Videot e gjykimeve në Tribunalin e Hagës, nga sot shfaqen të hapura për publikun në Prishtinë (VIDEO)

22 Shtator, 2017 - 2:26 pm

Në Komunën e Prishtinës, sot u hap qendra e Dokumentimit, në bashkëpunim me Fondin për të Drejtën Humanitare dhe me financimin e Ambasadës Zvicerane, përcjellë KultPlus.

Kjo Qendër, e vendosur në Bibliotekën e Qytetit i ka të gjitha dokumentet dhe videot nga pesë gjykimet në Tribunalin e Hagës.

Kjo është mundësi për qytetaret, nxënësit, e studentët të mësojnë mbi të kaluarën me fakte të vërtetuara nga Gjykatat.

“Ne duhet të shikojmë nga e ardhmja dhe duhet të ndërtojmë të ardhme të bazuar në bashkëpunim, por vështirë se kjo mund të bëhet pa kuptuar në mënyrë të drejtë të kaluarën”, ka shkruar kryetari i Prishtinës, Shpend Ahmeti në Facebook.

Qendra e Dokumentimit në Prishtinë, konsiderohet një projekt shumë i nevojshëm për Kosovën për të dokumentuar historinë e re të Kosovës, sidomos ngjarjet mbi luftën, viktimat dhe agresorët. E rëndësishme është se të gjitha ato dokumente po ndahen me publikun. / KultPlus.com

Të ngjajshme