“Moj e bukura More”, kënga magjike pas së cilës fshihet një histori e dhimbshme

Të gjithë e kemi dëgjuar këngën “Moj e bukura More”, një ndër lirikat më të bukura të shkruara ndonjëherë për atdheun. Por pas këtyre vargjeve fshihet një histori e rrallë, e trishtë dhe e shprehur aq bukur sa rrallë herë mund të haset në këngët e asaj kohe.

Në shekullin XVI, një pjesë e banorëve të trojeve arbërore u detyruan të largoheshin nga aty drejt bregut tjetër të Adriatikut duke kërkuar atje paqen dhe lumturinë që në trojet e tyre pushtuesi turk po ia mohonte. Ata vinin nga Veriu dhe Jugu, nga Lindja dhe Perëndimi, nga fushat e malet e atyre trojeve me një bukuri të rrallë dhe shumë të lakmueshme dhe, veç të tjerash, bashkoheshin edhe në dhimbjen për lënien e atdheut.

Vuajtjet e përjetuara gjatë kësaj vale emigrimi përshkruhen më së miri në kronikat e kohës. Papa Piu II i shkruante Dukës së Burgonjës, Filipit: “Nuk mund t’i shohë njeriu pa derdhur lot këta refugjatë nëpër limanet e Italisë të uritur e të zhveshur, të shpërngulur nga vatrat e tyre që rrinë anës detit e ngrenë në qiell duart. Qajnë e vajtojnë në një gjuhë që s’ua marrim dot vesh.”

Në këtë dhimbje, duke kaluar ditët në vendet larg atdheut, nga shpirti i arbërve që u larguan nga Moreja, lindi një ndër elegjitë më të bukura, lirikat më të ndjeshme të shprehura në disa vargje të magjishme. “Moj e bukura More” mbetet edhe sot si lajtmotivi i dhimbjes shqiptare ndër shekuj, kur ata, të detyruar, i kthyen atdheut shpinën, por në të lanë zemrën, shkruan Konica.al. Dokument i kësaj kënge për herë të parë gjendet në dorëshkrimin e Kieutit botim i vitit 1708, më pas këtë material do ta ribotonte në librin e tij filologu arbëresh Dhimitër Kamarda (1821-1882), në vitin 1866. Në këtë lëndë është publikuar teksti i kësaj kënge i shkruajtur në shqip, por me alfabet grek:

Moj e bukura More,
si të lash e më s’të pash!
Si të lash, si të lash,
siç të gjeta ngë të lash!
Atje kam unë zotin At’,
atje kam unë zonjën Mëmë,
atje kam dhe tim vëlla,
gjithë mbuluar,
të gjithë mbuluar,
të gjithë mbuluar nën dhe!
Ah e bukura More!

LLOCH sjellë “M’ka met” (VIDEO)

Pas parodive “Heroi” dhe “I huqti” “LLOCH” sot ka lansuar këngën më të re “M’ka met”.

Niher ‘Lema mu’, mandej kqyrim ‘A ka Hala’, këto janë dy veti që personazhi LLOCH ka vendosur t’i trajtojë këtë herë përmes parodisë “M’ka met” që është parodia e 3-të e tyre./ KultPlus.com

“Anywhere” e Rita Orës kënga më në trend në Britani të Madhe (VIDEO)

Këngëtarja shqiptare me famë botërore, Rita Ora, për javën e dytë rresht është duke prirë në listën e këngëve më trend në top-listën zyrtare të Britanisë së Madhe me këngën “Anywhere”.

Kënga udhëheq listën e 20 këngëve të reja me ndikim në Britani të Madhe.

“Anywhere” debutoi në pozitën e 20-të në listën e top-këngëve, ndërsa tani është në vendin e 11-të në total. Këtë të premte, ajo pritet të hyjë në top-7 këngët më të dëgjuara.

Përpos kësaj kënge, Rita Ora është në top-5 këtë javë edhe me këngën “Lonely Together” të lansuar në bashkëpunim me Aviciin. Ajo këngë është në pozitën e katërt.

Në top-20 të listës për këtë javë është edhe Dua Lipa me “New Rules” që pozicionohet e 17-a./ KultPlus.com

Lana Del Rey këndon këngën e Cohen me djalin e tij (VIDEO)

Lana Del Rey i është bashkuar Adam Cohen-it, për ta performuar duetin e një kënge të shkruar nga babai i këtij të fundit, Leonard Cohen.

Të dy ishin disa nga aktet që kënduan në nderim të Cohen në Montreal të Kanadasë.

Ata kënduan këngën “Chelsea Hotel No.2” që është pjesë e incizimit “New Skin for the Old Ceremony” që Cohen e kishte publikuar më 1974.

Elvis Costello, Feist, Sting ishin po ashtu disa nga pjesëmarrësit në këtë performancë nderuese për Cohen-in./ KultPlus.com

Lana & Adam / Chelsea Hotel

A post shared by Karyne Tremblay (@karynetremblay) on

Shkëlqimi i Ritës bashkë me Kosovën në 5 vjetorin e ‘Shine ya light’ (VIDEO)

Pas ‘Hot Right Now’, ‘R.I.P’ dhe ‘How we do’ zëri i mrekullueshëm i kosovares e cila për pak kohë u bë yll botëror erdhi në vendlindje.

Vendlindja e këngëtares Rita Ora i dha pamjet ideale videoklipit të këngës ‘Shine ya light’. Ishin plotë 4 vite, pasi që, Kosova u shpall shtet i pavarur kur Rita, u kthye në Prishtinë për të bërë hitin e saj të radhës. Fëmijë, të rinj, të reja e të moshuar u bënë pjesë e këtij videoklipi që më vonë u bë edhe videoja që promovoi shtetin më të ri asokohe në botë Kosovën.

‘We gold, we gold we shine’, ishte refreni i këngës së Rita Orës, këngë kjo që pas katër ditëve mbush plotë pesë vite jetë. Më 4 nëntor të 2012-së, doli ky videoklip me bashkëvendësit e Ritës. Ditën kur u xhirua videoklipi, shumë qytetarë zbarkuan në kryeqytetin kosovar. Skena kur Rita u drejtohet mijëra adhuruesve të saj ishte pikërisht ajo mbi mbishkrimin ‘Lindje e Re’ apo ‘New Born’ që ndodhet pikërisht përpara Pallatit të Rinisë. “Nuk më besohet që jam në Kosovë”, kishte thënë Rita, ku brohorimat dhe fjalët e saj u bënë pjesë e këtij klipi të klikuar miliona herë nga njerëz nga mbarë bota.

KultPlus, po e sjellë këtë këngë pak ditë para se t’i mbush pesë vite nga realizimi i saj./ KultPlus.com

‘Nuk betohem dot’ në kujtim të Adelajdës (VIDEO)

Gazetarja Adelajda Xhamani, u nda nga jeta ditën e diel të 29 tetorit nga një atak kardiak.

Adelajda apo Adela, siç e thërrisnin të gjithë u bë pjesë e edicionit të dytë të Big Brother Albania, aty ku nisi të ndryshohej rrënjësisht jeta e saj.

Në BB 2, Adela krijoi një lidhje dashurie me njërin ndër konkurrentët, Bjordin.

Adela dhe Bjordi, pasi që, përfunduan garën në BB Albania 2, bënë një këngë me të cilën morën pjesë në Kënga Magjike në vitin 2010-të. ‘Nuk betohem dot’, ishte një këngë mjaft e pëlqyer nga audienca shqiptare dhe ende vazhdon të dëgjohet.

KultPlus, po e sjellë sot këtë këngë duke e kujtuar Adelajdën, e cila ndërroi jetë dje në moshën 31 vjeçare dhe la në gjysmë ëndrrën e saj.

Ajo mbante aktualisht postin e kryeredaktores në një revistë, ndërsa ishte shpesh e ftuar në studiot televizive për të folur rreth botës së showbizit. Ndërsa ‘Shtëpia e Adelajdës’ ishte emisioni i saj i cili pritej të fillonte më 15 nëntor./ KultPlus.com

Esma Rexhepova dhe magjia që sjellë me këngën ‘Caje Sukarije’ (VIDEO)

Pak muaj para se t’i mbush plotë 1 vit nga ndarja nga jeta, KultPlus, po e kujtojnë sot këngëtaren Esma Rexhepova, me këngën ‘Caje Sukarije’.

Këtë këngë Esma e pati kënduar në televizionin Klan të Shqipërisë në kuadër të Këngëve të Shekullit në vitin 2011.

Rexhepova e quajtur Mbretëresha e muzikës rome në nivel botëror, ishte zgjedhur artiste nacionale në vitin 2013, ndërsa gjatë jetës së saj është përkujdesur për 47 fëmijë dhe ka mbajtur shumë koncerte humanitare./ KultPlus.com

Kënga heroike arbëreshe kushtuar vdekjes së Gjergj Kastriotit

Shkruan Aurenc Bebja

Kënga e më poshtme, kushtuar Gjergj Kastriotit, është marrë në veprën e shkrimtares me origjinë shqiptare, Dora d’Istria-s (Elena Gjika), me titullin : “La nationalité albanaise d’après les chants populaires – Kombësia shqiptare sipas këngëve popullore”.

Vepra e Elena Gjikës është botuar në vitin 1866 në gjuhën frënge në “Revue des Deux Mondes”, Paris. Autorja ka përmbledhur disa këngë popullore shqiptare, ku njëra prej tyre i dedikohet heroit tonë kombëtar.

Më saktësisht, autorja e ka marrë këngën për Skënderbeun në veprën “Su gli Albanesi, ricerche e pensieri” të shkrimtarit arbëresh, Vincenzo Dorsa, të botuar në vitin 1847 në Napoli.

Ja kënga në vijim:

Kur u nis Skënderbeu për në luftë, gjatë rrugës që po ndiqte, ai takon Vdekjen, e dërguara e hidhur e aventurës së trishtë. – Emri im është vdekja : kthehu mbrapsht, o Skënderbe, sepse jetës tënde po i vjen fundi – Ai e dëgjon, e vështron, nxjerr shpatën, ndërsa ajo qëndron e shtangur.

Hije e erës, që tremb vetëm frikacakët, nga e di ti se unë duhet të vdes? Zemra jote e ngrirë a mund të profetizojë zhdukjen time ? Apo të është hapur libri i fatit të heronjve ?

Dje, në qiej, u hapën për mua librat e fatit. E zezë dhe e ftohtë si një vello, ajo zbriste mbi kokën tënde, dhe më pas ajo u hodh mbi të tjerët.

Skënderbeu përplas duart, dhe zemra e tij lëshon një ofshamë. Ah ! Fatkeq! Më erdhi fundi. Ai fillon të kujtojë të kaluarën ; sheh djalin e tij të rritet pa baba dhe mbretërinë mes lotëve. Ai mbledh luftëtarët e tij dhe u thotë :

Luftëtarët e mi besnikë, Turku do të pushtojë të gjithë tokën tuaj, dhe ju do të bëheni skllevërit e tij. Dukagjin, më sjell këtu djalin tim, këtë djalë simpatik, kështu që t’i jap mendimin tim. Lule e braktisur, lule e dashurisë sime, merr me vete nënën tënde dhe përgatit tri nga anijet më të mira. Nëse Turku e merr vesh (e ka fjalën për vdekjen e tij), ai do të të rrëmbejë dhe do të fyejë nënën tënde. Zbrit drejt plazhit : aty, ka një selvi të errët e të trishtë. Lidh kalin tim në atë selvi, dhe vendos flamurin tim mbi të, që të valvitet nga erërat e detit, dhe vari atij shpatën time. Gjaku i Turqve ka mbetur në pjesën e mprehtë të saj në të cilën fle vdekja. Nën pemën e zezë, armët e luftëtarit të frikshëm a do të qëndrojnë të heshtura ? Kur fryen era e tërbuar, kali hingëllon, flamuri valvitet, shpata jehon. Turku do ta dëgjojë, dhe, duke u dridhur, i zbehtë, i trishtuar, do të tërhiqet duke menduar për vdekjen./ KultPlus.com

‘O zambak lule n’parajsë’ fitoi çmimin e parë të ‘Zambakut të Prizrenit’

“O zambak lule n’parajsë” është fituese e edicionit të 29-të të festivalit “Zambaku i Prizrenit”, i cili u mbyll mbrëmë.

Në kinemanë Lumbardhi në Prizren, të dielën në mbrëmje u mbajt edicioni i 29-të i këngës së vjetër qytetare “Zambaku i Prizrenit”.

Në edicionin e 29-të u paraqitën 15 këngë, të cilat garuan për çmimet tradicionale të festivalit.

Juria profesionale në këtë përbërje: Kriste Lekaj ( kompozitor), Butrint Bicurri (kompozitor), Kreshnik Aliçkaj (kompozitor), dhe Osman Goranci (publicist), vendosi që çmimin e parë t’ia ndajë këngës “O zambak lule n’ parajsë” me tekst të Hivzi Krasniqit, kompozuar dhe orkestruar nga Tomor Berisha, e kënduar nga Majlinda Cikaqi dhe Kushtrim Kelani.

Çmimin e dytë e fitoi kënga “Ugurlar olsun” me tekst të autorit Shahin Çangae, kompozuar nga Hysein Kazaz, orkestruar nga Edon Ramadani e kënduar nga Tolga Kazaz.

Çmimin e tretë e ftoi kënga “Elegji për dashuri” e Artan Bakisë, i cili e ka bërë tekstin, kompozimin, orkestrimin dhe e këndoi.

Çmimin “Zambaku i argjendtë” si çmim i publikut e fitoi kënga “Balada X” me tekst të autorit Lebit Murtishi me kompozim dhe orkestrim të Besim Berishës e kënduar nga Andi Qerreti dhe Vanesa Kastrati.

Për interpretim më të mirë u vlerësua këngëtari Ilsi Ademi.

Teksti më i mirë u vlerësua teksti i këngës “Violine e vjetër” i autorit Agron Kalludra./ KultPlus.com