Vikingët shkuan në Amerikë rreth një mijë vite më parë, zbuluan atë përpara Kolombit

Sipas një studimi të ri, vikingët përdorën anijet e tyre për të kaluar Oqeanin Atlantik dhe për t’u vendosur në Kanada që në vitin 1021. Studimi shqyrtoi objekte prej druri nga një vendbanim viking në Newfoundland, të cilat japin të dhënat për njerëzit që kaluan Atlantikun dhe arritën në Amerikë.

Studiuesit arritën në një datë përfundimtare falë dy burimeve: drurit të copëtuar dhe një stuhi diellore që ndodhi një mijë vjet më parë. Kur vikingët arritën në L’Anse aux Meadows, ata copëtuan pemë duke përdorur tehe metalike, të cilat nuk ishin prodhuar nga popullsia autoktone që jetonte në atë zonë, asokohe. Shkencëtarët kanë identifikuar përmes unazave të këtyre pemëve, se ato i takojnë vitit 993. Pikërisht një vit më parë, dihet se ka ndodhur një stuhi masive diellore, që lëshoi një rrjedhë rrezesh kozmike.

Konfirmimi i kësaj date tregon që kjo është prania më e hershme e evropianëve në Amerikë, përpara Kristofor Kolombit. “Mendohet se vikingët u nisën drejt perëndimit për të gjetur lëndë të para të reja, më së shumti dru. Ky udhëtim midis kontinenteve për materiale të tilla, është përshkruar si hapi i parë i globalizimit”, shprehet për Cnn, studiuesi Dee.

Numri i saktë i udhëtimeve në Amerikë, ose se sa kohë ata qëndruan atje, është i paqartë, por dëshmitë aktuale tregojnë se ka të ngjarë të ishte një qëndrim jetëshkurtër për vikingët. Përpjekjet e mëparshme për të kuptuar se kur vikingët arritën në Amerikë kanë qenë të rrënjosura në Sagat Islandeze, të cilat tregojnë për takime të mundshme midis vikingëve dhe popullsisë autoktone të Amerikës. Disa nga këto ngjarje u përshkruan si miqësore dhe të tjera të dhunshme. /a2news/ KultPlus.com

Studimi gjenetik konfirmon se Vikingët kishin rregullisht flokë të zinj

Një studim i ri zbulon se fiset legjendare evropiane Vikinge ishin një grup gjenetikisht i përzier dhe jo skandinavë të pastër.

Ata mund të kenë pasur reputacion për tregtinë, gërshetat e famshme apo sulmet vrasëse e grabitëse, por Vikingët kanë qenë shumë më tepër sesa një grup i pastër detarësh skandinavë me flokë biondë.

Një studim gjenetik i mbetjeve njerëzore tregon se vikingët nga pjesë të ndryshme të Skandinavisë vërtet nisnin udhëtime drejt pjesëve të ndryshme të botës, por flokët e errët te ta ishin më të zakonshme sesa mes danezëve të sotëm.

“Vikingët nuk kufizoheshin vetëm me skandinavë biondë,” thotë Prof. Eske Willerslev, bashkëautor i studimit të përbashkët të Universitetit të Cambridge dhe Universitetit të Copenhagen.

Willerslev dhe kolegët e tij raportojnë se kanë bërë sekuencimin gjenetik të genomit të 442 njerëzve që kanë jetuar në Evropë në vitet 2,400 p.e.s. deri në 1,600, kryesisht të epokës vikinge.

Studimi përpunonte të dhënat e më shumë se 1,000 individëve të lashtë dhe rezultatet zbuluan se në epokën e hekurit, genet evropiane kishin hyrë në Danimarkë dhe ishin përhapur në veri, ndërsa në masë më të vogël gene aziatike kishin hyrë në Suedi.

“Gjenetisht vikingët nuk janë skandinavë të pastër,” tha Willerslev.

Grupi zbuloi se popullata vikinge përbëhej nga tre grupe kryesore që do të thotë se popujt nga rajonë të ndryshme të Skandinavisë nuk përziheshin me njëri-tjetrin./ KultPlus.com