinj me karrierë premtuese në kinematografi.

Juria e filmit të shkurtër, e përbërë nga: Natasha Lako (poete dhe skenariste); Ema Andrea (aktore) dhe Sokol Krasniqi (grafist) do të ndjekë programin e filmit me metrazh të shkurtër, si edhe do të akordojë çmimet DEA për Montazhin më të mirë dhe Regjinë më të mirë në konkurrimin e filmit të shkurtër, Filmin e shkurtër më të mirë si edhe dy çmime, që ndahen nga partnerët mediatikë të Festivalit Ndërkombëtar të Filmit DEA OPEN AIR. DEA për Angazhim qytetar (Çmimi i TV Klan) dhe DEA për Idenë më të spikatur (Çmimi i RTV 21 – Kosovë)

Juria e medias, e përbërë nga: Astrit Idrizi (regjisor dhe producent), Violeta Murati dhe Shpresa Dine – gazetare. Sfidë e Edicionit të Katërt të DEA OPEN AIR mbetet afrimi i audiencave me filmin. Për këtë qëllim krahas promovimit të aktivitetit dhe produktit filmik në qytet dhe në media, DEA në bashkëpunim me Neptun Saranda do të organizojë dhe një llotari, në fund të të cilit do ndahet sivjet Çmimi i publikut. Pjesëtarët e publikut do të pajisen në hyrje të kinemasë me një formular vlerësimi për filmin, të cilin do ta dorëzojnë kur të largohen. Formularët e mbledhur do të shërbejnë si bileta për llotarinë dhe si bazë vlerësimi për Çmimin e publikut.

Sivjet për herë të parë do të ndahen dy çmime publiku – meqë në gjininë e filmit të shkurtër konkurrojnë edhe 20 studentë, një juri e përbërë nga studentë të Universitetit Mesdhetar do të ndajnë çmimin DEA për Filmin më të mirë studentor. Edicionin e Katërt të DEA International Film Festival e mbështet Ministria e Kulturës dhe Qendra Kombëtare e Kinematografisë, të cilat së bashku me Bashkinë e Sarandës krijojnë atmosferën e nevojshme mikpritëse për prurjet artistike dhe kontributet qytetare nga e gjithë bota. Specialistët e kinemasë, drejtorët e disa festivaleve të tjera europiane të filmit, por dhe aktorët, regjisorët, producentët dhe gazetarët e ftuar i japin aktivitetit gjallërinë dhe komunikimin shumëdimensional, që kinemaja gjithnjë premton dhe realizon./Mapo.al/