Kalaja e Rozafës, atraksioni kryesor turistik në qytetin e Shkodrës, ka regjistruar një numër të lartë vizitorësh edhe përgjatë muajit tetor.
Vizitueshmëria ka qenë më e lartë, krahasuar me një vit më parë, duke llogaritur 3896 vizitorë më shumë se në tetorin e vitit 2022. Sipas shifrave të bëra publike nga Drejtoria Rajonale e Trashëgimisë Kulturore Shkodër, Rozafati në tetorin e 2023-shit, u vizitua nga 11679 persona.
Në tetorin e vitit 2022, kalaja u vizitua nga 7783 turistë vendas e të huaj.
Kalaja e Shkodrës, apo siç njihet ndryshe me emrin Kalaja e Rozafës është një prej kështjellave më të rëndësishme të Shqipërisë dhe jo vetëm. Kalaja ngrihet mbi një kodër shkëmbore në hyrje të qytetit të Shkodrës, nga ana jug-lindore e tij. Rezulton të jetë ndërtuar qysh nga antikiteti, duke ju rezistuar shekujve. Kalaja e Rozafës ka disa oborre. Muzeu është vendosur në oborrin e tretë, saktësisht në godinën veneciane të njohur me emrin “Kapitaneria”./ atsh / KultPlus.com
Gjithnjë e më shpesh, turistët i referohen këtij vendi si “Maldivet e përballueshme”, shkruan në një artikull gazetarja Justyna Szymczyk-Mielniczyn në të përditshmen polake “Dziennik.pl”.
Në Shqipëri nuk ka turma vizitorësh dhe vendi mund t’ju kënaqë vërtet. Ujërat e pastër kristal, vija bregdetare e bukur, monumente interesante, kjo është receta për pushime të paharruara. Pra, pse ky destinacion nuk është shumë i njohur?
Shqipëria – pse ia vlen?
Shqipëria është një vend në Evropën Jugore me dalje në detin Adriatik dhe Jon.
Edhe pse nuk është aq i njohur sa Kroacia apo Greqia, mund t’ju kënaqë vërtet.
Plazhet janë fenomenale, uji i pastër kristal me një sipërfaqe bruz, ofrojnë një pamje që të lë pa frymë. Nuk është çudi që u kujton Maldivet turistëve.
Dhe ky destinacion jo vetëm që është shumë më afër, por është edhe më i përballueshëm.
Për më tepër, Shqipëria është vendi ideal për këdo që dëshiron të përfitojë nga moti me diell, rreth 290 ditë në vit janë me diell.
Çmime të përballueshme, peizazhe të bukura, monumente interesante, qytete interesante dhe shumë argëtim, tingëllon si Pushime të Përsosura.
Gjithashtu, për adhuruesit e natyrës rekomandohen udhëtime në male me guida në shtigjet e shënuara.
A nevojiten viza për të hyrë në Shqipëri?
Për të hyrë në Shqipëri, polakët nuk kanë nevojë për viza. Gjithçka që ju nevojitet është një kartë identiteti. Mund të qëndroni për 90 ditë brenda 180 ditëve nga data e hyrjes. Gjithashtu nuk ka tarifa në kufi. /atsh / KultPlus.com
Kryeministri Edi Rama ndau sot në rrjetet sociale shkrimin e gazetës prestigjioze italiane “Il Sole 24” mbi Shqipërinë turistike.
“Një prej gazetave më prestigjioze italiane = “Il Sole 24”, zbulon Shqipërinë si vendi me kontraste të forta që fsheh shumë surpriza, me brigjet përrallore të puthura nga dy dete, në brendësinë e së cilës shpalosen bukuritë “e ashpra” malore, mes fshatrave baritore dhe stolive arkitektonike si Berati e Gjirokastra, duke na cilësuar si vendi me një “boom” turistik në vitet e fundit, ku në nëntë muajt e parë të këtij viti mirëpritëm rekordin e mbi 747 mijë vizitorëve italianë”, shkruan Rama.
Male, qytete dhe kështjella, eksplorimet e vjeshtës në Shqipëri
Vitaliteti i Tiranës, peizazhet dhe fshatrat me guralecë, hotelet me detin e kristaltë, kanionet dhe liqenet e pastër, një udhëtim në vendin që po rritet falë turizmit, shkruan në një artikull gazetarja Natascia Ronchetti, të botuar në të përditshmen italiane “Il Sole 24 Ore”.
Shqipëria, vendi i shqiponjave, është një vend me kontraste të forta që ofron shumë surpriza.
E vlerësuar sot, pas bumit turistik të viteve të fundit, mbi të gjitha për brigjet e saj që lagen nga dy dete Adriatiku dhe Joni, Shqipëria rezervon një peizazash pothuajse tërësisht malor me bukuri të thyer, mes fshatrave të vegjël dhe xhevahireve arkitekturore si Berati dhe Gjirokastra e mrekullueshme.
Dy qytete ku shkrihen kulturat lindore dhe perëndimore, dëshmitë e perandorisë osmane dhe multikulturalizmi i zonës së Ballkanit, ose Korça e bukur, pothuajse në kufi me Greqinë dhe Maqedoninë e Veriut.
Një tokë që mund të eksplorohet edhe në vjeshtë.
Vendpushimet e njohura bregdetare në bregdetin e Jonit si Saranda dhe Ksamili, të karakterizuara nga ujëra të kristalta, mund të jenë bazë për ekskursionet e turistëve, ku mund të zbuloni, së bashku me bukuritë natyrore të pabesueshme, mes maleve dhe liqeneve, historinë e këtij vendi të vogël me rreth tre milionë banorë.
Nëse nuk ju pëlqen jeta e zhurmshme dhe peizazhet në disa raste, është më mirë të ndaleni në Himarë, një fshat i vogël buzë detit, gjithashtu në bregdetin Jon, në jug të Tiranës.
Tirana është porta e hyrjes për ata që vendosin të mbërrijnë në Shqipëri me avion.
Kryeqyteti do t’ju befasojë me rrokaqiejt e shumtë dhe shtëpitë e tij shumëngjyrëshe, me një jetë nate që mund ta përjetoni në lagjen Blloku, ku dikur banonte diktatori Enver Hoxha (që qëndroi në pushtet deri në vdekjen e tij në 1985), sot një zonë me kafene, restorante, dyqane, hotele.
Mjaftojnë dy ditë për të marrë një informacion mbi qytetin, duke filluar nga sheshi i famshëm Skënderbej, në zemër të qytetit dhe Piramida, një mauzoleum në formë piramide që vajza e Hoxhës donte ta ndërtonte në vitin 1988 për të përkujtuar të atin.
Në këtë pikë këshilla është të marrësh me qira një makinë dhe të nisesh në jug drejt Himarës, ndoshta duke bërë disa devijime gjatë rrugës për të vizituar Vlorën, me një sërë hotelesh të mëdha me pamje nga deti.
Udhëtimi përgjatë rrugës që të çon në Himarë, një fshat bregdetar ofron peizazhin më të mrekullueshëm në rivierën jugore të vendit.
Rrugë që ngjiten në male dhe më pas zbresin, midis kthesave të pjerrëta drejt një vije bregdetare që fsheh gjire dhe limane të mrekullueshme të vendosura mes shkëmbinjve.
Gjithashtu, këtu do të zbuloni plazhe të vogla parajsore si ai i Gjipesë, me rërë dhe ujëra blu.
Por pikërisht nga Himara, rreth 8 mijë banorë, mund të udhëtoni mes kanioneve spektakolare për të njohur paizazhin autentik të Shqipërisë.
Rrugës do të hasni fshatra të vegjël me bujtina për të qëndruar gjatë natës, të zhytura në natyrë. Më pas vizitoni qytetin e Pogradecit, dhe liqenin e bukur dhe të pastër të Ohrit.
Mund të ndaleni në Korçën e bukur, ku prodhohet birra me të njëjtin emër, me një qendër historike të karakterizuar nga çatitë prej rrasa guri, dhe më pas të niseni drejt Gjirokastrës, për të vizituar kështjellën e madhe, rrugët e ngushta me kalldrëm dhe shtëpitë në formën e kullave mesjetare, një qytet i shpallur një sit i trashëgimisë botërore nga UNESCO.
Ndalesa e fundit, Berati, një vendbanim i cili daton në shekullin e IV para Krishtit dhe njihet si qyteti i dritareve të mbivendosura, pasi që nga larg shtëpitë e tij duken se kanë një mijë sy.
Një vizitë në kështjellë është thelbësore, duke i lejuar vetes të përshkoheni nga ndjenja e harmonisë që rrjedh nga bashkëjetesa shekullore midis komuniteteve të ndryshme fetare dhe kulturore./atsh/KultPlus.com
Me hapjen e linjave të reja ajrore që e bëjnë udhëtimin më të lehtë se kurrë, ka shumë për të zgjedhur për udhëtimin tuaj të ardhshëm, nëse jeni duke kërkuar të lidheni me natyrën, të ngjiteni në zonat malore apo të provoni kuzhinat tradicionale!
Revista britanike “National Geographic Traveller” e ka renditur Shqipërinë mes 30 destinacioneve më emocionuese për të vizituar në vitin 2024.
Alpet Shqiptare
Një arratisje e egër në “yllin” në rritje të Evropës, Shqipërinë!
Udhëtarët, që kërkojnë diçka më ndryshe nga aventurat e tyre të mëparshme evropiane po shikojnë gjithnjë e më shumë drejt Shqipërisë.
Vendi ballkanik po tërheq një numër në rritje vizitorësh falë brigjeve të tij në Adriatik dhe Jon, të kaluarës intriguese osmane dhe komuniste dhe skenës relativisht të sapolindur të turizmit.
Të zhytura në brendësi të veriut, Alpet Shqiptare janë një e pjesë e rëndësishme e turizmit shqiptar.
Bjeshkët e Nemuna, kjo mbretëri e majave të thepisura karstike është një ëndërr për alpinistët, ku rrëqebullët enden nëpër pyjet e bredhit dhe lulet e egra mbulojnë sipërfaqen e luginës.
Ata që kërkojnë të eksplorojnë shtigjet sfiduese të rajonit mund të behen pjese e një turneu tetëditor, i cili ofron një itinerar që përfshin udhëtime nëpër shtigjet malore, shtëpitë tradicionale dhe një vizitë në fshatin e Thethit, duke përfshirë edhe ecje në Majat e Ballkanit.
Shqipëria është gjithashtu më e aksesueshme se kurrë falë një sërë linjash të reja ajrore.
“Ryanair” ka nisur së fundmi fluturimet drejt kryeqytetit të Tiranës nga Edinburgu, Mançesteri dhe Stanstedi, ndërsa “Wizz Air” do të operojë nga Birmingami, Edinburgu dhe Liverpuli nga 19 dhjetori i vitit 2023. /atsh / KultPlus.com
Vitin e kaluar, termat e futur më shpesh në motorët e kërkimit kishin të bënin me pushimet në Greqi, Kroaci dhe Itali. Këto destinacione kanë qenë prej kohësh të preferuarat e polakëve, por ajo që ka habitur është fakti se pushimet në Shqipëri ishin po aq të pëlqyera sa ato në Itali, shkruan në një artikull revista polake e biznesit “Horeca Business Club”.
Ekspertët e “Interhome”, kryen një analizë të plotë bazuar në të dhënat e polakëve që kërkonin në internet destinacione pushimi në Evropë.
Sipas studimit për tendencat e kërkimit online të vendpushimeve nga shtetasit polakë, Shqipëria regjistroi 2 900 kërkime dhe një rritje në 86%.
Drejtime të reja në horizont
Nuk mund të mohohet se një rritje prej 86% e kërkimeve tregon drejtime të reja në turizëm.
Një rritje e tillë u regjistrua në vitin 2022 për togfjalëshin “Pushime në Shqipëri”, i cili kërkohej nga polakët mesatarisht 1 559 herë në muaj dhe në vitin 2023 ky numër u rrit në 2 900.
Kjo dëshmon se turistët polakë janë më të gatshëm të eksplorojnë destinacione më pak të njohura dhe të kërkojnë një arratisje nga turizmi komercial.
Vlen gjithashtu të theksohet se Shqipëria po shënon një rritje të interesit të, absolutisht çdo polaku.
Shqipëria, është një nga vendet ku turizmi sapo ka filluar të zhvillohet dhe shumë udhëtarë janë në kërkim të destinacioneve pa turma turistësh.
Për më tepër, Shqipëria ofron çmime të përballueshme të shërbimeve turistike.
Kjo i shtyu ata të kërkonin alternativa më të lira.
Shpjegimi për këtë tendencë në rritje si në rastin e Shqipërisë lidhet me dëshirën për të eksploruar vende dhe rajone të reja.
Shqipëria ofron një klimë të butë, kohët e fundit ka qenë e njohur në mesin e turistëve që kërkojnë pushime edhe jashtë sezonit turistik./atsh/KultPlus.com
Edhe pse Parisi, Nju Jorku dhe Bangkoku vazhdojnë të presin një numër rekord turistësh, disa destinacione jo shumë të njohura po tërheqin vëmendjen e udhëtarëve.
Sipas një hulumtimi vjetor, Shqipëria është renditur mes pesë destinacioneve më në trend për vitin e ardhshëm, shkruan në një artikull revista hungareze IN.HU.
Vlorë, Shqipëri
Shqipëria po tërheq gjithnjë e më shumë vëmendjen e turistëve vitet e fundit, falë historisë së saj të pasur, rivierës mahnitëse dhe kulturës mikpritëse.
E vendosur në pjesën jugperëndimore të vendit, në brigjet e detit Adriatik, Vlora është qyteti i katërt më i populluar i Shqipërisë dhe qyteti i dytë port më i rëndësishëm, ku ndërthuret e kaluara magjepsëse dhe natyra e bukur e vendit.
Plazhet e Vlorës janë një eksperiencë e mrekullueshme për t’u eksploruar edhe në muajt e vjeshtës, pasi moti është ende i ngrohtë për t’u çlodhur në rërën e butë dhe admiruar peizazhin ose për shëtitje në mal.
Nëse udhëtoni në Vlorë, ia vlen të vizitoni Llogaranë, 45 minuta larg, parkun e famshëm kombëtar të Shqipërisë, i cili ofron pamje që të lënë pa frymë. /ATSH /KultPlus.com
Ministria e Kulturës, Rinisë dhe Sportit po qëndron e përkushtuar për të ruajtur dhe për të ringjallur trashëgiminë jomateriale të Janjevës dhe për të mbështetur fuqizimin socio-ekonomik të banorëve të saj përmes iniciativave të rrënjosura thellë në trashëgiminë e saj të pasur dhe të prekshme, duke e vendosur Janjevën në hartën e destinacioneve turistike që duhen vizituar, përcjell KultPlus.
Si pjesë e aktivitetit “Hartëzimi i turizmit rural në Janjevë” i zbatuar nga OJQ EC Ma Ndryshe dhe i mbështetur nga projekti i zbatuar nga UNDP Kosovo “Trashёgimia Kulturore si Nxitёse e Ringjalljes Ekonomike tё Janjevës”, financuar nga MKRS dhe European Union in Kosovo, ka përfunduar hulumtimi në terren për identifikimin dhe hartografimin e objekteve të trashëgimisë kulturore dhe natyrore të Janjevës.
“Falënderojmë pesë pjesëmarrësit e jashtëzakonshëm që morën pjesë në programin e trajnimit të Guidave Turistike, të cilët po fitojnë përvojë në punë dhe po luajnë një rol kryesor në transformimin e Janjevës në një destinacion për vizitorët”, thuhet në njoftim nga MKRS.
Informacionet e mbledhura do të integrohen në një webfaqe, duke ofruar njohuri të vlefshme në vendet e trashëgimisë kulturore dhe natyrore që Janjeva ofron për vizitorët. / KultPlus.com
Pas bumit të verës, zbulimi dhe zhvillimi i Shqipërisë nuk ndalet. Nuk është vetëm vija bregdetare prej 400 kilometrash kryesisht përgjatë detit Jon në jug të vendit, që tërhoqi një numër të lartë turistësh, përfshirë italianët, midis korrikut dhe gushtit, të cilët kërkonin pushime me çmime të përballueshme, por “Toka e Shqiponjave” ka shumë karta të tjera për të luajtur, shkruan në një artikull gazetarja Camilla Golzi Saporiti në të përditshmen italiane “Il Giornale”.
Qytetet, fshatrat, kështjellat, vendet arkeologjike dhe muzetë plotësojnë tablonë dhe e bëjnë Shqipërinë një nga destinacionet turistike më interesante evropiane dhe globale të momentit. “The Times” dhe “The Guardian” kanë shkruar për këtë.
NGA REGJIMI NË PËRMIRËSIMIN EKONOMIK DHE TURISTIK
Shqipëria përjetoi një periudhë të errët, nga viti 1976 deri në 1991, në të cilën u izolua dhe u bë pjesë e një nga diktaturave më të egra komuniste, duke u keqtrajtuar gjithmonë nga vendet fqinje të Ballkanit dhe shpesh me mosbesim nga komuniteti ndërkombëtar.
Vitet e fundit ajo ka arritur të ngrejë kokën dhe të nisë rrugën e hapjes dhe zhvillimit, si një demokraci e plotë.
Me një rritje të parashikuar të PBB-së prej +2,2% në 2023 dhe +3,4% në 2024 dhe një nivel shërbimesh dhe akomodimesh që po rritet gradualisht, Shqipëria e sotme sillet rreth Tiranës, ku duhet të kalosh detyrimisht.
TIRANA NË EVOLUCION
Tirana ka një milion banorë (paga mesatare e të cilëve është 500 euro në muaj) dhe është në evolucion të plotë.
Interesante për t’u vizituar është Sheshi Skënderbej.
Zemra e kryeqytetit, e rinovuar në vitin 2017, është një drejtkëndësh 24 mijë m2 me një mozaik gurësh natyrorë të ardhur nga të gjitha trojet historike shqiptare.
Plotësisht i pedonalizuar, alternon stolat dhe sipërfaqet e gjelbra, falë të cilave në vitin 2018 mori çmimin “Evropian për Hapësirën Publike Urbane”.
Në qendër ndodhet monumenti i kalorësisë prej bronzi i Skënderbeut, heroi kombëtar, ndërsa ndërtesat kryesore historike të qytetit kanë pamje nga zona përreth, përkatësisht, Xhamia e Et’Hem Beut, Opera, Pallati i Kulturës dhe Muzeu Historik Kombëtar.
Për të admiruar sheshin në tërësinë e tij, idealja është të ngjiteni në majën e Kullës së Sahatit.
Nuk duhet humbur Pazari i Ri, i cilësuar si një nga tregjet më të bukura në Evropë falë strukturës së tij prej çeliku dhe xhami.
DURRËSI
Nga Tirana mund të lëvizni drejt Durrësit. Hoteli me pesë yje i inauguruar në maj 2023, gëzon një plazh të madh me pamje nga Adriatiku, pyllin me pisha, restorante dhe menu “à la carte” dhe SPA.
Ndër pikat e forta të hotelit, është pozicioni strategjik për të eksploruar pjesën më tipike të Shqipërisë qendrore-veriore, e përbërë nga brigje të pandotura, me shkëmbinj dhe plazhe ranore si Kepi i Rodonit, ku gërshetohet e shkuara me të tashmen, mes kështjellave mesjetare, manastireve dhe zonave arkeologjike.
Kryeqyteti i parë Kruja, ruan mbetjet, fatkeqësisht të pakta, të kështjellës antike, Muzeut Kombëtar kushtuar Skënderbeut dhe një fshat si pazari i stilit osman.
Një tjetër kështjellë, shumë më mirë e ruajtur, ndodhet në Berat, në qytetin e dritareve dhe muzeut ikonografik Onufri.
Jo kështjellë, por tempull dhe odeon në Apolloni, një vend arkeologjik që daton në 588 para Krishtit. / atsh / KultPlus.com
Krahas plazheve të njohura verore, Shqipëria ofron edhe Parkun Kombëtar “Bredhi i Drenovës” në Korçë.
Malet, burimet dhe shkëmbinjtë krijojnë një panoramë unike, për një eksperiencë autentike në vjeshtë për turistët italianë që kërkojnë aventura të paharrueshme.
Shqipëria, e cila është kthyer në një destinacion popullor mes turistëve italianë, ofron shumë më tepër se plazhet dhe detin e kristaltë, shkruan në një artikull Elisabetta Coni të botuar në të perditshmen italiane “Voloscontato” (voloscontato.it).
Me afrimin e vjeshtës, vizitorët mund të eksplorojnë bukuritë natyrore shqiptare, në veçanti Parku Kombëtar “Bredhi i Drenovës” i vendosur në malet e vendit.
Bukuria e maleve shqiptare
Megjithëse Shqipëria njihet shpesh për brigjet e saj magjepsëse, vendi është kryesisht malor, me dy të tretat e territorit të pushtuar nga vargmale madhështore.
Ndërsa stina e verës ia lë vendin vjeshtës, zonat malore ofrojnë mundësi të reja pushimi për turistët, me ekskursione, trekking, kanoe dhe ngjitje.
Alpet Shqiptare, me majën më të lartë të Jezercës në 2693 metra, janë një pikë referimi për ata që kërkojnë përvoja autentike në fshatra të vegjël tradicionalë.
Zemra e Parkut Kombëtar: burime natyrore dhe shkëmbinj misterioz
Një nga vendet më magjepsëse në malet shqiptare është Parku Kombëtar “Bredhi i Drenovës”, një zonë e madhe e mbrojtur prej 1380 hektarësh, e vendosur në malet e Moravës, pranë një fshati piktoresk në Shqipërinë qendrore-jugore.
Ky park karakterizohet nga mbizotërimi i pyjeve të bredhit, pishës së zezë, lajthisë dhe ahut, ndërsa zonat e hapura përmbajnë kullota alpine dhe subalpine.
Karakteristika dalluese e Parkut Kombëtar “Bredhi i Drenovës” është prania e burimeve natyrore me ujë të ftohtë, duke e bërë atë tërheqës edhe në ditët e nxehta të verës.
Burimet, me emra piktoreskë si Burimi i Shën Gjergjit , Kroi i Plakës, ofrojnë ujë të pijshëm për vizitorët.
Përveç kësaj, parku është i mbushur me formacione unike shkëmbore, duke përfshirë “Monumentin Natyror të Gurit të Capit” në 1573 metra mbi nivelin e detit.
Pse të vizitoni Parkun Kombëtar “Bredhi i Drenovës”?
Kur bëhet fjalë për zgjedhjen e një destinacioni vjeshtor që ndërthur mrekullitë e natyrës dhe autenticitetin kulturor, Parku Kombëtar “Bredhi i Drenovës” në Shqipëri prezantohet si një zgjedhje e jashtëzakonshme, duke tejkaluar pritshmëritë në krahasim me opsionet italiane.
1. Autenticiteti dhe tradita kulturore
Shqipëria ofron një përvojë autentike larg furisë. Parku Kombëtar është i zhytur në fshatra të vegjël tradicionalë shqiptarë, duke i lejuar vizitorët të shijojnë atmosferën autentike, peizazhet unike dhe kulturën vendase, larg turizmit masiv.
2. Pamje malore
Ndërsa shumë rajone italiane janë subjekt i flukseve të mëdha turistike, malet shqiptare ofrojnë një strehë paqësore.
Parku Kombëtar karakterizohet nga pyjet e bredhit, pishat e zeza dhe formacionet shkëmbore, duke krijuar pamje të pacenuara që të lënë pa frymë.
Qetësia e maleve shqiptare i lejon vizitorët të shijojnë plotësisht bukurinë natyrore.
3. Burimet natyrore dhe fauna e larmishme
Parku shqiptar nuk ofron vetëm peizazhe spektakolare malore. Në fakt, ai pasurohet nga burimet natyrore të ujit të ftohtë.
Këto burime, me emra piktoreskë, i japin një prekje të veçantë vizitës, duke ofruar vende për t’u freskuar në mënyrë natyrale.
Fauna e larmishme e parkut, e cila përfshin specie unike, kontribuon për ta bërë përvojën tuaj edhe më magjepsëse.
4. Eksperienca autentike në vjeshtë
Ndërsa shumë vende italiane mund të paraqesin një atmosferë turistike të përjetuar mirë, Parku Kombëtar në Shqipëri ofron një autenticitet unik gjatë vjeshtës.
Turistët kanë mundësinë të zhyten në një stinë ngjyrash të gjalla dhe të përjetojnë një arratisje autentike vjeshtore.
Kush do të donte të vizitonte Parkun Kombëtar në Shqipëri?
Ky zbulim është një thesar për turistët që dëshirojnë të jetojnë një eksperiencë unike gjatë vjeshtës në Shqipëri, larg destinacioneve të zakonshme të mbushura me njerëz.
Për ata që kërkojnë një kombinim të peizazheve që të lënë pa frymë, ajrit të pastër malor dhe autenticitetit kulturor ose thjesht një arratisje vjeshtore të rrethuar nga natyra, Parku Kombëtar “Bredhi i Drenovës”” përfaqëson destinacionin ideal.
Adhuruesit e natyrës dhe aktiviteteve në natyrë do të gjejnë një gamë të gjerë mundësish në këtë vend, nga ecja deri te soditja e bukurive natyrore. /atsh / KultPlus.com
Mesdheu është padyshim një nga destinacionet turistike më të njohura në Evropë i cili tërheq çdo vit miliona vizitorë, sipas një artikulli të botuar në revistën spanjolle “A21”, (a21.com.mx).
Pikat e nxehta gjithnjë e më tërheqëse të Mesdheut juglindor ofrojnë një ndërthurje plazhesh të bukura, disa prej të cilave mund të rivalizojnë rërën e bardhë të Karaibeve, mrekullitë e një bote antike dhe një kuzhine të shkëlqyer!
Nëse kërkoni një arratisje të veçantë, autentike dhe jo pushime tradicionale vizitoni destinacionin e ri të Ballkanit, Shqipërinë e cila ofron pamje mahnitëse të plazheve dhe çmime të përballueshme!
Komisioni Evropian i Udhëtimeve konfirmoi në fillim të vitit 2023 se rritja më e madhe e numrit të turistëve është regjistruar në Shqipëri, një rritje prej 277% këtë verë krahasuar me 2013, e ndjekur nga Greqia me 147%, Turqia me 114% dhe Kroacia me 104%.
Shqipëria ofron një kombinim të plazheve të bukura, vendeve kulturore historike dhe kuzhinës tradicionale dhe të huaj.
Gjatë viteve të fundit është parë një rritje e popullaritetit në Rivierën Shqiptare, falë plazheve unike me rërë të bardhë, ujërave bruz dhe qyteteve mesjetare.
Tirana, kryeqyteti modern i Shqipërisë, së fundmi është shpallur Kryeqyteti i Rinisë Evropiane për shkak të reputacionit të saj si qendër e inovacionit dhe sipërmarrjes.
Me jetën e saj të gjallë shoqërore dhe kulturore, ajo është e preferuara e nomadëve dixhitalë.
Megjithatë, pika më e fortë e Shqipërisë është përballueshmëria e saj si një destinacion mesdhetar, dhe hapja e saj ndaj të huajve.
Qyteti është një kombinim i përsosur i historisë, ushqimit dhe aventurës. /atsh / KultPlus.com
Katërmbëdhjetë shkallë të pjerrëta të bardha të vendosura në të gjithë strukturën të çojnë në majën e Piramidës së Tiranës, shkruan Francesca Masotti në një artikull të botuar në revistën italiane, “Lonely Planet Italia”.
Ish-trashëgimia e epokës komuniste, e ndërtuar në vitin 1988 me iniciativën e vajzës dhe dhëndrit të diktatorit Enver Hoxha, pas katër vitesh punë, më në fund ka rihapur dyert për publikun dhe po përgatitet të bëhet qendra më e madhe multifunksionale në Evropën Lindore.
Ajo lindi falë një investimi të Fondacionit Shqiptaro-Amerikan për Zhvillim (AADF) dhe Bashkisë së Tiranës, projektuar nga studioja e famshme holandeze e arkitekturës MVRDV.
Studioja ka rinovuar me mjeshtëri kompleksin e rrënuar dhe gjithashtu hapësirat e jashtme të Piramidës, duke ruajtur strukturën bazë origjinale.
Tani ajo është një ndërtesë transparente ku mbizotëron e bardha dhe drita, me dritare të mëdha, elementë hekuri, kuba me ngjyra, pemë dhe gjelbërim përreth.
Tirana kryeqyteti i ri për t’u zbuluar
“Dhomat e saj do të presin biznese të reja, zyra, evente dhe një qendër TUMO për t’u garantuar studentëve të rinj shqiptarë dhe rajonal, akses në aftësitë dixhitale të afta për t’u dhënë atyre një të ardhme punësimi.
‘Qendra të ngjashme janë tashmë funksionale në Jerevan, Paris, Berlin, Los Anxhelos, Zyrih dhe Lion, por ajo në Tiranë është hapësira e parë për teknologjitë kreative në të gjithë Ballkanin”, tha Ketrina Jarazi, Drejtoresha e Drejtorisë së Turizmit në Bashkinë e Tiranës.
Vitet e fundit, qyteti ka ndryshuar shumë, ndërtesa të reja, zona të rinovuara, restorante të shkëlqyera, ngjarje çdo javë, dhe shumë turistë.
Tirana tashmë ofron gjithçka që duhet për t’u bërë destinacioni i ri për një fundjavë ndryshe.
Këtë vit numri i vizitorëve ishte shumë i lartë për një komb të vogël si Shqipëria, e rrethuar nga vende si Italia, Kroacia, Greqia, Turqia.
Sipas të dhënave nga Instat, Instituti Kombëtar i Statistikave të Shqipërisë, numri i turistëve arriti ne 8,2 milionë.
Çfarë duhet të bëni në Tiranë
Linjat ajrore me kosto të ulët tashmë lidhin kryeqytetin shqiptar me aeroportet kryesore evropiane dhe duke filluar nga nëntori, “Ryanair” do të fluturojë drejt Tiranës edhe nga Bolonja, Milano, Roma, Katania, Treviso dhe shumë qytete të tjera të kontinentit të vjetër.
Kalendari i ngjarjeve po evoluon vazhdimisht, këtë verë artistë të mëdhenj si Enrique Iglesias, Ricky Martin dhe Placido Domingo performuan në Tiranë, ndërsa festivali ndërkombëtar i filmit TIFF dhe Festivali Europian i Filmit Rinor i Tiranës tërhoqën aktorë dhe regjisorë nga i gjithë Ballkani dhe Evropa.
Por, viti nuk ka mbaruar akoma, më 16-17 tetor Festivali Kosmos mbledh artistë të muzikës klasike vendase dhe ndërkombëtare në qytet, më 22 tetor është Maratona.
Nga 15 deri më 19 nëntor organizohet Panairi i Librit dhe është rasti më i mirë për të takuar shqiptarët. autorë, shumë prej të cilëve janë përkthyer edhe në italisht.
Më 29 nëntor është Nata e Bardhë e shoqëruar me muzikë, kërcim dhe argëtim në rrugët e Bllokut, dhe më pas është tregu i Krishtlindjeve i cili nga dhjetori deri në fillim të vitit të ri mbledh artizanët, bodrumet e verës dhe stendat e ushqimit në sheshin Skënderbej të veshur me veshje festive.
Vizitë në muze
Nga sheshi i madh, zemra e qytetit, në BunkArt2 është një hap i shkurtër.
Është muzeu kushtuar viktimave të regjimit komunist i ndërtuar në dhomat e një bunkeri antiatomik në varësi të Ministrisë së Brendshme.
Bunkart1 në periferi të kryeqytetit, gjithashtu i ndërtuar brenda një bunkeri (shtatë kate nën nivelin e tokës) përfshin salla, dhoma dhe një teatër.
Dy ndalesa të paharrueshme për t’u thelluar në historinë jo shumë të largët të Shqipërisë, në xhevahirin e vërtetë të Shtëpisë së Gjetheve, fituese e Çmimit Muzeor 2020 të Këshillit të Evropës, në ish-selinë e Sigurimit, policia sekrete shqiptare në kohën e Hoxhës.
Mes arkivave dhe pajisjeve të llojeve të ndryshme, rrëfehet dhe përkujtohet dhuna psikologjike në muze, shkelja e të drejtave të njeriut dhe kontrolli i ushtruar ndaj qytetarëve gjatë viteve të vështira të regjimit komunist.
Tirana me pamje
Në fund të ditës, rrugët e qytetit mbushen me njerëz, Parku i Madh, në fund të Bllokut, tërheq familje dhe sportistë, çifte të moshuarish për shëtitje dhe grupe të vogla miqsh që takohen.
Është gjithmonë kënaqësi të ecësh këtu dhe përshtypja që të jep është se nuk ndihesh kurrë vetëm, por pjesë e një komuniteti të madh.
Në perëndim të diellit, megjithatë, bëni sërish një udhëtim në Piramidë, ngjituni në majë për të admiruar qytetin nga lart në orën më të bukur të ditës.
Sigurisht që nuk do të jetë si një pamje e Romës apo Parisit, por kryeqyteti shqiptar është “shtëpia ime larg shtëpisë” dhe për mua çdo herë është gjithmonë e bukur, origjinale, unike. Me një fjalë të vetme? Tirana. /atsh / KultPlus.com
Revista amerikane “AZ Animals” e ka renditur Shqipërinë mes 11 vendeve më të mahnitshme dhe unike.
Shqipëria është pjesë e rajonit të Ballkanit të Evropës.
Vendi karakterizohet nga një klimë e larmishme për shkak të vendndodhjes në kontinent.
Brigjet kanë një klimë mesdhetare, e cila është e përkryer për plazhistët dhe ata që pëlqejnë motin me diell.
Ndërsa shkoni në brendësi, do ta gjeni veten në një rajon malor më të ftohtë dhe shumë të lagësht.
Shqipëria
Shqipëria është një vend i vogël evropian, i vendosur mes Greqisë, Malit të Zi dhe Kosovës.
Peizazhi natyror i këtij vendi me shtatë shkronja përmban male të thyer dhe një vijë bregdetare të gjerë që shtrihet përgjatë deteve Adriatik dhe Jon në rajonin e Ballkanit.
Me një sipërfaqe prej 28,750 km² dhe një vijë bregdetare prej 362 km, Shqipëria pretendon titullin e vendit të 18-të më të vogël të Evropës dhe vendin e 145-të në botë.
Tirana, zemra e Shqipërisë, nuk është vetëm kryeqyteti administrativ, por edhe një nga atraksionet kryesore për vizitorët.
Nga ana tjetër, Saranda shkëlqen si një destinacion kryesor pushimesh në Shqipëri, i famshëm për plazhet e pacenuara dhe skenën e gjallë të festave.
Saranda ndodhet vetëm 40 minuta me varkë nga ishulli grek i Korfuzit dhe shumë pranë Butrintit, parku arkeologjik kryesor i Shqipërisë i njohur nga UNESCO.
Kur bëhet fjalë për ushqimin, gatimet shqiptare jehojnë me shijet mesdhetare.
Kjo përkthehet në një bollëk te produketeve si peshk, zarzavate, fruta, arra dhe vaj ulliri.
Megjithatë, mishrat si viçi, qengji, viçi, madje edhe derri shërbehen në shumë tryeza shqiptare. /atsh / KultPlus.com
Lexuesit e gazetës prestigjioze “The Guardian” kanë renditur disa qytete në Evropë që janë të pareklamuara dhe që duhet vizituar.
Peja nga ta është cilësuar si një vend i përkryer për një pushim fundjave, duke përfshirë kështu edhe udhëtimet në disa fshatra përreth.
Në këtë shkrim thuhet se duhet vizituar qyteti për të parë arkitekturën e bukur. Më pas duhet vizituar edhe ujëvara e Drinit të Bardhë, pastaj bjeshkët e Pejës, Radavci dhe Gryka e Rugovës.
Ata nuk harruan ta përmendin edhe gjallërinë e qytetit që krijohet si dhe kafenetë ku mund të shijoni ndonjë pije.
Përveç Pejës, qytete të tjera që duhet vizituar në Evropë është renditur edhe qyteti Leiden në Holandë, pastaj Bremen në Gjermani, La Spezia në Itali, Grazi në Austri, Lille në Francë, Bergen në Norvegji, Kordoba në Spanjë dhe Zagrebi në Kroaci. / KultPlus.com
Në verë, plazhet e Livadhit dhe Dhërmiut mbushen me turistë te shumtë. Këto plazhe ndodhen në Rivierën Shqiptare, dhe janë 12,5 milje (20 km) larg njëra-tjetrës. Në sfond dallohen malet e larta të mbushura me ullishte, të përkulura rreth vijës bregdetare jugore, shkruan në një artikull gazetari Stuart Kenny të botuar në revistën e udhëtimëve “Much Better Adventures”.
Rëra e tyre idilike e bardhe vështron detin Jon, përtej Korfuzit dhe thembrës së Italisë.Në pikun e sezonit dominon jeta e natës, dhe pothuajse sipërfaqja prej 5 km e plazhit të Dhërmiut është e zënë nga turistë nga vende të ndryshme të botës.
Deti i thellë blu shkëlqen nën diellin mesdhetar dhe shtëpitë e bardha, të grumbulluara në kodër. Ekziston një qetësi në shtigjet e bariut të vjetër dhe një vend sekret në limane.
“Zona ka një numër të lartë vizitorësh në korrik dhe gusht, dhe frekuentohet më pak në pranverë dhe vjeshtë”, tha Ricardo Fahrig, një ekspert i zhvillimit të destinacionit dhe bashkëthemelues i operatorit turistik “Zbuloni Shqipërinë!”.
I lindur dhe rritur në Gjermani, Fahrig tashmë punon dhe jeton në Tiranë, kryeqytetin shqiptar, për më shumë se një dekadë.
“Kishte kaq shumë potencial të pashfrytëzuar këtu dhe kaq shumë për të bërë në një destinacion që njihej aq pak. Mua më ngeli zemra këtu”, tha ai.
Vitet e fundit Shqipëria është përfshirë në hartën e turizmit. Shqipëria u hap me botën në vitet 1990, pas komunizmit.
Nuk pati zhvillim masiv në vend gjatë kësaj kohe, dhe kjo është pjesërisht arsyeja pse peizazhet natyrore të vendit, si lumi i Vjosës, parqet kombëtare kanë mbetur të pacenuar. Por, kjo e privoi vendin nga rritja ekonomike.
“Shqipëria ishte e izoluar pas Luftës së Dytë Botërore për gati 45 vjet”, tha Ricardo.
“Ju e keni zonën më shumë për veten tuaj. Nuk ka pritje në rradhë dhe çmimet janë të ulëta. Vendasit janë më të relaksuar sepse janë nën presion më të vogël, dhe kështu ju mund të zbuloni peizazhet autentike…”
Në dekadën e fundit, kjo ka ndryshuar, dhe vendi ka përjetuar një bum të madh në turizëm. Rreth 7,5 milionë turistë vizituan Shqipërinë në 2022. Vendi ka planifikuar të mirëpresë mbi 10 milionë vizitorë në vitin 2023.
“Kjo është rritja më e shpejtë pas pandemisë në Evropë”, tha Fahrig.
“Ne kemi parë një rritje të numrit të vizitorëve me më shumë se 50% vetëm këtë vit”, tha ai.
“Komunitetet e vogla malore mirëpresin 100 000 vizitorë në vit”, theksoi ai.
PËRFITIMET E UDHËTIMEVE JASHTË SEZONIT
Mbipopullimi nga turizmi mund të shkaktohet nga një mori arsyesh, nga linjat ajrore me kosto të ulët dhe promovimi i destinacionit nga mediet sociale ose nëpërmjet televizionit.
“Kjo ndodh në pjesën më të madhe të turizmit në vend, që përqendrohet në të njëjtat vendpushime, në të njëjtët muaj”, tha Ricardo.
“20% e vendeve tërheqin 80% të vizitorëve dhe nga qershori në gusht numri i turistëve në Shqipëri është pesë herë më i madh se sa gjatë pjesës tjetër të vitit”, tha ai.
“Ne jemi një vend mesdhetar, kështu që shumica e njerëzve e lidhin atë me verën. Njerëzit priren të vizitojnë vendin kryesisht në korrik dhe gusht. Para qershorit dhe pas shtatorit, ka relativisht më pak vizitorë”, shtoi ai.
Një pjesë e punës së Fahrig përfshin përmirësimin e shtigjeve të reja për të shpërndarë të gjithë këtë turizëm të ri, në të gjithë vendin.
Një nga shtigjet e para që ai krijoi ishte rruga e mirënjohur “Majat e Ballkanit”, e cila tashmë ka arritur kapacitetin e nevojshëm.
“Qëllimi ishte lidhja e rajoneve malore më atraktive të Shqipërisë, Kosovës dhe Malit të Zi në një shëtitje rrethore, për të sjellë komunitetet që nuk shihnin asnjë vizitor në rrjetin e turizmit dhe për të lehtësuar presionin mbi pikat e tjera të nxehta”, tha ai.
“Ky shteg nuk është aspak i arritshëm gjatë dimrit, për shkak të borës. Këto zona mbyllen nga fundi i mesit të tetorit deri në fillim të majit,” tha Ricardo.
“Shumica e tyre janë në letargji, kështu që gjatë gjysmës së vitit nuk ka fare biznes apo punë. Është një kontrast i madh për komunitetet turistike rurale që shkojnë nga zero në njëqind”, shtoi ai.
Fahrig ka nisur projektin për zgjatjen e sezonit në jug të Shqipërisë për të siguruar të ardhura për vendasit që jetojnë në zona si, Livadh dhe Dhërmi, të frekuentuara në verë dhe të heshtura në dimër.
Rruga e re, aventureske i çon vizitorët përgjatë shtyllës kurrizore të Gadishullit të gjelbëruar të Karaburunit dhe deri në majën e malit 1,446 metra të Gjipalit.
Aty mund të eksplorojnë ullishtet dhe limanet e fshehura të oqeanit, ideale për not dhe fshatrat e qeta bregdetare.
“Nëse vizitoni vendin gjatë dhe jashtë sezonit, ka shumë më pak vizitorë”, tha Fahrig.
“Kështu që ju e keni zonën më shumë për veten tuaj. Nuk ka rradhë dhe çmimet janë të ulëta”, shtoi ai.
“Ne do të shmangim muajt më të nxehtë dhe më të ngarkuar të verës dhe gjithashtu do të zgjasim sezonin turistik duke mbështetur liderët dhe furnizuesit lokalë përtej verës”, tha Marta Marinelli, menaxhere e Zgjerimit të Aventurave në “Much Better Adventures”.
Natyrisht, vizitorët mund të përballen me kushte më pak të qëndrueshme të motit, në mbarim të sezonit, që në Shqipëri nis në fillim të majit dhe përfundon në fund të shtatorit.
Moti në bregdetin jugor është përgjithësisht i ngrohtë (rreth 26°C) gjatë ditës dhe më i freskët gjatë natës. / atsh / KultPlus.com
Përmes një deklarate online, drejtuar qytetarëve të Pogradecit, bashkia e këtij qyteti tha se, falë një strategjie të mirëkonceptuar në orientimin e investimeve apo shërbimeve në këto 4 vite e pak muaj, ia doli që Pogradeci të ngjitet me shpejtësi dhe të rreshtohet krah qyteteve me turizëm të zhvilluar. Kjo faktohet edhe nga shifrat në rritje nga viti në vit të numrit të pushuesve dhe vizitorëve.
Sipas Bashkise Pogradec, vetëm gjatë sezonit veror që lamë pas, në këtë qytet qëndruan rreth gjysmë milion turistë, vendas dhe të huaj. Kjo rritje kaq e madhe sigurisht që bazohet në shërbimet dhe investimet e bashkisë, bashkë me shërbimin në rritje të operatorëve turistikë.
“Kemi punuar dhe ia kemi dalë që të orientojmë Pogradecin drejt zhvillimit të turizmit 4-stinor. Në çdo sezon ne ofrojmë organizime dhe festa të ndryshme me karakter lokal dhe kombëtar në mënyrë që të thithim sa më shumë vizitorë e turistë”, thuhet në postimin e Bashkisë Pogradec, në faqen online.
Rritja e kërkesës për të qëndruar në Pogradec edhe jashtë sezonit veror, ka dhe kërkesat e saj, duke filluar që nga përmirësimi i dekorit, të konsumuar në këto 4 vjet. Bashkia Pogradec ka premtuar që këtë vit të sjellë një dekor të ri edhe më të bukur se vitet e kaluara për t’iu ofruar qytetarëve dhe vizitorëve një pamje krejt të re në këtë fundvit.
Bashkia ka theksuar se e gjithë pjesa tjetër e dekorit të viteve të kaluara do të vendoset në rrugë të pandriçuara më parë, deri në njësitë administrative pranë qytetit.
Për të realizuar këtë financim do të reduktohen disa zëra buxhetorë për investimet të cilat janë në proces apo që pritet të nisin, por kjo nuk nënkupton në asnjë moment se këto investime nuk do të kryhen, pasi do të nisë zbatimi i tyre në përfundim të të gjitha etapave ligjore./ atsh / KultPlus.com
Nëse jetoni në Meksikë dhe dëshironi të vizitoni vende të tjera për të pushuar, duhet të dini se ka destinacione turistike të lira nga të cilat mund të përfitoni. Këto vende ofrojnë kosto të përballueshme të shërbimeve në territor dhe alternativa turistike më të përshtatshme për xhepin tuaj! shkruan në një artikull e përditshmja spanjolle “El Cronista”.
Shqipëria është renditur mes pesë destinacioneve evropiane më të perballueshme për pushime në vjeshtën e 2023.
Shqipëria
Nëse dëshironi të njihni Evropën me një kosto të ulët, Shqipëria është opsioni ideal për ju.
Ajo ndodhet në juglindje të Gadishullit Ballkanik, gjuha e saj është shqipja dhe monedha vendase quhet LEK.
Shqipëria është një destinacion pak i njohur, krahasuar me vende të tjera si Franca, Italia apo Spanja, ndaj eksperienca turistike është më e lirë, përsa i përket çmimeve të akomodimit, ushqimit dhe transportit.
Vendi ofron plane kulturore, natyrore, gastronomike dhe të kohës së lirë.
Udhëtimi mund të fillojë me një vizitë në sheshin Skënderbej të Tiranës.
Nga atje, ju mund të njiheni me njerëzit, historinë e saj dhe të bëni turne të ndryshme turistike me udhëzues.
Nëse dëshironi të vizitoni plazhin, Ksamili në jug të vendit, do të ishte një opsion i shkëlqyer.
Për shkak të bukurisë natyrore zona bregdetare njihet si Riviera Shqiptare dhe tërheqja kryesore e saj është zbulimi i pjesës më pak të njohur të Mesdheut.
Përveç kësaj, ju gjithashtu mund të vizitoni kështjella antike, kisha, male dhe parqe natyrore.
Kërkesat për të udhëtuar në Shqipëri:
Të keni sigurimin e shëndetit në udhëtim
Të keni një pasaportë të vlefshme gjatë hyrjes
Nëse jeni meksikan, nuk keni nevojë për vizë turistike. / atsh / KultPlus.com
Evropa shpesh vlerësohet për vendet e saj të bukura, historinë e gjatë të zhvillimit njerëzor, monumentet ikonike dhe kulturat e ndryshme.
Kontinenti gjithashtu pëson një transformim të jashtëzakonshëm gjatë vjeshtës, duke i lejuar adhuruesit e natyrës të përfshihen në disa nga aventurat më emocionuese, shkruan në një artikull gazetari Felix Ngeso, të botuar në të përditshmen amerikane “The Travel”.
Por, ndërsa shumë turistë dynden drejt destinacioneve të njohura për të shijuar ngjyrat e gjalla të vjeshtës, ka një ndjenjë kënaqësie që vjen nga eksplorimi i vendeve të panjohura të Evropës.
Destinacionet më të mira të Evropës nën radar ofrojnë përvoja autentike larg turmave.
Peizazhet verbuese përzihen në mënyrë të përkryer me arkitekturën e tyre shekullore, ndërsa atraksionet e mbushura me aventura si parqet janë më pak të mbushura me njerëz, duke ofruar kështu një arratisje të qetë.
Shqipëria është renditur mes 10 destinacioneve në Evropë, ku udhëtarët mund të shohin gjethet e vjeshtës në të gjithë shkëlqimin e saj së bashku me vendet më të mira për të qëndruar.
Theth, Shqipëri
Thethi është një nga destinacionet dhe perlat e fshehura të Evropës që ia vlen të vizitohet gjatë sezonit të vjeshtës për peizazhin e tij të pacënuar dhe të mrekullueshëm.
Adhuruesit e vjeshtës do të magjepsen nga natyra ndërsa ecin drejt Ujëvarës mahnitëse të Grunasit.
Ecja zgjat rreth një orë nga fshati i Thethit dhe i çon aventurierët përtej lumenjve të zhurmshëm, kullotave të gjera dhe shpateve madhështore malore të mbuluara nga gjethet e vjeshtës.
Megjithëse seksioni i fundit i shtegut përfshin një ecje te dhimbshme, peizazhi me ngjyrë të artë që rrethon ujëvarën 25 m fshin çdo lodhje që mund të kenë adhuruesit e natyrës gjatë rrugës. /atsh / KultPlus.com
Me rastin e Ditës Botërore të Turizmit e cila festohet në mbarë botën me datë 27 Shtator, si dhe Ditës Kombëtare të Trashëgimisë Kulturore e cila festohet me datë 29 Shtator, Komuna e Prishtinës ka njoftuar se dyert e Sahat Kullës do të jenë të hapura për të gjithë vizitorët nga ora 10:00-18:00.
Nga Komuna e Prishtinës ju bëjnë thirrje që gjatë këtyre ditëve ju mund ta shihni kryeqytetin nga një kënd tjetër. / KultPlus.com
Divjakë-Karavasta, 90 km larg Tiranës, është një nga parqet natyrore më të vizituara nga turistët vendas e të huaj për turizmin detar, natyror dhe të vëzhgimit të shpendëve ujorë.
Ministrja e Turizmit dhe Mjedisit, Mirela Kumbaro duke e cilësuar një pol të turizmit natyror, tha se ” gjatë gushtit Divjakë-Karavasta ka pritur më shumë se 186 mijë vizitorë mes peizazheve të pyllit, lagunës, ngjyrave të shpendëve e duke mos u larguar pa provuar ushqimet e shijshme të zonës”.
Turistëve në këtë park iu ofrohet një guidë prej 5 km, ku ata njihen me gjallesat dhe bimësinë e parkut. Gjatë vizitës në park mund të zhvillosh disa lloje aktivitetesh përveçse të njihesh me informacionin e Parkut Kombëtar Divjakë-Karavasta në Qendrën e Vizitorëve si ecje në natyre (rreth 50 km shtigje), vëzhgimi i shpendëve, piknik, vozitje me varkë, kamping, xhiro me biçikleta, kajak dhe vizitë në site arkeologjike dhe ato fetare”
Me një kullë panoramike, varka për të shëtitur vijë ujore përgjatë gjithë parkut, pyllin e gjelbëruar dhe me larmishmëri shpendësh janë disa nga aventurat që nuk duhen humbur kur viziton këtë park të rijetësuar.
Vendet më të preferuara nga vizitorët janë “Ishulli i Pelikanit”, Këneta e Madhe ku jeton Pelikani, por edhe shpendë të tjerë dhe Këneta e Vogël, ku kryesisht strehohen flamingot dhe rosat e egra.
Flamingot dhe shpendët e tjerë ujorë, që popullojnë lagunën e Divjakë-Karavastasë, kanë tërhequr vëmendjen e medieve botërore me reportazhet e tyre të shumta për jetën e egër në këtë park./atsh/KultPlus.com
Eksperiencë plazhi e jashtëzakonshme, pak turistë, ambient miqësor. Kjo është receta për udhëtimin perfekt. Plazhet e Shqipërisë presin vizitorë që janë ngopur me destinacionet kryesore evropiane, dhe duan të shpëtojnë nga turmat e turistëve, ndonjëherë mbytëse, shkruan në një artikull gazetarja Rozc Franciska, të botuar në të përditshmen hungareze “Coloré.hu”.
Kur bëhet fjalë për eksperiencat evropiane të plazheve, zakonisht të vijnë në mendje plazhet dalmate, spanjolle apo italiane.
Megjithatë, në ditët e sotme, këto vende janë shpesh aq të mbipopulluara sa bukuria e natyrës bëhet e pakëndshme.
Ky nuk është aspak rasti me plazhet e Shqipërisë, të cilat nga njëra anë rezultojnë të jenë shumë më miqësore me buxhetin sesa qendrat turistike të krijuara, dhe meqë ra fjala, ata u premtojnë adhuruesve të detit një pamje të mahnitshme.
Shqipëria e pazbuluar
Riviera shqiptare zyrtarisht 450 kilometra e gjatë (ose seksioni i njohur lokalisht si Bregu) shtrihet në pjesën verilindore të detit Jon: bregdeti shtrihet përmes Vlorës dhe Sarandës deri në Parkun Kombëtar të Butrintit dhe kufirin grek.
Bregu është shtëpia e disa prej plazheve më të bukura të Shqipërisë, si dhe shumë atraksioneve të tjera, duke përfshirë mrekullitë natyrore si shpellat dhe burimet nënujore, por edhe fshatrat simpatikë bregdetar, pamjet mahnitëse, rrënojat e lashta, madje edhe bunkerë bërthamor të pashfrytëzuar.
Plazhet e Shqipërisë: Plazhi i Gjipesë
Edhe pse nuk mund të themi kurrsesi se plazhi i Gjipesë është një nga plazhet lehtësisht të aksesueshme (një rrugë e pashtruar të çon në një nga perlat e bregdetit shqiptar).
Gjipe është edhe ndër plazhet shqiptare që konsiderohen të paprekura.
Gjipe është një plazh me guralecë që u ofron vizitorëve ujë të ngrohtë dhe të pastër kristal, duke e bërë atë një vend ideal për not.
Në verë, kajakë dhe SUP gjithashtu mund të merren me qira në zonë, por ju mund të sillni një ombrellë me vete.
Disa kafene në plazh ofrojnë ushqime të shijshme shqiptare, por numri i njësive të kateringut nuk është aq i lartë sa në plazhet e tjera të Evropës.
Plazhi i Gjipes ndodhet afërsisht 1,5-2 orë me makinë nga qyteti i Vlorës.
Plazhi i Dhërmiut
Plazhi i Dhërmiut, i vendosur në veri të Gjipesë, cilësohet si plazhi më i bukur në Shqipëri.
Edhe pse bregdeti i Dhërmiut nuk është me rërë, guralecat e lëmuara, të bardha dhe uji i bruztë i ofrojnë vizitorëve një eksperiencë vizuale të papërsëritshme.
Duke qenë se plazhi i Dhërmiut është më i lehtë për t’u aksesuar sesa i Gjipes, edhe familjet mund të pushojnë në këtë zonë bregdetare.
Shezlongët dhe çadrat mund të merren me qira në këtë plazh, dhe restorantet dhe kafenetë ofrojnë ushqime të shijshme për turistët dhe vendasit që e vizitojnë.
Është interesante që jeta në plazhin e Dhërmiut nuk ndalet as gjatë natës: me perëndimin e diellit, zona e bregdetit bëhet skena e festave të egra të plazhit.
Plazhi i Dhermiut ndodhet dy orë nga Saranda dhe 1,5 orë nga Vlora.
Plazhi i Potamit
Plazhi i Potamit, i vendosur në skajin verior të rivierës shqiptare, ka një efekt shumë më të izoluar, pasi shtrihet mes maleve dhe një zone të gjelbëruar.
Si rezultat, plazhi është kryesisht me hije gjatë ditës, por kjo është shumë e nevojshme në vapë, në fakt!
Plazhi i Potamit, ashtu si Gjipe apo Dhërmiu, ka gjithashtu një plazh me guralecë, por këtu ka gurë të mëdhenj e të rrumbullakët dhe jo guralecë të vegjël.
Potami ka një gamë të gjerë baresh dhe restorantesh në plazh, ku mund të ndjeheni të lirë të provoni disa ushqime të shijshme dhe pije të ftohta duke admiruar pamjen e pazakontë.
Plazhi i Potamit ndodhet pesë minuta me makinë nga qyteti i Himarës. /atsh / KultPlus.com
Për të gjithë ata që planifikojnë të bëjnë një udhëtim këtë vjeshtë, është e rëndësishme të kuptojnë se cilat destinacione ofrojnë opsione akomodimi që përshtaten brenda një plani shpenzimesh të përballueshme, shkruan në një artikull gazetarja Megi Canco, të botuar në “The Travel off Path”.
Udhëtarët që presin me padurim të vizitojnë atraksionet evropiane do të jenë të lumtur të marrin në konsideratë renditjen më të re të destinacioneve me tarifat më të lira për momentin!
Shqipëria është renditur mes pesë destinacioneve kryesore evropiane, që ofrojnë shërbime për turistët me çmimet më të lira.
Shqipëria
Dikur një nga destinacionet më të preferuara të Evropës, Shqipëria kohët e fundit ka fituar një interes të madh në skenën e turizmit ndërkombëtar falë kulturës së saj të pasur, rivierës mahnitëse dhe çmimeve të arsyeshme.
Në përgjithësi, në hotele kostoja për një natë shkon në mesatarisht 60 euro (~ 64 dollarë).
Pra, nëse udhëtoni në Shqipëri, qiratë afatshkurtra janë mënyra e duhur për të ndjekur.
Vlen të përmendet se zonat më turistike dhe të mbiçmuara kostoja mund të jetë shumë pak mbi mesataren.
Arsyeja pse kaq shumë udhëtarë duket se diskutojnë nëse Shqipëria është një destinacion buxhetor apo jo, është se çmimet mund të ndryshojnë shumë midis qyteteve dhe rajoneve./atsh / KultPlus.com
“Mirësevini në Shqipëri, një nga vendet më pak të eksploruara në Evropë”, kështu e nis artikullin media e njohur spanjolle Travesías.
U bë e zakonshme tashmë që Shqipëria të rrëmbejë titujt e mediave të huaja, për sa i përket turizmit me vendet dhe traditat e bukura që ofron. Sipas “Travesías” udhëtarët që vijnë këtu habiten nga gastronomia, pasuria kulturore dhe karakteri shqiptar që nuk i ngjan asnjë vendi tjetër.
Ndër qytetet që kanë përmendur janë Tirana, Berati, Gjirokastra dhe Vlora.
Tirana
Shqipëria është një nga vendet më të vogla në Evropë. Me vetëm 28 748 kilometra katrorë, ajo zë vendin e 37-të në kontinent për nga sipërfaqja.
Megjithatë, pavarësisht territorit të saj ajo krenohet me madhështinë e historisë së saj.
Përtej të shkuarës së afërt, diktaturës së Enver Hoxhës dhe integrimit të vështirë të saj në ekonominë globale pas vitit 1991, Shqipëria ka qenë gjithmonë një vend ndryshe.
Mjafton të lexosh Ismail Kadaren për të kuptuar se diçka e ndan kulturën shqiptare nga pjesa tjetër e Evropës.
Do të ishte mirë të fillonim me “Dosjen H”, të botuar në 1981, ku Kadaré tregon historinë e dy studiuesve të huaj që mbërrijnë në Shqipëri për të studiuar poezinë e saj dhe ndeshen me një botë të mbyllur dhe provinciale; “Pallati i ëndrrave”, një distopi ku qeveria regjistron ëndrrat e secilit prej qytetarëve të saj për t’i kontrolluar ato (në mënyrë të pashmangshme na bën të mendojmë për kohën e diktaturës).
Midis ndërtesave të rrënuara dhe shtëpive të vjetra të shndërruara në klube, bare dhe restorante, lagjia e Bllokut ndihet veçanërisht e qetë gjatë mëngjeseve.
Në Tiranë ka copëza historie gjithmonë të pranishme, nga shtëpia e diktatorit pa asnjë gardh apo ndarje që mund ta mbajë të fshehur nga sytë e udhëtarëve dhe vendasve.
Sheshi Skënderbej është qendra e Tiranës.
Piramida, e cila supozohej të ishte një muze kushtuar të njëjtit personazh, sot është shndërruar në një qendër teknologjike.
Disa nga bunkerët e braktisur brenda qytetit janë shndërruar në galeri dhe muze, ndërsa mbetjet e kështjellës së vjetër u shndërruan në një qendër tregtare në ajër të hapur.
Në zemër të qytetit, një rrugë shumë e gjerë e veshur me pisha mesdhetare të bën të mendosh për stilin e veçantë fashist që pasqyronte ndikimin e Italisë gjatë mbretërimit të Zogut I dhe që do të arrinte kulmin me pushtimin në 1939 dhe aneksimin deri në 1944, viti në të cilin do të vinte në pushtet diktatori, Hoxha.
Edi Rama, kryeministri i Shqipërisë, i cili përveç rolit të tij si politikan, është edhe piktor dhe basketbollist.
Tirana është një qytet relativisht i vogël, por shumë miqësor për të shëtitur.
Në qendër ndodhet Sheshi Skënderbej, i rimodeluar së bashku nga artisti Anri Sala dhe zyra e S1N4E, më shumë se 90,000 metra katrorë e sheshit u mbuluan me mermerë të ngjyrave të ndryshme.
Në sfond, Opera dhe Muzeu Historik Kombëtar e inkuadrojnë në mënyrë madhështore hapësirën.
Në krye të muzeut, murali Shqiptarët, krijimi i Vilson Kilicës, Josif Drobonikut, Agim Nebiut, Anastas Kostandinit dhe Aleksandër Filipit, tregon historinë e vendit nga kohërat e lashta e deri në epokën komuniste.
I restauruar së fundmi, falë një fondi të Bashkimit Evropian që rindërtoi vendet e prekura nga tërmeti i 2019, murali rifitoi shkëlqimin dhe rrëmben vështrimin e udhëtarëve, me figurën femërore të Republikës në qendër dhe duke ngritur dorën me njërën dorë, pas saj fluturon flamuri kombëtar kuq e zi.
Berati
Megjithëse Tirana ka shumë për të ofruar, gjëja më e bukur e Shqipërisë është atje jashtë, në fshat, në rrugët dredha-dredha që përshkojnë peizazhe dramatike të luginave dhe maleve me qytete të vogla si diçka nga një përrallë mesjetare, të vendosura në majë të një mali.
Berati është një vendbanim që daton në shekullin e VII para Krishtit, i quajtur qyteti i njëmijë dritareve.
I vendosur në brigjet e lumit Osum, qyteti është i ndarë në tre rrethe: në krye, kalaja e vjetër; në qendër, një qytet i lashtë me mure i njohur si Mangalemi ose lagje osmane dhe, në anën tjetër të lumit, Gorica.
Shtëpitë e vogla të bardha, me dritare druri, mbulojnë të dy anët e malit dhe i japin udhëtarëve një kartolinë unike.
Berati konsiderohet si vendbanimi më i vjetër në Shqipëri dhe për shumë vite ishte pikërisht kufiri midis Perandorisë Bizantine dhe Perandorisë Romake, diçka që përshkon edhe historinë e të gjithë vendit, edhe në gjysmë të rrugës mes Lindjes dhe Perëndimit, mes krishterimit, islamit dhe ateizmit (shumë shqiptarë ende kujtojnë se si feja u ndalua nga viti 1967 deri në 1989).
Në njërën anë të kështjellës, kapela bizantine e Trinisë së Shenjtë shikon drejt luginës që nga shekulli i XV, ndërsa në rrëzë të malit funksionon Teqeja Halveti, një lloj manastiri i rendit Jalwati, një vëllazëri sufi islamike, sot si xhami. Është pjesërisht kjo trashëgimi historike që çoi në përcaktimin e Beratit si një vend i Trashëgimisë Botërore të UNESCO-s.
Edhe pse është ende diskret, nëse e krahasojmë me destinacionet e tjera mesdhetare, turizmi në Shqipëri ka filluar të lërë gjurmë, veçanërisht në qytetet historike si Berati apo Gjirokastër, në jug të vendit, pranë kufirit me Greqinë.
Me rrënojat që datojnë në shekullin e VII para Krishtit, Berati besohet të jetë vendbanimi më i vjetër në Shqipëri.
Sipas të dhënave të Bankës Botërore, gjatë dekadave të fundit kontributi i sektorit të turizmit në PBB-në shqiptare u rrit në 8% dhe viti 2019 ishte viti më i mirë i vendit për sa i përket turizmit, me 6,4 milionë vizitorë dhe 2,3 miliardë dollarë të ardhura nga ky sektor.
Ashtu si shumë nga vendet e rajonit, Kosova, Maqedonia e Veriut, Mali i Zi, edhe Shqipëria kanë filluar të hyjnë në radarin e udhëtarëve nga e gjithë bota, të cilët vijnë këtu në kërkim të një eksperience ndryshe dhe me çmime më të volitshme.
Gjatë vizitës është e zakonshme mund të shihni një bunker të harruar, shumë monumente konkrete të luftës që të kujtojnë spomenikët jugosllavë, dhe një perlë siç është qyteti antik i Apolonisë, një mrekulli e vërtetë e periudhës klasike greke që ende ruan një portik spektakolar që inkuadron Mesdheun në sfond.
Gjirokastra
Arkitektura e të gjithë qytetit shfaq një stil otoman që e bëri atë të përfshihet si një qytet i Trashëgimisë Botërore të UNESCO-s në 2015.
Mes maleve dhe reve të ulëta, përveç një shiu të hollë, gjithçka ka një aureolë disi mistike.
Ndër faktorët dallues që tërheqin turizmin, gastronomia është padyshim një nga faktorët kryesorë që i fton njerëzit të kthehen.
Shijet shqiptare janë pasqyrë e asaj kulture dikotomike mes Lindjes dhe Perëndimit, nga njëra anë ndikimi mesdhetar dhe italian me vajra, ullinj, djathëra dhe makarona që do të imagjinonim në Itali apo Greqi, nga ana tjetër, përgatitjet me bazë perimesh dhe erëzash që të kujtojnë një meze turke apo arabe, të gjitha të shoqëruara me verëra të shkëlqyera vendase.
Gjirokastra është vendlindja e disa prej njerëzve më të njohur të historisë shqiptare, si shkrimtari Ismail Kadaré dhe diktatori Enver Hoxha.
Bukuria e vërtetë e kësaj pasurie gastronomike është se ju mund të shijoni gjithçka në një vend. Dhe duhet thënë gjithashtu se çmimet janë shumë të volitshme, që do të thotë se udhëtarët mund të porosisin pa u shqetësuar.
Së fundi, faktori tjetër kyç është cilësia dhe freskia e perimeve dhe prodhimeve të detit.
Në shumë qytete bregdetare, është mirë të pyesni se çfarë është e freskët atë ditë dhe të prisni disa nga sugjerimet e kuzhinës.
Vlora
Përgjatë gjithë shëtitores mund të shihni rezidencat dhe godinat, të dizajnuara për të huajt që gjejnë vendin ideal për të investuar paratë e tyre, veçanërisht italianët.
Vlora mund t’iu duket paksa si Costa del Sol i Spanjës, Côte d’Azur in Francës ose plazhet greke.
Brigjet e Vlorës, një nga destinacionet më të njohura verore në Shqipëri. / atsh / KultPlus.com
Shifrat që erdhën në Shqipëri nga turizmi në gjashtëmujorin e parë sipas bankës së shqipërisë tejkaluan investimet e huaja dhe remitancat.
Ndikim kishte edhe në të ardhurat buxhetore. Financat konfirmojnë se në pesë muajt e parë të vitit tvsh apo taksa e konsumit u rrit me 1.2%, tatimi mbi fitimin e bizneseve në 40.9% dhe akciza 8.5%. Edhe pse shifrat tregojnë për një kontribut pozitiv, ekspertët mendojnë se Shqipëria duhet të ndjekë një strategji të re për të vjelur më shumë të ardhura
Shqipëria është zyrtarisht në hartën e destinacioneve globale, por ekspertët shprehen se sektori ka nevojë për formalizim të mëtejshëm.
Për shkak të turizmit ekonomia jonë pritet të pësojë një zgjerim më të fortë me 3.7%, ndryshe nga parashikimi fillestar prej 2.5%. Kjo do ndikohet në masën më të madhe nga ndërtimi, tregtia dhe shërbimet e lidhura me turizmin./topchanel/KultPlus.com
Bota është e madhe, e bukur dhe emocionuese, e përbërë nga kultura të ndryshme magjepsëse. Kultura është thelbësore për ekzistencën njerëzore dhe përshkruan besimet, vlerat dhe traditat e përbashkëta sipas të cilave jeton çdo komunitet!
Udhëtimi në vende me kultura të ndryshme mund të jetë jashtëzakonisht i dobishëm. Jo vetëm që na ofron perspektiva të reja për botën, por gjithashtu na ndihmon të krijojmë lidhje të pasura dhe kuptimplote me një gamë më të gjerë njerëzish! shkruan në një artikull gazetarja Elise Christian, të botuar në të përditshmen britanike restless.co.uk .
Shqipëria është renditur mes 12 destinacioneve më të mahnitshme për zbulime kulturore.
Ndërsa Shqipëria ka përjetuar një fluks turistik vitet fundit, kultura e saj rurale mbetet e jashtëzakonshme, ku shumë vendas ende jetojnë nga bujqësia dhe blegtoria.
Shqipëria është gjithashtu një vend me plazhe të mahnitshme, fshatra idilike, pamje mahnitëse të Alpeve dhe vende të pabesueshme historike, siç janë mbetjet e Perandorisë Osmane.
Ky vend i Evropës Jugore ka shumë gurë të çmuar të fshehur.
Për shembull, “Syri i Kaltër” misterioz është një burim uji verbues blu me një thellësi të panjohur në jug, ndërsa në qytetin e Gjirokastrës, i përfshirë në listën e trashëgimisë botërore të UNESCO-s, shtëpitë prej guri ngjajnë me fortesa të vogla dhe rrugët me kalldrëm të çojnë të gjitha drejt Pazarit.
Tani është koha për të zbuluar këtë vend jashtëzakonisht të larmishëm, i cili ka mbetur një nga enigmat më të mëdha të kontinentit.
Vija bregdetare e saj gjarpëruese, e quajtur Riviera Shqiptare është e mbushur me plazhe ëndërrimtare, të mbuluara me ujëra të thellë blu, dhe vendpushime magjepsëse, si Dhërmiu dhe Ksamili.
Në brendësi të vendit, do të gjeni male të larta, kala, kështjella të shkatërruara dhe rrënoja të panumërta të lashta greke dhe romake.
Nëse jeni adhurues i historisë, i aventurave ose i apasionuar pas plazhit, Shqipëria ofron gjithçka për të gjithë. /atsh / KultPlus.com
