Sot, më 1 gusht, përkujtohet lindja e Herman Melville, një prej figurave më emblematike të letërsisë amerikane. I lindur më 1819 në Nju Jork, Melville mbetet i njohur sidomos për romanin e tij madhor Moby-Dick, një vepër që në kohën e botimit nuk pati sukses të menjëhershëm, por që sot konsiderohet si një prej kryeveprave të letërsisë botërore.
Rruga krijuese e Melville-it ishte e mbushur me sfida. Ai nisi si detar në rini, duke përjetuar udhëtime që më vonë do të përbënin frymëzimin për romanet e tij të para, si Typee dhe Omoo. Por ishte Moby-Dick, i botuar në vitin 1851, që do ta vendoste përfundimisht si një zë të veçantë në letërsinë universale – një histori e fuqishme që përshkruan ndjekjen obsesive të kapitenit Ahab pas balenës së bardhë.
Gjatë jetës, Melville nuk e përjetoi suksesin e kësaj vepre. Ai ndërroi jetë në vitin 1891 në varfëri relative dhe me vepra të harruara. Vetëm në shekullin XX, kritika letrare e rishqyrtoi punën e tij dhe e vendosi në qendër të kanonit amerikan.
Sot, trashëgimia e Melville-it është e gjallë në bibliotekat, universitetet dhe kulturën botërore. Vepra e tij vazhdon të lexohen, analizohen dhe të frymëzojnë breza të rinj me reflektime mbi njeriun, natyrën dhe absurditetin e fatit.
Në një botë gjithnjë në kërkim të kuptimit, Melville na kujton se pyetjet më të mëdha nuk kanë përgjigje të lehta porse kërkimi i tyre është çka e bën jetën lexim të denjë./KultPlus.com
