Presidentja Osmani: Masakra e Rezallës është dhimbje e jona e vazhdueshme

5 Prill, 2021 - 11:50 am

Presidentja e Republikës se Kosovës, Vjosa Osmani ka kujtuar sot 22 vjetorin e masakrës së Rezallës, duke shprehur dhimbjen e saj për të gjithë ata që u privuan nga jeta vetëm pse ishin shqiptarë, shkruan KultPlus.

Osmani është shprehur se do të vazhdojnë të kërkojnë drejtësi për njerëzit e vrarë dhe se liria dhe paqja do të kenë kuptim vetëm kur përgjegjësit dhe ekzekutuesit të vihen para drejtësisë.

Ky është postimi i plotë i Osmanit:

Drejtësi për Rezallën!

Në Rezallë, më 5 prill të vitit 1999, forcat e regjimit gjenocidal të Serbisë rrethuan shtëpitë e fshatit, ndanë nga gratë, nënat e motrat, 98 djem e burra dhe i ekzekutuan mizorisht.

44 nga këta civilë të vrarë ishin të pagjetur. Disa vite më pas një pjesë e trupave u gjetën në Rudnicë të Rashkës.

Tre të mbijetuarit dhe trupat e të vrarëve të gjetur në varreza masive në Serbi ishin dëshmi e fuqishme e krimeve makabre të kryera nga regjimi serb.

22-vjet pas, nevoja për drejtësi riaktualizohet, duke u bërë përpjekje e vazhdueshme e institucioneve të vendit. Ne nuk do të ndalemi së kërkuari vendosjen e drejtësisë për njerëzit tanë sepse ata u privuan nga jeta, vetëm pse ishin shqiptarë. Liria dhe paqja kanë kuptim vetëm kur përgjegjësit dhe ekzekutuesit të vihen para drejtësisë!

Masakra e Rezallës është dhimbje e jona e vazhdueshme, kujtesë historike dhe sakrifica për lirinë e vendit!

Qoftë i përhershëm kujtimi për 98 të vrarët në Masakrën e Rezallës! / KultPlus.com

Të fundit

Të ngjajshme