Ka vdekur kompozitori dhe dirigjenti i mirënjohur, Kristë Lekaj, shkruan KultPlus.

Ai ka punuar në produksionin e Radiotelevizionit në Prishtinë, si dhe ka qenë dirigjent dhe korepetitor në Korin e Filharmonisë së Kosovës.

Që nga shkolla e mesme u mishërua me muzikën, teksa në studimet universitare diplomoi në seksionin e teorisë së muzikës në Akademinë e Muzikës në Beograd.

Për një kohë, disa vjet kishte qëndruar në Tiranë për të marrë mësime nga Çesk Zadeja, në fushën e kompozimit. Pas studimeve u kthye në Prizren, ku punoi si pedagog në Shkollën e Muzikës.

Ka qenë aranzhues i shumë këngëve të muzikës argëtuese si dhe dirigjent.

Opusi krijues i tij përbëhet nga një numër jo shumë i madh i veprave të muzikës serioze, ndër të cilat, poema simfonike “Trualli betohet”, “Impresione simfonike” për orkestër, “Suitë korale” për kor miks, muzika e filmit, “Proka”, “Requiem” për kor dhe orkestër e të tjera. / KultPlus.com