Gjetjet arkeologjike të Dresnikut sillen nëpër oborret e institucioneve të Klinës

6 Janar, 2019 - 10:50 pm

Kanë kaluar gati 4 vjet që këto gjetje të rëndësishme arkeologjike sillen nëpër oborret e institucioneve të Klinës.

Para disa viteve, ishin vendosur në oborrin e komunës së Klinës, ndërsa tani janë vendosur në oborrin e Shtëpisë së Kulturës “Jehona e Dukagjinit”.

Këto gjetje arkeologjike janë zbuluar në një pjesë të Dresnikut dhe i përkasin periudhës romake.

Por, deri tani, për to nuk është kujdesur askush, ani pse janë gjetur në një prej lokaliteteve më të veçanta arkeologjike në Kosovë.

Në komunën e Klinës fajësojnë qeverisjen e kaluar që nuk u ka bërë vend askund, e premtojnë që shumë shpejt kjo çështje do të zgjidhet.

Skënder Merturi, drejtor për Kulturë, Rini dhe Sport në Klinë, thotë se në lokalitetin arkeologjik të Dresnikut është duke u punuar shumë ngadalë dhe kanë probleme të shumta me fonde.

Arkeologët besojnë se gjetjet në Dresnik të Klinës i përkasin një banese aristokrate romake dhe janë mjaft të rëndësishme për historinë.

Për konservimin e tyre, Kohavisioni ka kërkuar një përgjigje nga Ministria e Kulturës, Rinisë dhe Sportit, por ata nuk kanë qenë të qasshëm gjatë javës. /KultPlus.com

Të ngjajshme