Tragjedia e Hekubës së lashtësisë greke është vënë mbërmjen e djeshme në skenën e teatrit “Migjeni”.

Hekuba e Euripidit e përkthyer nga Eleana Zhako dhe që vjen për  herë të parë në Shqipëri, u shfaq  me regjia nga Enke Fezollari, regjisor me origjinë shqiptare, i cili punon në Athinë, por që ka bashkëpunuar dhe me skenën e teatrit shqiptar.

Hekuba e Euripidit nuk është një zgjedhje e imponuar nga jashtë, por një nevojë e ethshme e gjithë pjesëmarrësve të shfaqjes, që të shprehen me shtysë “tragjiken”, që mbart kjo vepër.

Një vepër, ku heronjtë, grekë dhe jo-grekë (ose ndryshe barbarë), pasi përleshen deri në përçudnim me trupin e gjuhën e  tjetrit, të të huajit, të armikut të përbetuar, ndryshojnë dhe transformohen. Në çastin kur absurdi kulmohet, kur energjitë ndërluftuese të personazheve, duken sikur po përjashtojnë çdo arsye në mendim e veprim, trupat dekonstruktohen (gjymtohen) dhe ashtu të copëtuara rikompozohen përmes fjalës së tjetrit.

Me pjesëmarrjen e jashtëzakonshme të Vefi Rredhi dhe Adem Karaga, shfaqja u interpretua edhe nga Rita Gjeka Kacarosi, Jozef Shiroka, Krist Lleshi, Fritz Selmani, Rajmonda Marko, Merita Smaja, Nikolin Ferketa, Aleksandër Prenga./atsh/KultPlus.com