198 vjetori i vdekjes së atdhetarit të shquar, Marko Boçari

9 Gusht, 2021 - 9:58 pm

Drejtoria e Përgjithshme e Arkivave, ka përkujtuar sot 198 vjetorin e vdekjes së atdhetarit Marko Boçari.

“Heronjve u kujtohet ditëlindja si fillim i veprës së tyre dhe datëvdekja si fillimi i lavdisë së tyre. Por ca heronjve lavdia u fillon që në gjallje. Të tillë mund të quajmë edhe Marko Boçarin, i cili lindi në Sul të Çamërisë më 1788 dhe ra në betejë më 9 gusht 1823”, ka theksuar DPA.

“Ishte një nga djemtë e Kiço Boçarit, prijës i krahinës së Sulit. Bashkë me familjen dhe gjithë suljotët u largua 1803 drejt Korfuzit, nën presionin e Ali Pashë Tepelenës, që kërkonte të kontrollonte gjithë zonën rreth Janinës. Aty ai ishte pjesë aktive e Regjimentit Shqiptar (Regiment Albanais) të Ushtrisë Franceze. Marko Boçari u shqua, veçanërisht, për kurajën dhe fitoret në beteja të ndryshme, fillimisht duke luftuar krahas ushtrisë osmane kundër Ali Pashës më 1820”, shton DPA, transmeton KultPlus.

“Më pas, me premtimin se suljotëve do t’u riktheheshin trojet e tyre amtare, u hodh krah Aliut kundër osmanëve. Kulmin e aftësive të tij luftarake e tregoi me fillimin e kryengritjes greke kundër osmanëve, më 1821 e më pas, ku morën pjesë edhe mijra shqiptarë të tjerë nga të dyja anët e luftës. Ai luajti rol të rëndësishëm në rrethimin e parë të Mesolongjit, që ishte kthyer në simbol rezistence”, thekson DPA.

“Më 9 gusht 1823, Boçari në krye të 350 suljotëve u hodh në sulm kundër trupave osmane. Suljotët u shkaktuan dëme të mëdha trupave osmane, por Boçari ra në betejë. Për të nderuar kujtimin e tij, e varrosën në Mesolongj. Varri iu shkatërrua, pas rënies së Mesolongjit, nga trupat osmane që pushtuan qytetin”, nënvizon DPA.

“Marko Boçari ka një kontribut të veçantë edhe në fushën kulturore, duke na dhënë një prej teksteve më të vjetra në dialektin e shqiptarëve të Çamërisë, teksa sa ishte në Korfuz, hartoi dhe botoi fjalorin shqip-greqisht, ku shqipja i përkiste atij dialekti. Emri dhe imazhi i tij, që kishin marrë famë që në gjallje, vijuan udhën e legjendës edhe pas vdekjes”, thekson DPA.

Drejtoria e Përgjithshme e Arkivave ka publikuar një skicë të Marko Boçarit, nga Fototeka e AQSH, dhe një këngë folklorike mbledhur në Vuno të Himarës nga Kol Kamsi. / KultPlus.com

Të fundit

Të ngjajshme