Sydney Sweeney është në qendër të vëmendjes pasi u pa në setin e filmit të shumëpritur “The Devil Wears Prada 2”, duke ndezur spekulime për një rol të ri sekret në këtë vazhdim të filmit kult të vitit 2006.

Aktorja 27-vjeçare, e njohur për rolet e saj në serialet “Euphoria” dhe “The White Lotus”, u fotografua më 6 gusht teksa dilte nga një karavan në një set në New York City, e veshur me kapuq që i mbulonte pjesën më të madhe të fytyrës. Një dëshmitar i pranishëm filmoi momentin, duke rritur edhe më tej dyshimet për përfshirjen e saj në film.

Vazhdimi i filmit legjendar, i cili po xhirohet aktualisht në New York, do të rikthejë kastin origjinal: Anne Hathaway, Meryl Streep, Emily Blunt dhe Stanley Tucci, ndërsa në projekt do të përfshihen edhe emra të rinj dhe të njohur si Kenneth Branagh, Lucy Liu, Justin Theroux, B. J. Novak, Simone Ashley, Rachel Bloom, si dhe yje nga bota e muzikës dhe modës si Ciara dhe Ashley Graham.

Përfshirja e kaq shumë figurave të njohura ka shtuar entuziazmin rreth filmit, i cili pritet të jetë një rikthim madhështor në botën e modës, intrigës dhe karrierës, që “The Devil Wears Prada” solli në mënyrë ikonike në ekran gati dy dekada më parë./KultPlus.com