Aktori britanik Rupert Everett ka zbuluar së fundmi se nuk do të rikthehet më në serialin e njohur të Netflix, “Emily in Paris”. I njohur për rolin e Giorgio Barbieri, drejtori i një firme dizajni të brendshëm, që u shfaq në një episod të sezonit të fundit, Everett tha se është larguar nga seriali pa paralajmërim.

“Më pushuan. Bëra një skenë në sezonin e fundit dhe më thanë: ‘Vitin tjetër do të flasim,’” tha ai gjatë një interviste në festivalin ndërkombëtar të filmit Marateale në Maratea, Itali.
“Prita që të më telefononin, por në fund, nuk ndodhi kurrë, dhe thjesht më pushuan.”

Everett shtoi se industria e filmit ka qenë gjithmonë e vështirë:
“Bota e spektaklit është gjithmonë shumë e vështirë, nga fillimi deri në fund. Kur shkruajnë skenarin, mendojnë se të duan, por pastaj gjërat ndryshojnë dhe humbasin personazhin tënd. Nuk e di pse.”

Për aktorin, kjo përvojë ishte veçanërisht e dhimbshme:
“Për mua, ishte një tragjedi,” tha ai.
“Qëndrova në shtrat për dy javë sepse nuk mund ta kapërceja.”

Megjithatë, Everett mbetet aktiv në projekte të reja. Sipas IMDb, ai ka disa filma në zhvillim, përfshirë komedinë “The Liar” ku luan përkrah Jeff Goldblum. Ndërkohë, fansat mbeten me shpresë se ai do të rikthehet në rolin e tij të dashur George Downes në një vazhdim të mundshëm të filmit të njohur të vitit 1997, “My Best Friend’s Wedding”./CNN/KultPlus.com