Shqiptarja nga Shkupi ideatorja e Himnit për Nënë Terezën

Dijana Toska, gazetare e njohur në Shkup është ideatorja e Himnit për Nënë Terezën. Në mendje i vinin vargjet e poezisë “Lamtumirë”, që shenjtorja shqiptare i kishte shkruar kur po largohej, më 1928, për në Kalkutë.

Në dhjetor të vitit 2014, teksa në Shkup po mbahej simpoziumi kushtuar 100 vjetorit të vdekjes së pagëzuesit të Nënës Tereze, Don Zef Ramaj, Dijana Toskës i lindi ideja që poezinë e shkruar nga duart Nënë Terezës, ta shndërroj në një testament që do të shërbejë si kod moral i bekimit të njerëzimit. Me shumë dashuri e energji të pakursyer gazetarja e njohur punoi që kjo ëndërr të realizohet dhe me 5 shtator të gjithë të dëgjojmë së bashku tingujt e Valsit Hyjnor, përcjellë INA.

Ajo ka përzgjedhur poezinë “Lamtumirë” shkruar nga bamirësja e madhe në anije kur po largohej më 1928 për në Kalkutë, Indi. Muzikën e kishte shkruar kusheriri i saj, Lorenc Antoni me kërkesë të Don Lush Gjergjit, pak para vdekjes së tij. Me 5 janar 2015, në Katedralen në Prishtinë, Dijana takoi, Don Lush Gjergjin ku i paraqiti projekt idenë për Himnin dhe shtëpinë e Nënës Terezës i cili përçon tri mesazhe: universal, fetar e kombëtar.

“Ky është Himni që populli shqiptar do t’i falë botës dhe çdo manifestim kudo në botë që do të organizohet për Nënën Terezë, do të përcillet me Himnin e saj”, thekson Dijana Toska./KultPlus.com

Himni i Nënës Terezë, prej sot u bë pjesë e Shtëpisë së Nënës Terezë në Shkup

Në 107 vjetorin e lindjes së Gonxhe Bojaxhiut, ideatorja dhe producentja e Himnit të Nënës Terezë, Dijana Toska, i dhuroi DVD e Himnit të Nënës Terezë, të dizajnuar nga njerëzit me aftësi të kufizuara, drejtoreshës së Shtëpisë së Nënës Terezë në Shkup, Renata Kutera Zdravkovska, përcjellë KultPlus.

Poezinë “Lamtumirë“ të cilën Gonxhe Bojaxhiu e kishte shkruar më vitin 1928, rrugës nga Irlanda për Kalkutë, në vitin 2015 me kërkesë të producentes, kompozitori Genc Tukiqi, bazuar mbi një ide të Lorenc Antonit e kishte shndërruar këtë poezi në vepër artistike, të cilën e interpreton, sopranoja e njohur, Inva Mula. Nën dirigjimin e maestros, Bujar Llapajt dhe realizimin e Korit dhe orkestrës së Filharmonisë së Kosovës, instrumentistëve nga Shqipëria e Maqedonia.

“Valsi Hyjnor” më 5 shtator 2015 u përurua në Prishtinë, ndërsa më 3 shtator 2016 në vigjile të Shenjtërimit të Nënës Terezë, u interpretua në Vatikan.

Në muret e Shtëpisë Muze të Nënës Terezë është e varur poezia “Lamtumirë“ vetëm në gjuhën serbe ”OPROSTAJ“, por që nga sot aty pranë do të vendoset edhe DVD me përmbajtje shqip ashtu siç e shkroi me dorë të vet, Gonxhja jonë. / KultPlus.com