2 Korriku 1990, polici i “Rrugës B” të vërshuar dhe ideja e lirisë (VIDEO)

Rrahman Paçarizi

S’para i kqyri videot “virale”, por në ditë si 2 Korriku, bëhemi emocionalisht më të ndieshëm dhe na rritet nevoja për konsum edhe gjërash në të parë më triviale si videot që qarkullojnë në rrjete sociale.. Pamja e një polici që e merr ngrykë një fëmijë në rrugën B të vërshuar nga uji kishte bë xhiro në rrjetet sociale. Kemi pa shumë heroizma të policëve dhe ushtarëve të Kosovës dhe ky ishte vetëm një gjest i mirë dhe në ditë zakonshme nuk do ta quaja heroizëm. Heroizmin e pashë diku tjetër – polici e futi fëmijën në veturë dhe mua m’u kthy filmi në fëmijërinë e rininë time. Do të isha tmerru me më pasë futë në veturë policie, kur isha fëmijë. 17 vjeç më patën futë në veturë të policisë dhe pata përfundu aq keq, sa edhe sot i ndiej pasojat e asaj xhiroje me veturë policie. E tash, një fëmijë i lidhet për qafe policit i cili shkon e merr atë nëpër ujin e turbullt, e sjell ne anë të rrugës dhe e futë në veturën zyrtare (e ëma i ndjekë ngadalë dhe sigurisht, pa frikë). Dhe , këtë video e kqyra më 2 Korrik, 32 vjet pas shpalljes se Deklaratës së Pavarësisë nga Serbia.

A e dini çka kemi fitu? Kjo është LIRIA. E ke shtetin tënd që nuk të persekuton, e ke policinë që nuk të rrah e vret, madje ke edhe politikanë të cilët mundesh me i deshtë ose jo, por e di që për shtetin mendojnë si ti, e duan si ti.

E, ai polici nuk bëri heroizëm, se gjasat e fëmijës për ta kalu rrugën e vërshuar me ndihmën e së ëmês ishin te larta. Polici me gjestin e tij ma kujtoi edhe një herë se çka është liria. Lirinë e përjetojnë të gjithë – njerëzit lindin të lirisë prandaj e kuptojnë si diçka të zakonshne, por asaj i rritet vlera në krahasim, në krahasim me mungesën e saj, me robërinë. Ne mund ta bëjmë këtë krahasim. Ne duhet të dimë me bë atë krahasim.

Gëzuar 2 Korriku!/ KultPlus.com

Nata e kristaltë

Rrahman Paçarizi

Lumë shkonte grigia në Dri me u mbytë
Moisiu vetë e kish lanë më kish lanë
Sharruar deri në fyt në bërllog Prishtine
Gjunjët përgjakun muret tek kaloja
as mendja nuk me shkonte per dashni
a kurvni

Emnin tim Laurit në xhep ia kisha lanë
Që nën copa akulli ta gjeja ndoj herë
pasi ta kishin futur në ngrirje të thellë
gjersa unë luhatesha në konop
as mendja nuk m’shkonte
për zjarr
a flake

Një bisht sopate me bënte qingj
veç në shpimë t’Moisiut copa e kisha ba
se grigia vetë maleve nuk lihet
veç shkronjave t’ Bibles kush Detit s’i kish ra
po zot a ka
me pa
me vra
këtë natë kristal / KultPlus.com