Festivali i Resë

Festivali i Resë shënon këtë vit edicionin e tij të 9-të, duke bërë një përzierje të traditës me bashkëkohoren.

Për 11 netë radhazi, sikurse çdo vit, edhe këtë radhë tek Reja do të udhëtojmë kulturalisht në vende shumë të afërta dhe po ashtu në ato shumë të largëta: nga Shqipëria dhe rajoni i Ballkanit, në vende që kufizohen me Detin Kaspik dhe Malet e Kaukazit, Oqeanin Atlantik dhe Detin Mesdhe, Oqeanin Paqësor dhe Detin Karaibe, Skandinavinë dhe Kanadanë.

Mbi 100 artistë nga Azerbajxhani, Meksika, Maroku, Greqia, Turqia, Italia, Franca e te tjera, do të mblidhen në Tiranë për performanca intime dhe të zhurmshme të vallëzimit bashkëkohor, artit të performancës, muzikës, poezisë së performuar, bisedave, workshop-eve, prezantimeve, si dhe shfaqjeve festive me ansamble, orkestra, kore dhe DJ.

Performancat në bahçen e Resë, ashtu si çdo vit, do të jenë falas dhe do presin çdokënd, prej 21-31 majit./atsh/KultPlus.com

Festivali i Resë është kthyer tashmë në një emblemë të ndërthurjes së bashkëkohores me tradicionalen, ku një vend të veçantë në program, që prej edicionit të tij të parë e ka zënë promovimi i muzikës sonë popullore dhe traditës unike të muzikës polifonike.

Në radhët e artistëve dhe ansambleve performues ka qenë edhe Grupi folklorik i Vlorës “Bilbili”, i krijuar në vitin 1994.

Ky grup, i cili interpretoi mbrëmë në kuadër të “Festivalit të Resë”, ne mjediset e Kalasë së Tiranës, radhitet ndër më të mirët, jo vetëm në Shqipëri, por i spikatur edhe në skenat ndërkombëtare.

Në themel të këngës së grupit “Bilbili” është polifonia labe e disa trevave të Labërisë. / atsh / KultPlus.com