Filmi “The Load” me regjisorin serb Ognjen Glavonic është përzgjedhur të marrë pjesë në Festivalin e Filmit në Kanë.

Filmi do të jetë pjesë e programit Directors Fortnight në Festivalin prestigjioz të filmit që do të nisë muajin maj.

E veçanta e filmit është se ai flet edhe për personat e zhdukur gjatë luftës së fundit në Kosovë, kjo e përfshirë brenda tregimit të përgjithshëm të projektit filmik.

Filmi flet për një shofer kamioni, Vladën, i cili udhëton nga Kosova për në Beograd për të dërguar një pako misterioze, në kohën kur po ndodhim bombardimet e NATO-s në Serbi në vitin 1999. Në film luajnë Leon Lucev, Tamara Krcunovic dhe Pavle Cemeric.

Filmi është 90 minuta dhe në gjuhën serbe, i xhiruar në shkurtin e vitit 2017-të, dhe i bazuar në një ngjarje krejt të vërtetë. Filmi është bashkëproduksion mes Serbisë, Katarit, Francës, Kroacisë dhe Iranit.

Edicioni i 71 i Festivalit të Filmit në Kanë do të mbahet nga 8-19 maj.

Edhe filmi i kaluar i këtij regjisori, “Dubina Dva” ka folur për viktimat shqiptare në luftën e fundit në Kosovë, me kontekstin e varrezave masive në Beograd dhe në tërë Serbinë. / KultPlus.com