Unë – ai, ti – ajo

Poezi nga Teodor Keko.

Ja, ra mbrëmja. Ti s’je më.
Ku ke shkuar? Unë s’e di.
Ne u prishëm për hiçgjë,
edhe gjatë do mbajmë mëri.

Do harrohen telefonat,
nëpër pellgje sytë do na thahen.
Si prelud do bjerë nga qielli,
një dëborë… kristal i bardhë.

Dhe kështu, gjersa një ditë,
të na thotë jeta ne: Harro!
Do të mbesim anonimë,
do të jemi ne përemra,
Unë “Ai” dhe ti “Ajo”.

Mbi ne ra ndarja si një dëborë,
mbuloi gjithçka: puthjet dhe fjalët.
Dhe vitet shkuan dalngadalë,
ujrat u ndotët, lumejtë u thanë.

Por, qaramanë, jo, s’do të bëhemi,
se na u thye ëndrra ty dhe mua.
Ndonjë ditë nëpër botë,
sytë tanë kur të takohen,
s’do të ketë urrejtje brenda./KultPlus.com

Vajza e Ali Podrimjes: “Unë, biri yt, Kosovë’’, për ne si familje është muzikë e spektakleve madhështore e djemve të Kosovës

Ndonëse autor i më shumë se dhjetë vëllimeve me poezi, Ali Podrimja ka pikasur me disa prej tyre në mënyrë më të theksuar, shkruan KultPlus.

Madje vargjet e poezisë “Unë, biri yt, Kosovë” të poetit po vazhdojnë të frymëzojnë brezat e rinj në Kosovë. Këto vargje të fuqishme janë bërë një lloj himni që shpalos një krenari e shfaq dashuri deri në vdekje për vendin.

Padyshim që krenarë për këto vargje janë edhe familjarët e Podrimës.

Vajza e Ali Podrimës, Donika Podrimja ka treguar për KultPlus së është krenari që vargjet e babait vazhdojnë të frymëzojnë brezat e rinj të pasluftës për një Kosovë bashkëkohore që frymon shpresë.

“Është krenari kur vargjet e babait, që na kanë mbajtur të palëkundur në kohërat më të rënda për shqiptarët, vazhdojnë të frymëzojnë brezat e rinj të pasluftës për një Kosovë bashkëkohore që frymon shpresë. Vargjet e Ali Podrimës për ne si familje janë muzikë e spektakleve madhështore të djemve të Kosovës.

Më poshtë po ju sjellim poezinë “Unë, biri yt, Kosovë”

“Unë, biri yt, Kosovë’’

Unë, biri yt, Kosovë t’i njoh dëshirat e heshtura,
t’i njoh ëndrrat, erërat e fjetura me shekuj,
t’i njoh vuajtjet, gëzimet, vdekjet,
t’i njoh lindjet e bardha, caqet e tua të kallura;

ta di gjakun që të vlon në gji,
dallgën kur të rrahë netëve t’pagjumta
e të shpërthej do si vullkan: –
më mirë se kushdo tjetër të njoh, Kosovë.
Unë biri yt. / KultPlus.com