Ngrihet Qendra për Studime dhe Publikime për Arbëreshët

Ngritja e Qendrës për Studime dhe Publikime për Arbëreshët, ngritja e Komitetit Shtetëror të Diasporës janë në qendër të pr/ligjit të propozuar nga deputeti i Partisë Socialiste, Adnor Shameti që po diskutohet sot në Kuvend.

Deputeti Shameti në fjalën e tij në Kuvend u shpreh se, “ndryshe nga Qendra e Studimeve dhe Publikimeve për Arbëreshët, e cila nuk është e parashikuar në ligj, por është krijuar me VKM, Komiteti Shtetëror për Diasporën është parashikuar në ligjin e vitit 2018, si organ shtetëror përgjegjës për marrëdhëniet me Diasporën, por nuk ka një përkufizim të qartë ligjor të rolit të tij, përveç parashikimeve në vendimin përkatës të VKM”.

Për këtë arsye theksoi ai, “është e domosdoshme që të bëhen ndërhyrjet e duhura në legjislacion me qëllim për përditësimin e legjislacionit”.

“Kjo është gjuha origjinale e nismës time ligjore në azhornimin e këtyre dy pikave të para. Nga ana tjetër gjatë shqyrtimit të ligjit në Komisionin për Politikën e Jashtme, ministri i Shtetit për Diasporën ka propozuar dhe amendamentet e tij që janë bërë pjesë integrale e propozimit të bërë në variantin që kemi paraqitur për miratim përpara Kuvendit dhe amendamentet e tij konsistojnë në dhënien e bursave të studentëve nga komunitetet shqiptare në Diasporë për të studiuar në Universitetet e Shqipërisë si dhe dhënien e çmimeve kombëtare dhe medaljeve për kontribut të veçantë në ruajtjen, forcimin e lidhjeve, ndërmjet vendit të origjinës dhe Diasporës, promovimin e Shqipërisë në botë dhe përkrahjen e interesave të saj”, tha Shameti.

Ai u shpreh se, “forcimi i lidhjes ndërmjet vendit të origjinës dhe Diasporës është një ndër politikat më të rëndësishme shtetërore, e cila ka rol kyç dhe thelbësor në promovimin e Shqipërisë në arenën ndërkombëtare. Dhënia e bursave dhe çmimeve kombëtare do ta forconte dhe më shumë këtë rol si dhe do të nxiste bashkëpunimin mes komuniteteve të shqiptarëve kudo në botë”.

Shameti theksoi se “pr/ligji nuk ka kosto financiare”. Ndërsa sa i takon kostove të miratimit të bursave, Shamti tha se, “ato do të administrohen brenda buxhetit që i akordohet Agjencisë Kombëtare të Diasporës, duke mos sjellë efekte financiare në buxhetin e shtetit. Pasi si qeveria, ashtu dhe ligjvënësi kanë një mision të përbashkët lidhur me Diasporën që është pikërisht përgatitja e linjave orientuese për hartimin e politikave aktive dhe përcaktimin e prioriteteve strategjike në fushën e Diasporës”.

Ndërsa Ministri i Shtetit për Diasporës, Pandeli Majko deklaroi sot se, ligji për Diasporën është një ligj i miratuar në këtë parlament dhe tashmë, falë dhe ndryshimeve të reja që kanë ndodhur në politikën shtetërore për Diasporën vijnë këto propozime. Ka shumë rëndësi që këto propozime u miratuan në Komisionin për Politikën e Jashtme”.

Majko u shpreh se, “ka shumë rëndësi që ne të ecim më shpejt përsa i përket politikës tonë shtetërore për Diasporën dhe krijimi i Qendrës së Arbëreshëve është një nga lajmet më të mirëpritura nga komuniteti arbëresh”.

Majko nënvizoi faktin që, “kjo Qendër vetëm në muajt e parë ka firmosur marrëveshje me dy Akademitë e Shkencave të Shqipërisë dhe të Kosovës dhe shumë shpejt do të fillojë aktivitetin e saj në bashkëpunim me komunitetet shqiptare në Diasporë”/atsh/ KultPlus.com